San Mateo 15

Ni kaxtnoꞌo Jesús nagua saꞌa tneꞌe ña jin ñayiu

1Yun te ni ka jintnaꞌa ña tee ka skuaꞌa Ley Moisés vi tee ka kuu fariseo ja vajikuei de ndee Jerusalén jin Jesús, te ka jiñaꞌa de:

2͏―͏¿Nau ja tu ka jantnoꞌo tee ka skuaꞌa jin ni, ja vi tavaꞌa de nagua costumbre ja ni ka jakin ndi nijaꞌnuo? Chi tu ka skunkuu de costumbre ja vi ndaꞌa de, te saa vi kaa de xtaa ͏―͏ka jiñaꞌa de.

3Yun te ni jikan tnoꞌo ña ya:

͏―͏¿Te nau ja suni ka jisokava maa ni nagua ni tatnuni ia Dios, te saa costumbre maa ni ka ndikin ni? 4Chi tatnuni ia Dios, te kachi ya: “Kuanyuꞌu kuandetu nuu tata ron vi nuu nana ron”, te “Na in kaꞌan neꞌe jin tatai axi nanai, te vi na kui” kachi ia Dios. 5Su maa ni, chi ka kaꞌan ni: “Ja kuu kaꞌan in seꞌe nuu tata de axi nuu nana de: Ma kuu chituu ña san, chi ja ni soko san ndiꞌi ja nevaꞌa san nuu ia Dios”. 6Te ñayiu kaꞌan siun, chi tu janyuꞌu jandetu kai nuu tatai ni nuu nanai. Te ja siun ka saꞌa ni, te ka jisokava ni tnoꞌo ni tatnuni ia Dios jin costumbre ni. 7Seꞌe ndijani ini, nase guaꞌa ni kaꞌan Isaías ja jaꞌa ni ndee janaꞌa nuu ni kaꞌan de:

8Ñayiu ñuu yaꞌa, chi jin yuꞌi ka chiñuꞌu ñai,

su anui, chi jika ndevaꞌa ka oo nuu rin.

9Te tu jiniuꞌu ja ka chiñuꞌu ñai,

chi ka kaxtnoꞌi ninoꞌo ni tnoꞌo ja ka tatnuni ñayiu ñuyiu,

kachi ia Dios ͏―͏jiñaꞌa ya.

10Yun te ni ndakana ya ñayiu kuaꞌa yun, te jiñaꞌa ya:

͏―͏Vi konini ni, te jinkuiꞌnu ini ni. 11Chi masu ja makee yuꞌu in tee kuu ja saꞌa tneꞌe ña, chi ja makana yuꞌu de kuu ja saꞌa tneꞌe ña jin de.

12Yun te ni ka nutnaꞌa ña tee ka skuaꞌa jin ya, te ka jiñaꞌa de:

͏―͏¿A jini ni ja ni ka kiti ini tee ka kuu fariseo nuu ni ka onini de ja siun ni kaꞌan ni? ͏―͏ka jiñaꞌa de.

13Yun te jiñaꞌa ya:

͏―͏Ndiꞌi yutnu kuii ja masu maa Tata Dios san, ia oo ndee andivi, ni xtee tnu, te vi tnoꞌo tnu jin ndee yoꞌo tnu. 14Te yun kuu ja vi kokuu maa maa de, chi tee kuaa ka kuu de ja ka ndikin ña sava ka tee kuaa. Chi nuu na in tee kuaa kondikin ña jin inka tee kuaa yun, te vi in ni nuu yau vi junkuei nduu de ͏―͏jiñaꞌa ya.

15Yun te jiñaꞌa Pedro nuu ya:

͏―͏Kaxtnoꞌo kaji ni joo naxa kei tnoꞌo jioniꞌni ni kaꞌan ni yun ͏―͏jiñaꞌa de.

16Yun te jiñaꞌa Jesús:

͏―͏¿A vi suni tu ka jinkuiꞌnu ini maa ni? 17¿A tu ka jinkuiꞌnu ini ni ja ndiꞌi ja makee yuꞌo, te yaꞌa kuaꞌan ndee jiti kaꞌnu, te saa kee kuaꞌan ja kuu siin nuu yiki kuñuo? 18Te ja tnoꞌo kaꞌon jin yuꞌo, chi makana ndee anuo, te yaꞌa kuu ja saꞌa tneꞌe ña jion. 19Chi ndee anu ñayiu makana ja ndakani kueꞌe ini vi ja kaꞌni ndiyi, vi ja skindee tnaꞌi, vi ja kuu kuechi jin inka ñayiu, vi ja suꞌi, vi ja kaꞌin tnoꞌo tnoꞌo siki ñayiu, vi ja nani ñayiu. 20Te ndiꞌi yaꞌa kuu ja saꞌa tneꞌe ña jin ñayiu, su masu ja tu skunkui ja ndaꞌi nuu jai xtaa. Yun chi tu saꞌa tneꞌe ña jin ñayiu ͏―͏jiñaꞌa ya.

Ni kandija guaꞌa in ñaꞌa ñuu Canaán

21Yun te ni kee Jesús, te kuaꞌan ya nuu ñuꞌu ja tnii ñuu Tiro vi ñuu Sidón. 22Te yun ni kenta in ñaꞌa tatatnoꞌo Canaán ja ni kee ña kuaꞌan ña nuu kuaꞌan Jesús, te kana jaa ña jiñaꞌa ña:

͏―͏Jitoꞌo san, ndikin tata ndee David, kundaꞌu ini ña ni jin san, chi ñuꞌu ña tachi jin sesiꞌi san, te kaꞌu ndevaꞌa saꞌa ña.

