San Mateo 13

Ni kaꞌan jioniꞌni Jesús ja jaꞌa in tee siagua ndikin tata

1Te kiuu yun ni kee Jesús veꞌe, te kuaꞌan ya ja ni jino ya yuꞌu ndute mar, te yun ni jinkoo ya. 2Yun te ni ka kututu kuakuaꞌa ñayiu, guaa ni kaa ya nuu in barco, te ni jinkoo ya. Te ndiꞌi ñayiu ka oo yuꞌu ndute yun. 3Yun te ni kaꞌan ya kuaꞌa tnoꞌo jioniꞌni, te jiñaꞌa ya:

͏―͏In kiuu ni kee in tee kuaꞌan ja siagua de ndikin tata. 4Te nini siagua de, te sava ndikin tata yun ni junkuei yuꞌu ichi, te ni kikuei tisala, te ni ka jaa ti. 5Te sava ni junkuei nuu ñuꞌu yuu, nuu tu na ñuꞌu oo guaꞌa, te vi yachi ni jite, chi tu ni jinkisaꞌu kokin ñuꞌu. 6Su nuu ni jinonta nikandii, te ni teñuꞌu ña, te ni yichi, chi tu oo kunu yoꞌo. 7Te sava ndikin tata yun ni junkuei nuu tnu iñu, te ni ka jaꞌnu tnu iñu yun, te ni ka chikati ña. 8Te sava ni junkuei nuu ñuꞌu guaꞌa ñuꞌu kokin nuu ni kee in ciento ja invaa ndikin tata vi sava uni xiko vi sava oko uxi. 9Te na in oo soꞌo ja konini, te na konini ͏―͏jiñaꞌa ya.

Ni kaxtnoꞌo Jesús naxa kei tnoꞌo jioniꞌni yun

10Yun te ni ka kuyatni tee ka skuaꞌa jin ya, te ka jiñaꞌa de:

͏―͏¿Su nau ja ninoꞌo tnoꞌo jioniꞌni kaꞌan ni?

11Yun te jiñaꞌa ya:

͏―͏Su nuu maa ni, chi kaxtnoꞌo kaji ia Dios tnoꞌo yiyuꞌu naxa tatnuni ya ndee andivi, su nuu tee yun, chi tuu. 12Chi na in nevaꞌa, te niꞌi kuaꞌa kai ja konevaꞌa kuaꞌi. Te na in tu nagua nevaꞌa, te vi ndee joo luluu ja nevaꞌi, te ndondee. 13Te yun kuu ja kaꞌan san tnoꞌo jioniꞌni. Chi visi ka ndiaꞌa de te ma vi kuni de, te visi ka nini de jin soꞌo de, te ma vi jinkuiꞌnu ini de. 14Saa ni ka ndoꞌo de, nagua ja skunkuu tnoꞌo ni kaꞌan Isaías, tee ni ndakani tnoꞌo ia Dios ndee janaꞌa, nuu jiñaꞌa de:

Su visi na vi konini ron jin soꞌo ron, su ma vi jinkuiꞌnu ini ron.

Te visi na vi kondiaꞌa ron jin nuu ron, su ma vi kuni saꞌun ron.

15Chi ni ka kundee ndevaꞌa ini anu ñayiu ñuu yaꞌa,

te ña ka jaan vi konini guaꞌa,

te ni ka jasi nduchi nuu,

nagua ja ma vi kuni jin nduchi nuu,

te ma vi konini jin soꞌo,

te ma vi jinkuiꞌnu ini jin anu,

te ma vi ndatnaꞌu ini te ndasaꞌa rin jin.

Ni tee Isaías.

16’Su na taꞌu na ndetu maa ni, chi ka nevaꞌa ni nduchi nuu ni ja ka ndiaꞌa ni, vi soꞌo ni ja ka nini ni. 17Chi kaꞌan ndaa ndija san ja kuaꞌa tee ni ka ndakani tnoꞌo ia Dios ndee janaꞌa vi ñayiu ka saꞌa ndaa, chi ni ka ndioo ini de ja vi kondiaꞌa de nagua ka ndiaꞌa ni, su tu ni kuu vi kondiaꞌa de. Te suni ka ndioo ini de ja vi konini de nagua ka nini ni, su tu ni kuu vi konini de.

