Aposoro 7

Kisicfocngina yeneac siduc

1Womonggarengtoango Stefano kpesimiec, “Yoac dedae, imoc fora me?” 2#Fing 11:31Ifi deu Stefanongo yofi deec, “Mangfocna nga sactosofocna, yoac deba negenggec: Kisicnina Abrahang ye Harang taonnu mi kemma Mesopotamia bangecfu kecmanu Anutu kuc nga kibikperagi mingina, yennoc fingecmima yofi edeec,

3‘Ge amabangecga nga arengfocga wayunuma neng bangectoa mong edzacgubade, ihai kemma kecbesena.’ (Fing 12:1)

4 # Fing 11:31–12:5 Anu ye yoac ifi negemma Kardea bangec wama Harang taonnu kemma kefec. Ihai kecmanu mama homeec. Homeu Anutungo bangec ngeni yofinenggac kecdae, Abrahang imohai sueu haec. 5#Fing 12:7; 15:18; 17:8Hesicke hama bangec mong mi wamiu tiuenec, imoc kpac yombong. Ye nga bangecfora dengec tigec enudeac areng kpeyemmeec, imoc nambaraha kpac kecmanu edeec.#7:5 Fingec fingec 48:4 6#Fing 15:13-14; Mke 12:40Amma Anutungo yoac mong yofi deec,

‘Esangaboga nga bangecfocga yeni kifa 400 ngic mong yeneac bangecfu kuric kecma wanacua memagec bangec mingina ngaba ayemmema ebic hania hania meficgeyemmebesandae.’

7 # Mke 3:12 Amma yoac mong yofi torokpeec,

‘Bangec imohai yeni wanacua megecde, ngicngac imoc yeni turunga yemmebade. Imoc wisickeu yeni bangec imoc wama bangec yomohai neac enac tofohobesandae.’ (Fing 15:13-14)

8 # Fing 17:9-14; 21:4 Anutungo Abrahang dzadzahac mima sebi tosangina herecgegecdeac#7:8 Sebi tosea, imoc ngicmedac fusacnginaac dumbengaac sebera fede, imoc herecgeandae. Anutungo Abrahang edeec. Ifi edeecac medaha Isaka kpeficgeu fingecma uameme 8 femanu medahaac sebi tosea herecgeec. Anu Isakango Yakobo kpeficgeec nga Yakobongo kisicfocnina 12 kpeficyunuec.

9 # Fing 37:11, 28; 39:2, 21-23 Kisicfocnina yeni munangina Yosefe keracmangang ammima Aigita bangecfu faigec ngic goa yeneng bummema mekenggec. Ihai kecmanu Anutungo yegoc kefecac amma 10#Fing 41:37-44kpendzennunac meickema ubangerecgoc kekec heficgemiec. Yeng Yosefe wosoefac ammima negen negentegec miu Aigita ngictau Faraongo negen negenga imoc hengngereema yengena amagerec nga aigitangicfora momoc garengyunuma kefudeac ngickuneng faiec.

11 # Fing 41:54; 42:1-2 Faiu kecmanu Aigita nga Kanaang bangecfu bodi fingeru ebic kuneng meficgegec. Ifi fingeru kisicfocnina yeni nenesemenggac homema kecgec. 12Kecmagec ‘Aigita bangecfu semeng fede’ ifi degec negemma Yakobongo medacfora sueyunuu ihai kenggec. 13#Fing 45:1-4, 16Kecma naso monnu monggoc kenggec Yosefengo dacfora haniaya dekperagiyemmeec. Dekperagiyemmeu Faraongo Yosefe yengena nga arengfora haniangina negentegerec. 14#Fing 45:9-11; 46:27Ifi anu Yosefengo dacfora edeyunuu kemma mangngina Yakobo nga arengfocngina sasawa bic kpacyunugec hagec. Nga ngicngac hagec, yeneac kpetengina 75 anec. 15#Fing 46:1-7; 49:33Nga Yakobo ye Aigita bangecfu kemma kecma homeec nga medacfora kisicfocnina yeni ifingoc ihaingoc homedacgec. 16#Fing 23:16-20; 33:19; Yos 24:32Homegec farengngina Sikeng amau meyunu hagec. Hama Abrahangngo Sikeng amau Hamoro medacfora yenearunac bangec mong kicsereac amma silwadzo dafigucngo bummeec, imohai tonggoyunugec.”

