San Lucas 4

Ni jito tnuni ña Tachi jin Jesús

1Nuu ni nana Jesús ini yute Jordán ja ni jandute ya, te ni chitu ña Espíritu ia Dios jin ya, te ni jaka ña Espíritu yun ja kuaꞌan ya ndee nuu ñuꞌu teꞌa. 2Te yun ni oo ya uu xiko kiuu ja ni jito tnuni ña Tachi, te tu saꞌun nagua ni jaa ya ndiꞌi kiuu yun, te nuu kuee ka, te ni kejaꞌa ya kokin ya. 3Yun te jiñaꞌa Tachi yun:

―Nuu ja Seꞌe Dios kuu ron, te tatnuni nuu yuu yaꞌa ja na nduu xtaa, te kaa ron ―jiñaꞌa.

4Te jiñaꞌa Jesús:

―Yoso nuu tutu ii: “Masu maintnoꞌo xtaa kuu ja koteku ñayiu, chi suni jin ndiꞌi tnoꞌo ia Dios kuu ja tekui” ―jiñaꞌa ya.

5Yun te ni jaka ña Tachi yun nuu in yuku sukun ndevaꞌa, te vi nunuu suaꞌa ni, te ni xneꞌe ndiꞌi ñuu oo ninii ñuyiu. 6Te jiñaꞌa Tachi yun:

―Taa rin ndiꞌi jakaꞌnu yaꞌa nuu ron vi ndiꞌi jayiñuꞌu oo nui, chi maa rin ni niꞌi ndiꞌi, te kuñaꞌa rin nuu na ñayiu kuini maa rin ja kuñaꞌa rin. 7Nuu ja na jinkuiin jiti ron nuu rin, te chiñuꞌu ña ron, te taa rin ndiꞌi koo nuu ndaꞌa maa ron ―jiñaꞌa.

8Te jiñaꞌa Jesús:

―Kujioo kuaꞌan, vi Tachi, chi yoso nuu tutu ii: “Maintnoꞌo nuu ia Jitoꞌo Dios ron kuu ja chiñuꞌu ron, te maintnoꞌo nuu maa ya guaa kunukuechi ron”.

9Yun te ni jaka ña Tachi yun ja kuaꞌan ya Jerusalén, te ni skaa ña ndee xtuu veñuꞌu kaꞌnu, te jiñaꞌa:

―Nuu ja ndija ron ja Seꞌe Dios kuu ron, te ndagua yaꞌa makee ndee nuu ñuꞌu, 10chi suni yoso nuu tutu ii:

“Tetniuu Dios ia ka jinokuechi nuu ya ja vi koto ña jin ron”, 11te “vi kotnii ndaꞌa ron, nagua ja ma kachi jaꞌa ron jin ni in yuu”, ―jiñaꞌa.

12Te jiñaꞌa Jesús:

―Kachi nuu tutu ii: “Ma koto tnuni ron Jitoꞌo Dios ron” ―jiñaꞌa ya.

13Te nuu ni ndiꞌi ja ni jito tnuni ña Tachi yun jin Jesús, te ni kujioo ndee saa tiempu.

Ni kejaꞌa Jesús kaxtnoꞌo ya tnoꞌo ia Dios nuu ñayiu ñuu ja tnii Galilea

14Yun te ni ndajiokuiin Jesús ñuu ja tnii Galilea jin jakaꞌnu Espíritu maa ia Dios. Te ni jitenuu tnoꞌo ja teku tnoꞌo ya nii ñuu yun. 15Saa te ni jikanuu ya taka veꞌe ii sinagoga nuu ka ndututu ñayiu judio, te ni kaxtnoꞌo ya tnoꞌo ia Dios, te vi ndiꞌi ñayiu ni ka ndakuantnoꞌo ña ja luu kaxtnoꞌo ya.

