San Lucas 9

Ni tetniuu Jesús ndi uxi uu tee ka skuaꞌa jin ya ja vi kaxtnoꞌo de tnoꞌo ia Dios

1Yun te ni ndaxtutu Jesús ndi uxi uu tee ka skuaꞌa jin ya, te ni skuiso tniuu ña ya, vi ni jiñaꞌa ya jakaꞌnu ya ja vi tau de tachi ka ñuꞌu ña jin ñayiu, vi ja vi ndasaꞌa de ñayiu ka kuꞌu. 2Te ni tetniuu ña ya kuaꞌankuei de ja vi kaxtnoꞌo de tnoꞌo naxa tatnuni ia Dios vi ja vi ndasaꞌa de ñayiu ka kuꞌu. 3Te jiñaꞌa ya:

―Ma vi konee ni ni in ndatniuu ja vi kuantniuu ni nuu ichi, ni yutnu katuu ni, te ni ñunu ni, te ni xtaa, ni xuꞌun, te ni saꞌun ja vi ndasama ni. 4Te ndee ni ñayiu xiin veꞌe jinokuei ni, yun ni vi koo ni ndee ndekuei ni ja kiꞌinkuei ni inka ñuu. 5Te nuu ja ndee in ñuu tu ka kuini ñayiu ja vi kuantaꞌu ñai, te ndekuei ni ñuu yun, te vi kisi ni ñuyaka siꞌin ni, nagua ja na kokuu in seña ja kokaꞌan kuechi siki ñayiu ñuu yun ―jiñaꞌa ya.

6Yun te ni kekuei de ja kuaꞌankuei de taka ñuu ja ka kaxtnoꞌo de tnoꞌo vaꞌa ia Dios nuu ñayiu, vi ni ka ndasaꞌa de ñayiu ka kuꞌu.

Ni jiꞌi Juan, tee ni oskuandute

7Te nuu ni niꞌi tnoꞌo Herodes, tee ni onetniuu ñuu yun, ndiꞌi ja saꞌa Jesús, te tu niꞌi de nagua ndakani ini de, chi ka kaꞌan sava ñayiu: “Ni ndateku Juan neꞌu ndiyi”. 8Te sava ka ñayiu ka kaꞌan ja ni ndenta ndi Elías, te sava kai ka kaꞌan ja ndee in tee ni ondakani tnoꞌo ia Dios ndee janaꞌa kuu ja ni ndateku. 9Yun te jiñaꞌa Herodes:

―Maa san ni tatnuni ja ni ka kindoso yiki xini Juan. ¿Te na in kuu tee yaꞌa ja ka kaꞌan ñayiu siun? ―ni kaꞌan de suaꞌa.

Te yun guaa ni nduku ndee de ja kuni de Jesús.

Ni jiñaꞌa Jesús ja ni ka jaa uꞌun mil teyii

10Nuu ni ka ndajiokuiin tee ni chitniuu Jesús, te ni ka ndakani de nuu ya ndiꞌi ja ni ka saꞌa de ñuu nuu ni jaꞌankuei de yun. Yun te ni keneꞌe siin Jesús ndi uxi uu de, te kuaꞌankuei ya jin de in nuu tu na veꞌe oo ja tnii ñuu Betsaida. 11Su nuu ni ka jini ñayiu ja kuaꞌankuei ya, te ni ka jata ndikin ñai. Te nuu ni jinokuei, te ni jantaꞌu ña ya, te ni kaxtnoꞌo ya naxa tatnuni ia Dios nui vi ni ndasaꞌa ya ñayiu ka kuꞌu. 12Te nuu mañini, te ni ka jintnaꞌa ña ndi uxi uu tee ka skuaꞌa jin ya, te ka jiñaꞌa de:

―Ndaxtute ni ñayiu yaꞌa na kiꞌinkuei taka ñuu kueli ka oo yatni yaꞌa, te na vi ndukui ja vi kai vi nuu vi ndoi, chi siaꞌa tu saꞌun nagua oo nuu ka oo yaꞌa ―ka jiñaꞌa de.

13Te jiñaꞌa Jesús:

―Vi kuñaꞌa maa ni ja vi kaa ñayiu yaꞌa.

Te ka jiñaꞌa de:

―Tu nagua ka nevaꞌa san, chi ndee uꞌun vi ni xtaa jin uu chiaka, te visi na tetniuu ña ni ja kiꞌinkuei san ja vi kuaan san ja vi kaa ndiꞌi ñayiu kuaꞌa yaꞌa, te ma kuu ―ka jiñaꞌa de.

14Te vaa ndee uꞌun mil teyii ka kuu. Su jiñaꞌa Jesús nuu tee ka skuaꞌa jin ya:

―Vi juntaa siin ni uu xiko uxi, uu xiko uxi ñayiu na vi jinkoi ―jiñaꞌa ya.