18’Nuu saa te vi konini ni naxa kei tnoꞌo jioniꞌni ja jaꞌa tee siagua ndikin tata yun. 19Na ñayiu nini tnoꞌo vaꞌa naxa tatnuni ia Dios, te tu jinkuiꞌnu ini, te ñayiu yaꞌa kuu na kuinio ndikin tata ja ni junkuei yuꞌu ichi. Chi ni kii Tachi, te ni xtajioo tnoꞌo vaꞌa ia Dios ja ni ka skute ini anui. 20Te ndikin tata ni junkuei nuu ñuꞌu yuu, kuu ñayiu nini tnoꞌo vaꞌa ia Dios, te kusii ndevaꞌa ini jantaꞌui. 21Su masu kunu oo yoꞌo maa, te joo ni te yichi. Yun kuu ñayiu nuu tnaꞌi tnundoꞌo axi ka kaꞌan uꞌu ña ñayiu jin ja jaꞌa tnoꞌo ia Dios, te ndakaka yatai. 22Te ndikin tata ni junkuei nuu tnu iñu, kuu ñayiu nini tnoꞌo vaꞌa ia Dios, su ndioo ndevaꞌa ini ja oo ñuyiu yaꞌa vi xndaꞌu ña ja kuu kuikai. Te ndiꞌi yaꞌa kuu ja ni chikati ña tnoꞌo yaꞌa, te ni saꞌa ñaꞌmai. 23Su ndikin tata ni junkuei nuu ñuꞌu guaꞌa ñuꞌu kokin, kuu ñayiu nini tnoꞌo vaꞌa ia Dios, te jinkuiꞌnu ini. Te ñayiu yaꞌa kuu na kuinio in ndikin tata ja kee in ciento vi sava uni xiko vi sava oko uxi ja invaa ni ndikin tata yun ͏―͏jiñaꞌa ya.

Ni kaꞌan jioniꞌni Jesús ja jaꞌa yuku kueꞌe ja ni nana neꞌu triu

24Yun te ni kaꞌan Jesús inka tnoꞌo jioniꞌni, te jiñaꞌa ya:

͏―͏Nuu tatnuni ia Dios ndee andivi kuu ja skintnaꞌa san jin in tee jate ndikin tata guaꞌa nuu ñuꞌu maa de. 25Su nuu ni ka kixin ndiꞌi tee ka satniuu jin de, te ni kii tee jaxin tnaꞌa jin de, te ni jate de ndikin yuku kueꞌe ja kaa inuu jin triu, te kuaꞌan. 26Su nuu ni jite triu yun, te ni kuu yoko, te suni ni jaꞌnu yuku kueꞌe yun. 27Yun te ni jaꞌankuei tee ka satniuu yun nuu tee xiin triu yun, te ka jiñaꞌa de: “Jitoꞌo san, ¿xaan masu ni jate ni triu tata guaꞌa nuu ñuꞌu ni? ¿Te nau ja saa yuku kueꞌe oo?” 28Te jiñaꞌa tee xiin triu yun: “Ndee in tee ka jaxin tnaꞌa jin san ni saꞌa siun”. Te ka jiñaꞌa tee ka satniuu yun: “¿A kuini ni ja kiꞌinkuei san, te na vi tnoꞌo san yuku kueꞌe yun?” 29Yun te jiñaꞌa tee xiin triu yun: “Ñaꞌa, chi kana saa nuu ka tnoꞌo ni yuku kueꞌe yun, te kuu sanaa saa triu yun vi tnoꞌo ni. 30Guaꞌa ka kuu ja vi kuandetu ni na vi kuaꞌnu nduu mai saa ndee kiuu teꞌnde triu, saa na tetniuu san tee ka satniuu nuu san ja vi kaꞌnde de xtnañuꞌu ka yuku kueꞌe yun, te vi xtutu de, te vi saꞌa nuꞌni de, te vi teñuꞌu de. Saa te vi ndaxtutu de triu san, te vi tavaꞌa de nuu koo vaꞌa”, jiñaꞌa tee xiin triu yun ͏―͏jiñaꞌa Jesús.

Ni kaxtnoꞌo Jesús naxa saꞌa in ndikin yuku stancia

31Yun te ni kaꞌan jioniꞌni Jesús, te jiñaꞌa ya:

͏―͏Nuu tatnuni ia Dios ndee andivi kuu ja skintnaꞌa san jin in ndikin yuku stansia ja ni skute in tee nuu ñuꞌu de. 32Vi ja ndaa ja in ndikin luluu ni kuu nuu sava ka ndikin yuku. Su nuu kuu kaꞌnu, te jaꞌnu ka saa sava ka yuku kuii. Te kuu in yutnu kaꞌnu nuu jinokuei tisala, te ka tnaa ti taka ti nuu ndaꞌa tnu yun ͏―͏jiñaꞌa ya.