23Su Jesús, chi tu ni kaꞌan saꞌun ya ja kana ña. Yun te ni ka kuyatni tee ka skuaꞌa jin ya, te ka jikantaꞌu de:

͏―͏Kuñaꞌa ni ñaꞌa yun na noꞌo ña, chi kana kana ña ndikin ña ña vaji ña.

24Te jiñaꞌa ya nuu ñasiꞌi yun:

͏―͏Dios ni tetniuu ña jin san ja vaji san nuu maintnoꞌo ni ñayiu Israel, chi ka kui na kuinio ndikachi ni ka ndoñuꞌu.

25Yun te ni jintnaꞌa ña jin ya, te ni jinkuiin jiti ña nuu ya, te jiñaꞌa ña:

͏―͏Jitoꞌo san, tanundaꞌa ni chituu ña ni.

26Yun te ni kaꞌan jioniꞌni ya, te jiñaꞌa ya:

͏―͏Masu vatuka kuu ja kindeo xtaa nuu seꞌo, te kuñaꞌo nuu tiꞌina kueli.

27Yun te jiñaꞌa ña:

͏―͏Vatuka kuu, vi Jitoꞌo san. Su vi ndee tiꞌina kueli yun, te ka jaa ti yuchi xtaa ja junkuei chii mesa jitoꞌo ti.

28Yun te jiñaꞌa Jesús:

͏―͏Nase guaguaꞌa kandija ni, vi xixi. Te saa na kokuu nagua jikan maa ni.

Te vi maa ore saa ni nduvaꞌa sesiꞌi ña.

Ni ndasaꞌa Jesús kuaꞌa ñayiu ka kuꞌu

29Yun te ni yaꞌa Jesús yun, te kuaꞌan ya ja ni jino ya yuꞌu ndute mar Galilea. Te ni kaa ya in nuu tinduu, te ni jinkoo ya yun. 30Yun te ni jinokuei kuaꞌa ñayiu ja ni ka jinsiaꞌa ñayiu ka kuꞌu siꞌin vi ñayiu ka kuꞌu nuu vi ñayiu ka kuu ñiꞌi vi ñayiu chikundu vi ñayiu ka kuꞌu sava ka nuu kueꞌe. Te ni ka jinsiaꞌa ñayiu yun nuu Jesús, te ndiꞌi ni ndasaꞌa ña ya. 31Te vi ni ka saꞌu kuii kuiti ini ñayiu yun ka ndiaꞌa ja ni kuu ka ndakaꞌan ñiꞌi, vi ni ka nduvaꞌa ñayiu tikundu, vi ni ka ndakaka ñayiu ña ni okuu vi kaka, vi ni kuu ka ndiaꞌa ñayiu tu ni okuu vi kondiaꞌa. Te ndiꞌi kuiti ñayiu ni ka ndakuantaꞌu nuu ia Dios ñayiu Israel.

Ni jiñaꞌa Jesús ja ni ka jaa kuun mil teyii

32Yun te ni ndakana Jesús tee ka skuaꞌa jin ya, te jiñaꞌa ya:

͏―͏Kundaꞌu ini san ñayiu yaꞌa, chi ja ni kuu uni kiuu ka oi jion yaꞌa, te tu nagua ka nevaꞌi ja vi kai. Te tu kuini san ja ndatetniuu san jin ja noꞌokuei, chi tu nagua ka jai, te kana saa vi kuitai ichi noꞌokuei ͏―͏jiñaꞌa ya.

33Yun te ka jiñaꞌa tee ka skuaꞌa jin ya:

͏―͏¿Su ndenu vi niꞌo xtaa ja vi kaa ñayiu yaꞌa? Te tu na veꞌe oo nuu ka oo yaꞌa, vi kuaꞌa ndevaꞌi ka kuu.

34Yun te ni jikan tnoꞌo ña ya:

͏―͏¿Nasaa xtaa ka nevaꞌa ni?

Te ka jiñaꞌa de:

͏―͏Uja ni xtaa, te ndee saa ni chiaka kueli.

35Yun te ni jiñaꞌa ya nuu ñayiu kuaꞌa yun ja vi jinkoi nuu ñuꞌu yun. 36Te ni tnii ya uja xtaa yun vi ndee saa chiaka yun, te ni ndakuantaꞌu ya nuu ia Dios, te ni jaꞌnde ya xtaa yun, te ni jiñaꞌa ya nuu tee ka skuaꞌa jin ya, te maa de ni ka skaka nuu ñayiu kuaꞌa yun. 37Te ndiꞌi ñayiu ni ka jaa vi ndee ni ka ndutu chii. Te ka ndaxtutu de yuꞌu xtaa ja ni ndoo, te ni ndachitu uja chika. 38Te tee ni ka jaa yun ka kuu kuun mil teyii, te tu ni ka kaꞌu de ñasiꞌi vi chikueli. 39Yun te saa ni ndaxtute ya ñayiu yun, te ni ndee ya nuu in barco, te kuaꞌan ya taka ñuu ja tnii Magdala.

Currently Selected:

San Mateo 15: xtnNTplus

Highlight

Copy