15Te ni ka saꞌa de nagua ni tatnuni Jesús ja ni ka jinkoo ndiꞌi ñayiu. 16Yun te ni tnii ya ndi uꞌun xtaa jin nduu chiaka yun, te ni ndanenuu ya ichi andivi ja ni ndakuantaꞌu ya nuu ia Dios. Te ni taꞌu ya xtaa yun, te ni jiñaꞌa ya ja ni ka skaka tee ka skuaꞌa jin ya, te ni ka jaa ñayiu. 17Te ndiꞌi ñayiu ni ka jaa guaꞌa ndee ni ka ndutu chii, te ni ka ndaxtutu tee ka skuaꞌa jin ya, te ni ndachitu uxi uu chika yuꞌu xtaa ja ni kendoo yun.

Ni kaꞌan kaji Pedro ja Jesús kuu ia ni tetniuu Dios

18Te in kiuu ni kuu siin Jesús ja ndakuatu maa ni ya, te ka oo ya jin tee ka skuaꞌa jin ya, te ni jikan tnoꞌo ña ya:

―¿Naxa ka kaꞌan ñayiu na in kuu san? ―jiñaꞌa ya.

19Te ka jiñaꞌa de:

―Sava ñayiu ka kaꞌan ja Juan, tee ni oskuandute, kuu ni. Te sava kai ka kaꞌan ja ndi Elías kuu ni, vi sava kai ka kaꞌan ja kuu ni ndee inka tee ni ondakani tnoꞌo ia Dios ndee janaꞌa, te ni ndateku ni vitna, ka kaꞌin ―ka jiñaꞌa de.

20Te ni jikan tnoꞌo ña ya:

―Te maa ni, ¿naxa ka kaꞌan ni, na in kuu san? ―jiñaꞌa ya.

Te jiñaꞌa Pedro:

―Maa ni kuu Kristu, ia ni tetniuu Dios ja skaku niꞌnu ni ñayiu ―jiñaꞌa de.

Ni kaxtnoꞌo Jesús ja kuu ya te ndateku ya

21Su ni tatnuni Jesús ja ma vi kokaꞌan de tnoꞌo yun nuu ni in ñayiu. 22Te jiñaꞌa ya:

―Sein, ja kuu san Seꞌe Teyii, chi nini kuu ja tnaꞌa san kuakuaꞌa tnundoꞌo, chi vi skexiko ña tee ka kuu nijaꞌnu nuu ñuo, vi sutu ka kuu nijaꞌnu, vi tee ka kaxtnoꞌo Ley Moisés, te vi kaꞌni ña de jin san, su nuu uni kiuu, te ndateku san ―jiñaꞌa ya.

23Yun te ni kaꞌan ya jin ndiꞌi ñayiu:

―Nuu ja ndee in ñayiu kuini ja kondikin ña jin san, te na skunai mai, te kuiso siki cruz ja kuu tnundoꞌo in kiuu in kiuu ka, te na kondikin ñai jin san. 24Chi ndiꞌi ñayiu kuini ja skaku niꞌnu mai, te junai. Su ndiꞌi ñayiu ja skunai mai ja jaꞌa sein, te kaku niꞌnui. 25¿Chi nagua jiniuꞌu nuu ñayiu visi na kundee niꞌi ndiꞌi ja oo ñuyiu, te ndoñuꞌi axi skunai mai? 26Chi ñayiu kukanoo nuu san vi nuu tnoꞌo san, te suni kukanoo maa san ja kuu san Seꞌe Teyii nui, kiuu na yeꞌe niꞌnu ja ndenta san jin ja yeꞌe niꞌnu Tata san vi ia ka jinokuechi nuu ya. 27Su kaꞌan ndandaa san ja ka oo ndee saa ñayiu ka oo yaꞌa ja ma vi kui guaa ndee na vi kuni nuu tatnuni ia Dios ―jiñaꞌa ya suaꞌa.

Ni ndasama naxa kaa Jesús

28Te nuu una kiuu ja ni kaꞌan ya tnoꞌo yaꞌa, te ni jaka ya Pedro vi Jacobo vi Juan, te ni kakuei ya jin de in yuku ja ni ndakuatu ya. 29Te vi nini ndakuatu ya, te ni ndasama yunuu ya, te saꞌun niꞌnu ya ni nduyaa, te vi yeyeꞌe nukuiin ya. 30Te vi sanaa ni ka jini de ja ni ka jinkuiin uu tee ni ka oo ndee janaꞌa ja ka ndatnoꞌo de jin ya. In de kuu Moisés te inka de kuu Elías. 31Vi ka yeꞌe niꞌnu kuiti tee yun ka nukuiin de, ka ndatnoꞌo de siki taka tnundoꞌo kuni Jesús kiuu kuu ya Jerusalén. 32Te vi kusun ndevaꞌa Pedro jin uu ka tee yun ka kaꞌan de, su ni ka jandee ini de ni ka ondito de, te ni ka jini de ja ka yeꞌe ka tajan Jesús ka nukuiin ya jin uu ka tee yun. 33Te nuu ni ka kujioo tee yun nuu oo Jesús, te jiñaꞌa Pedro:

―Mastru, guaꞌa kuu ja yaꞌa ka oo san. Te na vi saꞌa san uni veꞌe kuii, in koo maa ni, te in koo Moisés te inka koo Elías ―jiñaꞌa de. Su tu ni jini de nau ja siun ni kaꞌan de.

34Te vi nini ni kaꞌan de siun, te sanaa ni kii in viko, te ni chisaꞌu ña jin de, te ni ka yuꞌu ndevaꞌa de ja ka oo de neꞌu viko yun. 35Te ndee nuu viko yun ni kaꞌan in tnoꞌo, te jiñaꞌa:

―Suchiaꞌa kuu seꞌe maa rin ja kutoo ndevaꞌa rin jin, te vi konini tnoꞌo kaꞌin ―kachi tnoꞌo yun.

36Vi nuu ni ndiꞌi ja ni kaꞌan tnoꞌo yun, te ni ka jini de ja maintnoꞌo ni ka Jesús nukuiin. Su ni ka tavaꞌa de tnoꞌo yun ini anu de. Te tu ni ka kaꞌan de kiuu yun nuu ni in ñayiu ja siun ni ka jini de.

Ni ndasaꞌa Jesús in suchi yii ñuꞌu ña espíritu kueꞌe

37Te kiuu tnee suaꞌa, nuu ni nukuei ya nuu yuku yun, te ni kekuei kuaꞌa ndevaꞌa ñayiu, ni ka nutnaꞌa ña jin Jesús. 38Te neꞌu ñayiu yun ni kana jaa in tee, te jiñaꞌa de:

―Mastru, tanundaꞌa ni kondiaꞌa ni joo seꞌe san ja siaꞌa ndoꞌi, chi invaa suchi yaꞌa nevaꞌa san. 39Chi in espíritu kueꞌe kakuiko ña jin, te vi sanaa ni te saꞌa ja kanai, vi kisi ndevaꞌa ña, te skunee ña, te kee tiꞌiñu yuꞌi, te tu kuini espíritu kueꞌe ja siaa ña. 40Te ja ni jikantaꞌu san nuu sava ka tee ka skuaꞌa jin ni ja vi tanundaꞌa de vi tajioo de espíritu kueꞌe ñuꞌu ña jin seꞌe san, su tu ni kuu ja vi saꞌa de ―jiñaꞌa de.

41Yun te jiñaꞌa Jesús:

―Ñayiu kueꞌe ja tu ka kandija ka kuu ni. ¿Nasaa ka kiuu guaa kundee ini san ja vi koo? Nuu saa te kisiaꞌa ni seꞌe ni yaꞌa ―jiñaꞌa ya.

42Te nuu makuyatni suchi kuꞌu yun nuu oo Jesús, te ni xndonso ña tachi yun ja ni skunee tuku ña. Su ni kaꞌan xeen Jesús jin espíritu tachi yun, te ni kujioo. Saa te ni nduvaꞌa suchi yii yun, te ni ndakuñaꞌa ña ya jin nuu tatai. 43Te ndiꞌi ñayiu ni ka saꞌu kuii kuiti ini nuu ni ka jini jakaꞌnu ndevaꞌa tniuu saꞌa ia Dios.

Ni kaxtnoꞌo tuku Jesús inka jichi ja kuu ya

Te nuu ni ka saꞌu kuii kuiti ini ndiꞌi ñayiu ka ndiaꞌi ja siun ni saꞌa Jesús, te jiñaꞌa ya nuu tee ka skuaꞌa jin ya:

44―Vi konini guaꞌa ni tnoꞌo kaꞌan san, te ma vi ndunaa ini ni, chi kanakau sein ja kuu san Seꞌe Teyii nuu ndaꞌa ñayiu ñuyiu ―jiñaꞌa ya.

45Su tu ni ka jinkuiꞌnu ini de tnoꞌo yaꞌa, chi ni jasi ia Dios jajintnuni de nagua ja ma vi jinkuiꞌnu ini de. Te ka yuꞌu de ja vi kakan tnoꞌo de Jesús ja kaxtnoꞌo ya siki tnoꞌo yaꞌa.