Ni kaꞌan jioniꞌni Jesús ja jaꞌa levadura

33Yun te ni kaꞌan jioniꞌni tuku ya inka tnoꞌo, te jiñaꞌa ya:

͏―͏Nuu tatnuni ia Dios ndee andivi kuu ja skintnaꞌa inuu san jin levadura ja ni kiꞌin in ñasiꞌi, te ni saka ña nuu uni tijaꞌan yujan triu, vi guaa ndee ni kiuu ndoꞌo ndiꞌi yujan yun.

Ni kaxtnoꞌo Jesús ninoꞌo tnoꞌo jioniꞌni

34Ndiꞌi tnoꞌo yaꞌa ni kaꞌan jioniꞌni Jesús nuu ñayiu. Te ndimaa ni tnoꞌo jioniꞌni ni okaxtnoꞌo ya nuu ñayiu, 35nagua ja skunkuu tnoꞌo ni kaꞌan tee ni ndakani tnoꞌo ia Dios ndee janaꞌa nuu jiñaꞌa de:

Kaꞌan rin tnoꞌo jioniꞌni,

te kaxtnoꞌo rin ndiꞌi ja ni oyuꞌu,

guaa ndee nuu ni jinkoo ñuyiu yaꞌa,

kachi tutu ii.

Ni kaxtnoꞌo Jesús naxa kei tnoꞌo jioniꞌni ja ni kaꞌan ya ja jaꞌa yuku kueꞌe

36Yun te ni ndakuantaꞌu Jesús ñayiu yun ja kuanoꞌokuei, te ni kiuu ya veꞌe yun. Te ni ka kuyatni tee ka skuaꞌa jin ya, te ka jiñaꞌa de:

͏―͏Kaxtnoꞌo ni naxa kei tnoꞌo jioniꞌni ni kaꞌan ni jin yuku kueꞌe ja oo nuu ñuꞌu jitu yun.

37Te jiñaꞌa ya:

͏―͏Tee jate ndikin tata guaꞌa kuu maa san ja kuu san Seꞌe Teyii. 38Te ñuꞌu yun kuu ñuyiu yaꞌa. Te ndikin tata guaꞌa yun ka kuu ñayiu ka jantnoꞌo naxa tatnuni ia Dios. Te yuku kueꞌe yun ka kuu ñayiu ka ndikin jakueꞌe ja kuu Tachi. 39Te ja jaxin tnaꞌa jin tee jitu yun, kuu ja ni jate ndikin kueꞌe, te suu kuu Tachi. Te kiuu ndututu triu yun kuu kiuu ndiꞌi ñuyiu yaꞌa. Te tee ni ka jaꞌnde yun ka kuu ia ka jinokuechi nuu maa ia Dios. 40Te vi nagua ka saꞌa ja ka tnoꞌo yuku kueꞌe yun, te ka tnaa nuu ñuꞌu, saa kokuu kiuu ndiꞌi ñuyiu yaꞌa. 41Chi tetniuu maa san ja kuu san Seꞌe Teyii, ia ka jinokuechi nuu san, te vi ndaxtutu nuu tatnuni san ndiꞌi ñayiu ka saꞌa ja junkuei sava ka ñayiu nuu yika kuechi vi ndiꞌi ñayiu ka saꞌa jakueꞌe. 42Te vi tnaa ña ya nuu jitnu ja vi kai koko koko. Te yun vi kondaꞌi vi kokana, te vi ndakaꞌñi noꞌo. 43Yun te vi yeꞌe ndiꞌi ñayiu ka saꞌa ndaa, na kuinio nikandii nuu tatnuni Tata Dios. Na in oo soꞌo ja konini, te na konini.

Ni skintnaꞌa Jesús in jatnu xuꞌun ja yiyuꞌu

44’Suni nuu tatnuni ia Dios ndee andivi kuu inuu jin in jatnu xuꞌun ja yiyuꞌu chii ñuꞌu in nuu ñundeꞌi. Te ni ndaniꞌi in tee, te ni ndatayuꞌu ii ni de. Te vi ja kusii ini de, te ni jaꞌan de ni xiko ndiꞌi de nagua nevaꞌa de, te ni ndakiꞌin de ñundeꞌi yun.

