Fingec fingec 15

Ge medac mong kpeficgenade

1 # Dser 33:29; Myeg 3:4; 18:3; 84:12; Yes 41:10 Imocac ngadeau Kebuac yoac Awranggaru kpefing isoc hau yofi henec, “Awram, ge kengec mi anna, kasoga imoc ni nga ni bungga homac monggoc gembade.” 2Deu Awram ye yoac turunga yofi merenec, “Kebu Anutu, ni nambaracfocna kpac eng kecduae nga ge wiac nennadeac denec. Nga Elicedzer Damasek amaunac yeng neac amana nga ramaburumakafocna amma maridzominna mekefude.” 3Amma torokpema yofi deec, “Negennec, ge nambarac mong mi nennec imocac negenna, enac tofoc tofohona amanau fingerec yeng kecma wiacna sasawa medarude.” 4Imohaingoc, Kebuac yoac yearu hau yofi edeec, “Kpac, ngic imoc ye wiacga sasawa mi meude. Geanggaoc ine medac mong kpeficgenade yeng kecma wiacga sasawa medacbesande.” 5#Fing 13:16; 22:17; Mke 32:13; Dser 10:22; Rom 4:18; Heb 11:12Ifi dema Kebungo bangecfu hesickema kemema yofi edeec, “Ge kicga fina sawau enu asomeng yenenna, naric osoyunudacnadeu bangecfocga ifingoc naric osoyunudacnade.” Ifi dema yofi deec, “Geac bangecga ye ifi isoc fingecsahe ambesande.”

Awram ye Kebu negensinggeec

6 # Rom 4:3; Gar 3:6; Yak 2:23 Anu Awram ye Kebu negensinggeec imocac amma Kebungo yeac ngic dindingac demiec. 7Amma yofi edeec, “Ni Kebu, neng bangec yomoc gemba ge imocac mingina annadeac dema Kased bangecfu Ur amaunac wangecguba hanec.” 8Ifi deu Awram ye yofi deec, “Kebu Anutu, bangec yomoc ni imocac mingina ambade imoc dafi negembade?” 9Ifi deu Kebungo yofi dema meremmiec, “Ge kemma burumaka ngagera mong kifaya harebec nga noning ngagera mong nga ramangiwa mong kifangira harebecngoc angana. Amma gomoc gomoc mong nga kebesacmedaha mong, ifi meyunudacma nearu hana.” 10Ifi deu Awram ye wiac sasawa imoc mema haec. Hama yang sasawa imoc hendziru yohockang noboha noboha anec. Anu areng yohockang noboc noboc arengyunuec. Nga neng yohockang imoc ine mi hendzirec. 11Nga kikic yeni hagec Awram ye kisangyunuec.

Bangecfocga yeni bangec monnu kemma kecgecde

12 # Yop 4:13-14 Anu wenac kemebeso anu Awram ye gau kunengngoc feec. Negendae, ye feu kundungtoango semeu kengec kuneng kpeec. 13#Mke 1:1-14; 12:40; Aps 7:6, 17; Gar 3:17Kengec kpeu Kebungo Awram yofi dema edeec, “Yomoc foracngoc negennec, bangecfocga yeni bangec mong yeneac mi dedea imohai kuric kecma bangec mingina kifa 400 enacngina tofohomagec yeneng ngaba ayemmema ebic hania hania meficgeyemmebesandae. 14#Mke 3:21-22; 11:2; 12:35-36; 12:40-41; Aps 7:7Amma yeni bangecareng imoc yeneac enac tofohogecde, bangecareng imoc yeni neng fakangina imocac turunga kpouyemmebesandua. Anu imocac ngadeau yeni imohacnac finac homac medacma kembesandae. 15#Fing 25:8Ge geangga esangabofocga homema kenggec yenearu ruaegoc kembesannec. Ge naric kecma ngic kpengeng yombong amma homena tonggogubesandae. 16#Fing 15:13; Dser 9:4Amma amoringicngac yeni kopocsicnginaac kpete hafoangoc mi mesidauac yeni kecmagec fingecsahe andenga 4 ammanu monggoc dzigenema yei habesandae.”

Bangec imoc bangecfocga yemmebadeac deseriduae

17 # Mke 13:21; 19:18; Yer 34:18 Anu negenggec, wenac kemeu ama toforema kundung yombong anu yofi fingerec stof#15:17 Stof imohai yaka ohoandae wiac mong ifia isoc henec. mong hosuhagoc nga kifa#15:17 Kifa imoc ahakifa mong isoc anec. mong gerecboranga kuneng yombong fingerec. Fingeru yang noboha yohockang yohockang yereng yereac botucfu ferecgema kenoc. 18#Fing 12:7; Mke 23:31; Dser 34:4; 1Ngt 4:21; 2Ngts 9:26; Myeg 80:12Wenac imohai Kebuac yofi dema Awranggoc dzadzahac anec, “Aigita doku imohacnac hanahema kengkecma Perat dokutoauwisickede bangec imoc bangecfocga yemmebesanduaeac deseriduae. 19Imoc keningic, kenidzingic, kademongngic, 20hitingic, peridzingic, refaingic, 21amoringic, kenacangngic nga girigasingic ammayewusingic, ngic imoc yeneac bangec.”

Currently Selected:

Fingec fingec 15: Ded

Highlight

Copy