Ni kaxtnoꞌo Jesús na in kuu kaꞌnu ka

46Yun te ni ka jinkondee tee ka skuaꞌa jin Jesús ka tee tnaꞌa de ndee de kuu ja kokuu kaꞌnu ka. 47Te ni jini ya ja siun ka ndakani ini de, te ni tnii ya in suchi luluu, te ni jani ya jin nuu oo ya. 48Te jiñaꞌa ya:

―Nani kuu ñayiu jantaꞌu in suchi luluu ja jaꞌa maa san na kuinio suchi yaꞌa, te jantaꞌu ñai jin maa san. Te nani kuu ñayiu jantaꞌu ña jin maa san, te jantaꞌui ia ni tetniuu ña jin san. Chi ñayiu kuu lule ka neꞌu ndiꞌi maa ni, kuu ñayiu kuu kaꞌnu ka ―jiñaꞌa ya.

Na ñayiu tu ndakoo sikio te chituu ñai jion

49Yun te ni kaꞌan Juan, te jiñaꞌa de:

―Mastru, ni ka jini san in tee ja jin sivi ni, te skunu de tachi ka ñuꞌu ña jin ñayiu. Su tu ni ka jandetu san ja kosaꞌa ka de, chi masu in ni ka skuaꞌo jin de ―jiñaꞌa Juan.

50Te jiñaꞌa Jesús:

―Ma vi kasi niꞌnu ni ja saꞌa de, chi ñayiu ja tu ndakoo sikio, te chituu ñai jion ―jiñaꞌa ya.

Ni kuxeen Jesús nuu Jacobo vi Juan

51Te nuu ni kuyatni kiuu ja noꞌo Jesús andivi, te ni saꞌa ndee ya ini anu ya, te ni kee ya ja kuaꞌan ya Jerusalén. 52Te ni tetniuu ya tee ka yoxnoꞌo nuu ya ja kuaꞌankuei de in ñuu ja tnii Samaria ja vi nduku de veꞌe nuu ndoo ya. 53Su tu ni ka kuini ñayiu Samaria yun ja vi kuantaꞌu ñai, chi ni ka jini ja ichi ñuu Jerusalén kuanoꞌo ya. 54Te nuu ni ka jini Jacobo vi Juan, tee ka skuaꞌa jin ya, ja siun ni kuu, te ka jiñaꞌa de:

―Jitoꞌo san, ¿a kuini ni ja vi tatnunio ja na kuun ñuꞌu ichi andivi, naxa ni saꞌa Elías, te na xnaa ñayiu ñuu yaꞌa? ―ka jiñaꞌa de.

55Su ni jiokuiin Jesús, te ni kuxeen ya nuu de, te jiñaꞌa ya:

―Tu ka jini ni na tnoꞌo ka kaꞌan ni. 56Chi sein ja kuu san Seꞌe Teyii, chi masu vaji san ja xnaa san ñayiu, chi vaji san ja skaku niꞌnu san jin ―jiñaꞌa ya.

Te kuaꞌankuei ya jin de inka ñuu.

Ka kuini ñayiu ja vi kondikin Jesús

57Te ichi nuu kuaꞌankuei ya, ni kaꞌan in tee, te jiñaꞌa de:

―Jitoꞌo san, kondikin ña san jin ni ndee ni nuu ni kuu ja kiꞌin ni.

58Yun te jiñaꞌa Jesús:

―Ñukuii, chi ka oo kava veꞌe ti, saa ni kiti ndagua, chi ka oo taka ti. Su sein ja kuu san Seꞌe Teyii, chi vini nuu kakintuu san xini san, tu nagua nevaꞌa san ―jiñaꞌa ya.

59Te jiñaꞌa ya nuu inka de:

―Kondikin ña ni na kiꞌinkueio.

Te jiñaꞌa tee yun:

―Jitoꞌo san, kondetu ni xtnañuꞌu ka na tayuꞌu san tata yua san, te na kiꞌinkueio ―jiñaꞌa de.

60Te jiñaꞌa Jesús:

―Xndoo ni ndiyi yun na vi tayuꞌu tnaꞌa ndisa ndiyi maa. Te maa ni, kuaꞌan ni te kaxtnoꞌo ni nuu ñayiu tnoꞌo naxa tatnuni ia Dios ―jiñaꞌa ya.

61Te suni jiñaꞌa inka de:

―Jitoꞌo san, sein chi kuini san ja kondikin ña san, su kondetu ni na kiꞌin san xtnañuꞌu ka vi ndakuantaꞌu nuu tnaꞌa san jin ñayiu veꞌe san, te na kii san ―jiñaꞌa de.

62Te jiñaꞌa Jesús:

―Ni in ñayiu ja vi ja ni tnii ndoꞌo arado, te jionenui ichi yatai, chi tu jiniuꞌi ja koi nuu tatnuni ia Dios ―jiñaꞌa ya.

Currently Selected:

San Lucas 9: xtnNTplus

Highlight

Copy