Fingec fingec 29

Yacakow ye Lawanggaru kensikeec

1Anu Yacakow ye wenac ere ereaubigeng ngicngac kecgec yeneac bangecfubigeng kengkefec. 2#Mke 2:15-19Kengkecma kic fiu kenu uau dokuteng mong henec. Henu imohai ramahabu harebec fegec. Amabangec imocac mingina yeni dokuteng imohacnac ramaburumakafocngina doku gumecyunuandae. Nga dokuteng enarau ine hoctoango hedzickema tarec. 3Anu doku imohai rama habuya habuya kpedzucnedacgec ine ramagareng yeni dokuteng enarau hoc imoc kpedidinggema doku gumecyunuma hoc imoc monggoc enarau hedzickegec tacande.

4Anu Yacakow ye ramagareng yenemma kpesiyemmeec, “Tosofocna, ngeni dahacnac hadae?” Ifi deu yeni yofi meremmigec, “Neni Harannac.” 5#Fing 24:24, 29Ifi degec yofi dema kpesiyemmeec, “Ngeni Nahor esea Lawan ye negemmidae me?” Ifi deu yeni yofi meremmigec, “O, negemmidimbe.” 6Ifi degec kpesiyemmema yofi deec, “Ye naric kecde me?” Ifi deu yeni yofi meremmigec, “Ye naric kecde nga naroanga Rahel ye edimoc ramahabu wangecyunu hade.” 7Anu Yacakow ye yofi deec, “Negendae, wenac nandengoc rama meyunu kenggecdeac naso mi ande. Imocac amma doku gumecyunuma faiyunugec kemma kpindzing monggoc negec.” 8Ifi deu yeneng ine yofi degec, “Rama habuya habuya mi hadacmagec imoc naric mi annide. Hadacgec ine teng enarau hoc tacde imoc kpedidinggema doku gumecyunuandimbe.”

Yacakow ye Rahelac memeficua meec

9Anu Yacakow ye yenigoc yoac denegeng amma nammagecngoc Rahel ye mamaac rama meyunuma hasikeec. Ye yeneac gareng kefec imocac amma wangecyunuma haec. 10#Mke 2:17Nga Yacakow ye aniha Lawanggac naroanga Rahel nga anihaac ramahabu yenemma kemma dokutennunac hoc kpedidinggema anihaac rama doku gumecyunuec. 11Amma ye Rahel kokockema kiarec. 12Kiacma Rahel yofi dema edeec, “Ni sactosoga, manggaac naina Riweka yeac medac.” Ifi deu Rahel ye nedzima kemma mama edeec. 13Edeu Lawan ye deuya Yacakowac siduc negemma ye henudeac nedzima kemma tofohoma kokockema ameau wangecma enec. Enu ye siduha sasawa Lawan ammidarec. 14Ammidaru Lawangngo yofi dema edeec, “Fora, ge sactosona yombong annec.” Anu Yacakow ye afo mocgu yegoc kefec.

Yacakow ye Rahelac yoac deec

15Anu Lawangngo Yacakow yofi dema edeec, “Ge deuyombonnango enacna tofohoma eng kecnade imoc mi ngereude. Noc wiac menadeac negennec imoc edenuna.” 16Anu Lawan ye naroanghora yohockang kefoc waracnaroanga kpara Lea nga yeac bageau kpara Rahel. 17Lea ye kiwa gombunga nga Rahel ye ine kic nga siriha hafoangoc gombunga yombong. 18Nga Yacakow ye songea Rahelaru feecac amma yofi deec, “Ni naroangga Rahel mebadeac kifa seweng enactofoc tofohoga kecbade.” 19Ifi deu Lawangngo yofi meremmiec, “Ngicareng mong mi yemmebade. Ge gemba naric anude. Imocac amma ge nigoc kecbesena.”

Lawan ye amabangec imocac faka modarec

20 # Hos 12:12 Anu Yacakow ye Rahelac amma kifa seweng yeac enac tofoc tofohongic kefec. Ye Rahelac songo kuneng negenecac amma kifaac negenu uameme efeanec isoc anec. 21Anu kecma kifa imoc wisickeu Yacakowngo Lawan yofi dema edeec, “Naso bic wisickedacac ni enennagoc febadeac negenduae imocac amma yaguc nenna.” 22Ifi deu Lawan ye imocac yaka ohoma ngicngac heitaiyunuu hama yaka imoc negec. 23Ama toforeu ye ine naroanga Lea wangecma emma Yacakowaru faiec. Fau yegoc feoc. 24Anu Lawan ye wanacnaroanga Dzilepa naroanga Leaac enac tofoc tofoho kefudeac miec. 25Anu ama wereckenuguc ine Yacakow ye henec imoc Lea. Ifi hemma ye kemma Lawan yofi dema edeec, “Ge noc faka anendang? Ni Rahelac amma geac enac tofoc tofohoua mekefai. Ge nocac tobannudang?” 26Ifi deu Lawangngo yofi meremmiec, “Amabangec yomocac faka yofi fede waracnaroang yeni eng kecmagec munafocngina ngicfu faifaiyunu imoc sing mong mi fede. 27#Fing 31:41; Des 14:12, 17Imocac sonda mocgu tomai kecna wisickeu Rahel ifingoc gennide anu yeac amma torokpema kifa seweng monggoc neac enac tofoc tofoho kecbesena.”

28Anu Yacakow ifi amma Leagoc kefu sonda mocgu wisickeec. Wisickeu Lawan ye naroanga Rahel miu meec. 29Anu Lawan ye Rahel enac tofoc tofohongac kefudeac wanacnaroanga Bilha miec. 30Anu Yacakow ye Rahelgoc feec. Nga ye songea yearu kuneng feec nga Leaac kapianec femiec. Amma ye kifa seweng torokpema Lawanggac enac tofo tofoho kefec.

Yacakow nambaracfora yeneac kpacareng

31 # Fing 20:18 Anu ye Leaac songo mi negenec Kebungo imoc hemmahereagoc anudeac sing meficgeec. Anu Rahel ye ine kufing anec. 32Nga Lea ye medac kpenanggema mema yofi deec, “Kebungo ubaebicna hennegeng amma meficnudac. Ewena ye yaguc neacsongo negenude.” Ifi dema kpara Recuwen#29:32 Recuwenggac titiha imoc “Medac mong henna.” Nga mong yomoc ifi isoc ye ubaebina henec. kparec. 33Amma imocac ngadeau medac mong kpenanggema meec. Mema yofi deec, “Ubango mi hoannunuya imocac amma Kebungo negennemma yomoc torokpema nende.” Ifi dema kpara Simecon w kparec. 34Anu yeac ngadeau medac monggoc kpenanggema meec. Mema yofideec, “Ni ewenaac medac harebec meyunudua imocac yeng nearukpeketahaude.” Ifi dema kpara Lewi#29:34 Lewiac titiha i y moc “Nigoc kefude.” kparec. 35Amma imocacngadeau medac monggoc kpenanggema meec. Mema yofi deec, “Yaguc ine ni Kebu dengerebade.” Ifi dema kpara Yehuda y#29:35 Yehudaac titiha imoc “ubangerec” isoc ande. kparec. Imocac ngadeau torokpema medac monggoc mi meec.

Currently Selected:

Fingec fingec 29: Ded

Highlight

Copy