16Yun te kuanoꞌo ya ñuu Nazaret nuu ni jaꞌnu ya. Te in kiuu ndatatu ni kiuu ya veꞌe ii sinagoga, nagua ni osaꞌa ya. Te ni ndakoo ya ja kaꞌu ya tutu ii. 17Te ni ka jiñaꞌa de tutu ii ja ni tee Isaías, tee ni ndakani tnoꞌo ia Dios ndee janaꞌa. Te nuu ni jani ya tutu yun, te ni jinkuꞌun ya nuu kaꞌan suaꞌa, te ni kaꞌu ya:

18Espíritu maa ia Dios oo jin san, chi ni saꞌa siin ña ya,

nagua ja ndakani san tnoꞌo vaꞌa ya nuu ñayiu ka kundaꞌu.

Te ni tetniuu ña ya vaji san ja ndasaꞌa san ñayiu ka ndatnaꞌu ini nuu yika kuechi,

vi kana ndoso san ja na vi yaa ñayiu ka oo nuu ndaꞌa ñayiu inka ñuu,

vi ndasaꞌa san ñayiu ka ndesi nuu

vi siaa san ñayiu ka kaꞌan uꞌu ña tnaꞌi.

19Te kaxtnoꞌo san ja vitna kuu kuia ja chindee chituu ña ia Dios jin ñayiu

kachi tutu ni kaꞌu ya.

20Te ni ndaxtuu ya tutu yun, te ni ndakuñaꞌa ya ndaꞌa in tee jinokuechi nuu veꞌe ii yun, te ni jinkoo ya. Yun te vi tu ka yaꞌa nuu ña ndiꞌi ñayiu ka oo yun. 21Te ni jinkondee ya kaꞌan ya:

―Vitna te ni skunkuu tnoꞌo yoso nuu tutu ii yaꞌa ja ni ka onini ndiꞌi ni ―jiñaꞌa ya.

22Te ndiꞌi ñayiu ni ka kaꞌan vaꞌa ja jaꞌa ya, te vi ni ka saꞌu kuii kuiti ini ja luu ndevaꞌa kaxtnoꞌo ya. Su ka jikan tnoꞌo tnaꞌi:

―¿A masu seꞌe José kuu suchi yaꞌa? ―ka kachi.

23Te jiñaꞌa Jesús:

―Vatuni vi kaꞌan ni tnoꞌo yaꞌa jin san: “Roon ja tee tatna kuu ron, ndasaꞌa tatna maa ron, vi saꞌa ñuu maa ron yaꞌa ja ni saꞌa ron Capernaúm ka kaꞌan ñayiu, te vi kandija ña rin”, vi kachi ni suaꞌa.

24Te jiñaꞌa ka ya:

―Kaꞌan ndaa san ja ni in tee ndakani tnoꞌo ia Dios, tu ka jantaꞌu ña ñayiu ñuu maa de. 25Te kaꞌan ndaa san, ja tiempu ni oo Elías, tee ni ndakani tnoꞌo ia Dios, ni ka oo kuaꞌa ñaꞌa ni ka ndondaꞌu ñuu mao Israel yaꞌa, na tu ni kuun saꞌun sau nuu uni kuia yosava, te ni oo ndevaꞌa tnama, 26su tu ni tetniuu ña ia Dios jin Elías ja kii de chituu de ñaꞌa ñuu mao Israel, chi saa suaꞌa ñaꞌa inka ñuu ja ni oo ñuu Sarepta ja tnii Sidón, yun ni jaꞌan de ni chituu ña de. 27Suni saa ni tiempu na ni oo Eliseo, tee ni ndakani tnoꞌo ia Dios, suni ni ka oo kuaꞌa ñayiu ñuu mao ni ka okuꞌu kueꞌe ndiꞌyi teꞌi. Te vini in tu ni nduvaꞌa, chi saa suaꞌa in tee ñuu Siria nani Naamán kuu ja ni nduvaꞌa ―jiñaꞌa Jesús.

28Te nuu ni ka onini tnoꞌo yaꞌa, te ni ka kiti ini ndiꞌi ñayiu ni ka ndututu veꞌe ii sinagoga yun. 29Te ni ndontakuei ja ni ka keneꞌe ndaꞌa ñai. Te kuaꞌankuei jin ya ndee xtuu yuku nuu kaa maa ñuu yun, ja vi skanakau ñai. 30Su tuu, chi vi neꞌu ndiꞌi ñayiu yun ni yaꞌa ya, te kuaꞌan ya.

