Malecaki 3
3
Desidesingicac naso wegenede
1 #
Mat 11:10; Mrk 1:2; Ruk 1:76; 7:27 Kurumenggac wasaiareng habuya habuya yeneac Kebungo yoac yofi dede, “Negenggec, ni siduc dedena sueba yeng warainemma sinna memengere anudeac habesande.” Anu ngeni Kebu henggecdeac kicfifi anggec yennoc womongau piratac isoc bic habesande. Ngic imoc hembeso negengkecdae ye habesandenoc amma ye dzadzahacac siducdedengic ambesande. 2#Yle 2:11; Yhkp 6:17Yeac sike sikenasou mongngo naric mi serima kecbesande nga yeng fingectegeru mongngo naric mi serima nambesande. Nocac yeac siriha imoc gerecngo silwa dzeu seuha isinggema meickeandae ifi isoc ande nga saifengo wamba dzuacgec kongac kpeande ye fakaya ifia mebesande.
3Silwaac uangicngo silwa me gol gerecfu ohou seuha ereu meickeande ifi isocngoc siducdedengic ye Lewiac bangecfora dzuacyunuma isingyunuu yeni sese kereng kereng sing dindingacfu kebuaru mehama faibesandae. 4Ifi anggecdeu Yehuda nga Yerusalaim yeneac sesengina imocngo kifaya kifaya feereec, siria ifia isoc anu Kebungo monggoc hengsongo amma sesengina imoc hoanggebesande.
5Ye yofi dede, “Ni fakangina isinggema desibadeac mewegenengunuduae. Dzinac areng nga kaisero areng amma yoac ikocac hepucareng nga uangicfocngina yeneac uabungngina nobohasac yemmeandae amma hotsecbeging gombunga mi ayemmema memayunuandae nga kuricngicngac yeneac yoacngina ikoc ikoc sicsaucfu demengere angkecdae amma ni mi sesehenuandae, ni bic hama ngeneac hakongina kpebesandua.”
Sese kenehagoc
6“Ni Kebu ni kechayai siriha imocngoc yaguc kecduae imocac Yacakowac bangecfora ngeni mi kpac anggec. 7Amma ngeni kisicfocngina yeneac nasou kecerema yofinenggac dedeseriyoacna ngadehegec amma mi modacgec. Imocac nearu dzigenegec neng ngenearu dzigenema monggoc hoangngunubade. Ifi deba ngeneng yoac yofi deandae, ‘Neni dafi amma gearu monggoc dzigenenide?’
8Ifi dedaeac yoac yofi deduae, ‘Ngic mongngo Anutuarunac wiac hamangec mekecde imoc mi ngereede ammanu ngeni sifu nearunac wiac hamangec meandae.’ Ifi deba yoac yofi deandae, ‘Neni dafiu gearunac wiac imoc hamangec meing.’ Ifi degecac yofi deduae, ‘Ngeni dzofinac tennunac mocgu amma sesegerec hafoangoc neac sese mi faiandae.
9Amma yehudangicngac hafoangoc ngeni neac wiac hamangec mekecdae imocac amma neac sowecngo Yehuda ngenearu sokongunudacma fefea feude. 10#Sese 27:30; Bki 18:21-24; Dser 12:6; 14:22-29; Neh 13:12Anu neac tohong semengagoc anudeac ngeni neac sese tennunac mocgu imoc womonnau hafoangoc mehama faigec. Sing imohai ni tobannu henggec neng deba kurumenggac nagu anggeu kenecnango ngenearu wake wakea feude me kpac imocac hania hemma ni negentegecnugecde.
11Ni gisicngo uanginau semengngina mi memanganeudeac kpae faima kisangyunubade. Ammanu waing ic uanginau nangkende imoc kpaudzakaranga mi anude. 12Ammanu bangeha bangeha yeneng ngeni kenecnginagoc ifi dengemmegecde nocac bangecngina imoc hengsongoac bangeckereng ambesande.’ ” Kurumenggac wasaiareng habuya habuya yeneac Kebungo yoac ifi dede.
13Amma monggoc torokpema yofi dede, “Ngeni neac ngadeyoac seria dekecdae. Ifi deba yofi dema kpesinengandae, ‘Neni geac ngadeyoac siriha dafi dekecdimbe?’ 14Ifi dedaeac yofi deduae: Ngeni yofi dekecdae, ‘Neni Anutuac ua mekecdimbe amma imocac fora mong mi hengandimbe. Amma enara modacma yeac kicfu ifingoc ubahodung siric kecandimbe nga sifu gombung mong Kebuarunac mi meandimbe. 15Amma ngic mangana nga ngic dehesi angkecdae yeneac negengngeree kecdimbe yeni mangana ammaguc ubangerec witiau kecandae ifi amma Anutu tobanggegec faka ifi me ifi mong mi fingecyemmeande.’ ”
16Nga ngicngac Kebu seseheandae yeni yenaocngoc denegeng anggec. Anu Kebu ye imoc kedzac kpema negengyemmeec. Amma Kebu sesehema kparaac eweheihei angandae, yeneac negensima yeac kicfu kpacarengngina kibiu ohogec fede. 17“Yeni neac arengfocna anggecde. Nga neanna nasokereng monnu faka mebade naso imohai yeni neanna ngicngacfocna yombong anggecde. Amma manggac monggac medahango mamaac enactofoc tofoho anu wosoefac ammiande ifi isocngoc yeni wosoefac ayemmebade. 18Amma damoc yeneng kenecnginagoc imoc ngicngac dindingac me ngicngac mangana yeni Anutuac ua mekecdae me yeni yeac ua waandae ngeni imoc monggoc hensigecde.” Kurumenggac wasaiareng habuya habuya yeneac Kebungo yoac ifi dede.
Currently Selected:
Malecaki 3: Ded
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