Ni kaꞌan jioniꞌni Jesús ja jaꞌa in yuu yaꞌu ndevaꞌa

45’Te suni nuu tatnuni ia Dios ndee andivi kuu inuu jin in tee kiꞌin ndatniuu vi ndaxiko de, te nduku de yuu yaꞌu nani perla. 46Te nuu ni niꞌi de in yuu yaꞌu ndevaꞌa yun, te ni jaꞌan de, te ni ndaxiko ndiꞌi de ja nevaꞌa de, te ni ndakiꞌin de yuu yaꞌu ndevaꞌa yun.

Ni kaꞌan jioniꞌni Jesús in ñunu ja ka tau chiaka

47’Te nuu tatnuni ia Dios ndee andivi kuu inuu jin in ñunu ja ka skee tee nuu ndute mar, te ka tau de ndinuu nuu chiaka. 48Te nuu ni chitu ñunu yun, te ka ndatau de yuꞌu ndute. Yun te ka jinkoo de ka ndakaji de ti. Te kiti guaꞌa ka tnaa de nuu chika, te kiti ja tu oo guaꞌa, ka skana de ti. 49Saa kokuu kiuu ndiꞌi ñuyiu yaꞌa. Chi kikuei ia ka jinokuechi nuu maa Dios, te vi ndakaji ya ñayiu kueꞌe neꞌu ñayiu guaꞌa. 50Te vi tnaa ya ñayiu kueꞌe yun nuu jitnu kai koko koko, te yun vi kondaꞌi vi kokanai, te vi kondakaꞌñi noꞌi ͏―͏jiñaꞌa ya.

Ni skintnaꞌa Jesús in ja jaa vi in ja tuꞌu

51Yun te jikan tnoꞌo ña Jesús:

͏―͏¿A ka jinkuiꞌnu ini ni ndiꞌi tnoꞌo yaꞌa?

Te ka jiñaꞌa tee ka skuaꞌa jin ya:

͏―͏Ka jinkuiꞌnu ini san, vi Jitoꞌo san.

52Yun te jiñaꞌa ya:

͏―͏Ndiꞌi tee ka kaxtnoꞌo Ley ja ni ka kutuaꞌa guaꞌa de naxa tatnuni ia Dios ndee andivi, kuu inuu de jin in tee xiin veꞌe ja jini de keneꞌe de neꞌu jayaꞌu nevaꞌa de ndeja kuu ja jaa vi ja tuꞌu ͏―͏jiñaꞌa ya.

Ni ndajino Jesús ñuu ya Nazaret

53Te nuu ni ndiꞌi ni kaꞌan Jesús tnoꞌo jioniꞌni, te ni kee ya kuaꞌan ya. 54Te nuu ni ndajino ya ñuu ya, te ni kaxtnoꞌo ya ini veꞌe ii sinagoga nuu ñayiu. Yun te vi ni ka saꞌu kuii kuiti ini ñayiu, te ka ndatnoꞌo tnaꞌi:

͏―͏¿Ndenu ni kutuaꞌa suchi yaꞌa tnoꞌo ndichi ja kaꞌin yaꞌa vi tniuu naꞌnu ja saꞌi? 55¿A masu seꞌe tee kuu carpinteru kuu suchi yaꞌa? Te ¿a masu nanai kuu María? Te ñani ka kuu Jacobo, José, Simón vi Judas. 56¿A masu ka oo ndiꞌi kuaꞌi jion? Te ¿ndenu ni niꞌi tnoꞌo ndichi yaꞌa? ͏―͏ka kachi.

57Saa te tu ni ka kuini ja vi kandija ñai jin ya. Su yun te jiñaꞌa Jesús:

͏―͏Ndiꞌi ni nuu ka nee yiñuꞌu ñayiu nuu in tee ndakani tnoꞌo ia Dios. Su ñayiu ñuu maa de vi ñayiu veꞌe de, chi tu ka nee yiñuꞌu nuu de ͏―͏jiñaꞌa ya.

58Yun guaa tu ni saꞌa kuaꞌa ya tniuu naꞌnu yun, chi siun tu ni ka kandija ña ñayiu yun jin ya.

Currently Selected:

San Mateo 13: xtnNTplus

Highlight

Copy