Moseac siduc

17 # Mke 1:7-8 “Anutungo wiac Abrahang miudeac bicngoc deseriec, imoc fora fingerudeac naso wegenemanu Yakobo esangabofora nga bangecfora yeni Aigita bangecfu homac fingecsahe anggec. 18Ifi amma kecmagec Aigita ngictau gboria mong fingerec, yeng Yosefeac hania mi negenec.

19 # Mke 1:11-22 Anu ngictau yennoc kisicfocnina meenti memati ayemmema memanganeyunudarec. Amma yeng yofi edeyunuec, ‘Ngeni sabacfocngina wayunugec homedacbisia.’ ”

20 # Mke 2:2 “Mose ye naso imohai fingeru Anutungo sabac gombunga imoc henu ngereec. Nga ye mamaac amau afo harebec kefu garenggegec. 21#Mke 2:3-10Ifi amma mekemma ama ngadeau tihereema faigec feec. Femanu Farao naroangango meficgema yengena medac isoc mema mekefu yadiec. 22Yadiu Farao ngicfora yeneng aigitangic yeneac faka nga negen negeng kpoumigec negentegecma kecma wiac deme anu kuhagoc anec.”

23“Kecma kifaya 40 anu ye israengic ogofora yenennegeng anudeac ubea efaiu kenec. 24#Mke 2:11-15Kemma aigitangic mongngo israengic mong eng kpeu hemma ogea meficgema turunga meremma aigitangic homemea kpeec. 25Kpema yofi negenec, ‘Ni arengfocna Faraoac mariunac mesiyunubadeac dema Anutungo ua nende, imoc negentegecdae gedang.’ Ye ifi negenec anu Isracel ngicngac yeneng imoc ine mi negentegecgec. 26Anu wereckengau monggoc kemma israengic yohockang eng eweec meficyuruma demefac ayecmema yofi edeyuruec, ‘Ngihoc waec, ngeri areng mocgungo ewedape, imoc naric kpac.’ ”

27“Ifi deu ngic ogea kpeecngo Mose kpefahama yofi deec, ‘Mongngo mi nereac desidesingic me gareng faiguec. 28#Mke 2:14Ge worang aigitangic kpehomedang, ifi isoc ni gedang ifingoc nubeso annec.’

29 # Mke 2:21-22; 18:3-4 Ifi deu Mosengo yoac imoc negemma imohaingoc worama Midiang bangecfu kemma kuric kefec. Ihai kecma ngac mema medac yohockang kpeficyuruec.”

30 # Mke 3:1-10 “Anu kifa 40 monggoc kecma Sinai tikiugeng bangec hocsiragocfu kemma kecmanu angero mongngo icbarama susiau gerecborang manau fingeru henec. 31Hemma kpidohoma hentegerudeac kenu Kebuac yoac yofi fingerec, 32‘Ni kisicfocga yeneac Anutu, Abrahang nga Isaka amma Yakobo, yeneac Anutunoc.’ Fingeru Mose ye dzonong fedefede amma kengec kpeu kiwa sufuma ngonducnema nanec. 33Nammanu Kebungo yofi edeec, ‘Bangec nannec, imoc bangec kpetiac, imocac hanitabega hesina. 34Ni ngicfocna Aigita bangecfu sisicyunugec kiacudumeng anggec ereu yenenduae. Amma mesiyunubadeac yaguc maduae. Imocac Aigita bangecfu sueguba bic kembesena.’ ”

35“Ngic yeneng Moseac yoac wama yofi degec,

‘Mongngo ge desidesingic me ngickuneng mi faiguec, kpac.’ (Mke 2:14)

Anutungo ngic yenoc israengic yeneac enarameme nga mesi mesingicngina anudeac dema angero sueu gerecborang manau fingecmima ua imoc demiec. 36#Mke 7:3; 14:21; Bki 14:33Ifi amma Anutungo Mose sueu kemma hesicyunu haec. Ye Aigita bangecfu nga Kondung sacsacfu nga bangeckisiu faka mi hehena nga negensinggegecdeac faka kuhagoc homac mema kecmanu kifa 40 anec.”

37“Amma Mose yennoc israengic yofi edeyunuec,

‘Anutungo arengfocngina yeneac botucfunac profete mong ni isoc meficgengemmebesande.’ (Dser 18:15)

38 # Mke 19:3 Amma yengngoc bangec hocsiragocfu kisicfocnina yeneac kpebunggoc kpeturanggema kecma Sinai tikiu emma angeroac enacfunac yoac kekehagoc negemma mama edenunuec.”

