Fingec fingec 17

Ngicngacareng homac yeneac mangngina

1Anu Awram ye kifaya 99 ammanu Kebungo fingecmima yofi dema edeec, “Ni Anutu Kuctoa Mingina, ge neac kicfu kecengkecma hafoangoc ngic dindingac kecbesena. 2#Fing 13:16; 15:5, 18Ifi anna ni gegoc dzadzahac mema bangecfocga mesaheyunuba homac yombong ambesandae.”

3Ifi deu Awram ye kicmesuya bangecfu hetutuckema feec. Feu Anutungo yofi dema edeec, 4“Negennec, ni gegoc dzadzahac mebade imoc yofi, ge ngicngacareng homac yeneac kisicngina ambesannec. 5#Rom 4:17Nga ni faiguai, imoc ge ngicngacareng homac yeneac kisicngina ambesannecac amma kpacga Awram#17:5 Awranggac titiha imoc “manggactoa”. imoc monggoc mi kpacgugecde. Yaguc ine kpacga Awraham#17:5 Awraham imocac titiha “ngicngac homac yeneac manggac”. ifi kpacgubesandae.”

Dzadzahac feengkecbesande

6“Ni ge mesaheguba seregurutoa yombong ambesannec. Nga geac sacarennac ngicngacareng homac fingecbesandae amma yenearunac goa ngictau ambesandae. 7#Ruk 1:55Ni ge nga bangecfocga ngenigoc dzadzahac yofi ambade ni Anutungina amma kecengkecbesandua. Imoc ge nga bangecfocgaac fingecsahe nga yeneac fingecsahe yenigoc dadzahac imoc feengkecbesande. 8#Fing 12:7; 13:15, 17; 15:7; Aps 7:5Anu Kenacan bangectoau yaguc kuric kecnec imoc hafoangoc ge nga bangecfocga ngemmeba mema mingina anggec ngeneac feengkecbesande nga ni Anutungina amma kecbesandua.”

Sebinginaac tosea herec herecgeac kpete

9Ifi dema yofi edeec, “Ge dzadzahac imoc mekecbesena, ge nga bangecfocga fingecenggecde ngeni dzadzahac imoc mekecbisia. 10#Sese 12:3; Yoh 7:22; Aps 7:8; Rom 4:11Anu ni nga ge bangecfocgagoc ngeni botucninau dzadzahac fede imoc mekecbisia. Imoc yofi, ngic nga medacfocngina sasawa sebinginaac tosea herecgedacbisia. 11Sebinginaac tosea herecgegec imocngo ni nga ngeni botucninau dzadzahac fingerec fede imocac kpetea ambeso. 12Gearunac esamedacfocga nga bangecfocga erebesandaesoc yeni fingecgec uameme 8 imohai sebinginaac tosea herecgekecbisia. Nga wanacngic geac amau fingecgecde amma kuricngic yenearunac wanacngic silwadzongo bummeyununade nga geac esangabofocga me bangecfocga mi andae yeni ifingoc momoc sasawa kpete imoc medacbisia. 13Foracngoc, wanacngic geac amau fingecma kecgecde amma ngic silwadzonginango bummeyunugecde yeni sasawa sebinginaac tosea herecgebisia. Ifi anggec neac dzadzahacac kpete ngeneac sebiu fefeseri feengkecbeso. 14Anu ngic mong sebia tosea mi herecgema eng kefudeu ye habufora yenearunac meickebesonga. Imoc yofiac, ye neac dzadzahacna kpede.”

Saraingo medac mong meude

15Ifi dema torokpema Awraham yofi edeec, “Ge enengga kpara Sarai monggoc mi kpacbesena. Ni yaguc hanahema yeac kpara Sara#17:15 Saraac titiha imoc ngactau. deduae. 16Ni ye keneheba ye geac medacga mong meude imoc neng genduae. Ni ye keneheba yeac sacarennunac ngicngacareng homac fingecbesandae. Nga yenearunac goa yeni ngicngac yeneac ngictau ambesandae.”

17 # Fing 17:3; 18:12; Ruk 1:18 Ifi deu Awraham ye kicmesuya bangecfu hetutuckema dzomoreec. Dzomorema ye yofi negengemeec, “Ngic mong ye kifaya 100 anu ye sabac mong naric mi kpeficgeude. Nga Sara ye kifaya 90 anu ye kogoc naric mi meude.” 18Awraham ye ifi negemma Anutu yofi dema edeec, “Ismacel ye geac kicfu kefude imocngo soha ande.” 19#Fing 17:16; 18:10; 21:3; 26:2-5; Heb 11:11Ifi deu Anutungo yofi dema meremmiec, “Foracngoc, enengga Sara ye ine medacga mong meude ge yeac kpara Itsak#17:19 Itsakac titiha imoc dzomorede. kpacbesena. Nga neng yegoc dzadzahac meba imocngo bangecfora yenigoc fefeseri fekecbesande.

Ismacel yeac arennunac ngictaumedacfora 12

20 # Fing 16:10-12; 25:13-16 Anu Ismacelac negemma kpesi kpesiga bic negenggendua. Negennec, ni ye kenehema gboricfora mesaheyunuba seregurutoa yombong ambesandae. Ye ngictaumedac 12 yeneac mangngina anude nga yeac arennunac ngicngacareng kuneng fingecbesandae. 21#Fing 17:9; 18:10, 14; 21:1; Rom 9:9Anu dzadzahacna imoc ine Itsakaru meseribade. Sara ye kifa fanihau naso yofinenggac meude.” 22Anutungo Awrahamgoc yoara ifi desima ye wama enec.

23Anu Awraham ye medaha Ismacel nga wanacngicfora ameau fingecdacma kecgec nga ngic silwadzongo bummeyunudarec amma ameau ngic kecdacgec ngic imoc sasawa meyunudacma Anutungo edeec imocac sirihau uameme imohaingoc sebingina tosea herecgedarec. 24Awraham ye kifaya 99 ammanu yengena sebia tosea herecgegec. 25Anu medaha Ismacel ye ine kifaya 13 ammanu sebia tosea herecgegec. 26Awraham nga medaha Ismacel yeri uameme mocgungoc sebingira tosea herec herecgea. 27Amma Awrahamgac amau ngic kecdacgec imoc wanacngicfora yeac amau fingecma kecgec amma kuricngic yenearunac ngic silwadzongo bummeyunuec yeni momoc uameme imohaingoc sebingina tosea herecgedacgec.

Currently Selected:

Fingec fingec 17: Ded

Highlight

Copy