39“Kisicfocnina yeni yengena wama yoara membaickema Aigita bangecfu dzigenegecdeac ubangina suema 40#Mke 32:1Arong yofi edegec, ‘Ge nemuonga mong menemmena nemu imocngo warainemmebeso. Mosengo Aigita bangecfunac hesicnunu haec, ye gedang bic sufuma kpac anec.’ 41#Mke 32:2-6Ifi dema naso imohai nemuonga burumaka medaha siric isoc mema hosuc heimigec. Yeni maringinango onga mema imoc deafehe ammima hoanggegec. 42Ifi anggec Anutungo ngadeyunuma sawau onga hadehade afeheyunugecdeac wayemmeec. Profete yeneac kibiu yoac imocac yofi bic oho ohoya fede,

‘Isracel mingina, ngeni kifa 40 bangec hocsiragocfu kecma yang hosuc heima me sesegerec goa mong mi ohonenggec, kpac. 43Ngeni nemu Morokoac kporucbedzo tofohokecgec nga nemu Refang, yeac asomeng onga mekecgec. Wiac imocnoc numumigecdeac memengere anggecac amma ni Babilon bangec hereau faingunubesandua.’ ” (Amo 5:25-27)

Anutuac kporucbedzo

44“Kisicfocnina yeni bangec hocsiragoc, ihai Anutuac kporucwomong megec, imoc Anutungo Mose siriha edzahema derecgemiec, imocac sirihau memea. 45#Yos 3:14-17Kporocwomong imocnoc kisicfocnina Yosuango enara meyemmeu yei bangecareng goa yeneac bangecfu mehama tacdacgec. Tacmagec Anutungo bangecareng kecgecmoc, yeni yunukporac ayemmeu kisicfocnina yeni bangec tigec enu Anutuac kporucwomong imohaingoc torokpeu torokpe mekengkecmagec Dawidi fingerec.”

46 # 2Sm 7:1-16 “Anutungo Dawidi wosoefac ammiu yeng Yakoboac Anutu, yeac amawomong mong meficgeudeac numumiec. 47#1Ngt 6:1-38Foracngoc, imoc yengenaoc kpac, Salomongo Anutuac womong memiec. 48Engenatoa yeng ine ngic yeneng womong mong maringo memea, ihai tacyac mi angande. Profete mongngo enacyoac yofinoc deec,

49‘Ngictau tatacna imoc kurumeng nga bangec imocngo titiserina, Kebungo ifi dede. Ngeneng amatatacna mong menenggec imoc ine mi ngereeude amma fefe monggac manau tacnegembade, imoc obohoude. 50Foracngoc, ni marinango wiac sasawa meficgedarai.’ ” (Yes 66:1-2)

Stefano kpehomegec

51 # Yes 63:10 “Ngicngac gori goria, ngeni ubakedzacngina fonggo fonggoya, kisicfocngina yeni Tiri Asu deendema ammikecgec, ngeni ifingoc ifi andae. 52#Mat 23:31Kisicfocngina yeni profete sasawa yunukporac ayemmegec. Profete yeneng dindingac mingina fingecbesandeac kpefingyoac degec nga ngeneac kisicfocngina yenennoc yenahafoc profete imoc yunugec. Kecma Ngic Dindingac yengena fingeru ngenennoc doc mema ye kpehomegec. 53Ngeni angeroac enacfunac dedeseriyoac megec nga imoc ine sifu wagec.”

54Stefanongo yoac ifi edeyunuu negemma wosonginau meu yeni herebu kuneng negemma yearubigeng fima enacngina kisaranggema nangengngina manganeec. 55#Myeg 110:1Stefano ye ine Tiri Asungo ubeau wakeu kurumennu fiu enu Anutuac kuc kibikperagiau Yesu Anutu foiau nanu henec. Hemma yofi deec, 56#Kol 3:1“Negendae, ni kurumeng anggeu Ngicac Medacngo Anutu foiau nanu henduae.” 57Ifi deu yeni sasawango kpeborongtoa kpema kedzacngina kpefonggema yearu ururunggema kpefahe kpefahe kemma 58taong ngadeau kensikema hocngo ukuma heigec. Ifi amma hepucngic yeni ngakpingina herea hesima ngicmedac mong kpara Sauro, yeac haniu guruhegec.

59Guruhema Stefano hocngo heigec yeng yofi dema numuec, “O Kebu Yesu, ge ubaongana mena.” 60#Ruk 23:34ifi dema fafoc heima arohoma kpacma deec, “Kebu ge kopocsicngina yomoc wayemmena.” ifi dema homeec. Homeu Saurongo faka imocac negenu ngereec.

Currently Selected:

Aposoro 7: Ded

Highlight

Copy