Ni ndasaꞌa Jesús in tee ñuꞌu ña espíritu kueꞌe

31Yun te kuaꞌan Jesús ñuu Capernaúm ja tnii Galilea. Te ni okaxtnoꞌo ya tnoꞌo ia Dios nuu ñayiu kiuu ndatatu. 32Te vi ni ka saꞌu kuii kuiti ini ñayiu ka nini tnoꞌo kaxtnoꞌo ya, chi kaꞌan ya jin tnoꞌo ja ndiso tniuu ya.

33Te ini veꞌe ii sinagoga yun oo in tee ñuꞌu ña espíritu tneꞌe ja kuu espíritu tachi, te vi sanaa ni kana jaa, 34te jiñaꞌa:

―Xndendoo ña. ¿Nagua kuini ron ja vaji ron nuu ka oo rin, vi Jesús, tee ñuu Nazaret? ¿A vaji ron ja xnaa ña ron jin rin? Te ja jini ña rin jin ron, chi ia ni tetniuu Dios kuu ron ―jiñaꞌa suaꞌa.

35Te ni kaꞌan xeen Jesús nuu espíritu tachi yun, te jiñaꞌa ya:

―Kasi yuꞌu, te kee kuaꞌan ―jiñaꞌa ya.

Yun te ni xndonso ña espíritu tachi jin tee yun jin nuu ndiꞌi ñayiu yun, te ni kee kuaꞌan. Te tu ka nagua ni saꞌa ña. 36Te ndiꞌi ñayiu ni ka saꞌu kuii kuiti ini ja siun ni kuu, te ni ka jinkondei ka jikan tnoꞌo tnaꞌi:

―¿Na tnoꞌo kuu tnoꞌo yaꞌa ja vi jin tniuu nee tee yaꞌa vi jin jakaꞌnu tatnuni de nuu espíritu tachi ja na kujioo, te ni kee kuaꞌan? ―ka kachi.

37Te ni jitenuu tnoꞌo ja teku tnoꞌo Jesús ndiꞌi ni ñuu yatni yun.

Ni ndasaꞌa Jesús nana xiso Simón Pedro

38Yun te ni ndee Jesús veꞌe ii sinagoga, te kuaꞌan ya ja ni kenta ya veꞌe Simón. Te katuu nana xiso de kuꞌu kaꞌu ndevaꞌa ña jin kueꞌe kiji, te ni ka kaꞌan ndaꞌu de ja na chituu ya jin ña. 39Yun te ni chindei ya xini ya ichi nuu katuu ña, te ni kaꞌan xeen ya jin kueꞌe yun ja na kujioo. Te vi ore saa, ni nduvaꞌa ña, te ni ndakoo ña ni saꞌa ña ja ni ka jaa ya.

Ni ndasaꞌa Jesús kuaꞌa ñayiu ka kuꞌu

40Te nuu ni jinkoxnee nikandii, vi nasaa natuꞌu ñayiu ni jinokuei jin ñayiu kuꞌu ndiꞌi nuu kueꞌe, te ni sonee ya ndaꞌa ya siki in in, te ni ndasaꞌa ña ya. 41Te suni ni kanakuei ña espíritu tachi jin kuaꞌa ñayiu, te ni ka jinkondee ka kana:

―Roon, chi Seꞌe Dios kuu ron ―ka jiñaꞌa.

Su ni kaꞌan xeen Jesús, te tu ni jandetu ya ja vi kaꞌan, chi ja ka jini ja maa ya kuu Kristu, ia ni tetniuu Dios.

Ni jiondita Jesús kaxtnoꞌo ya nuu ñayiu nii ñuu ja tnii Galilea

42Yun te nuu ni tuu inka kiuu, te ni kee ya kuaꞌan ya nuu tu na ñayiu ka oo. Su ni ka ndanduku ña ñayiu, te nuu ni jinokuei nuu oo ya, te ni ka junkani ñai ja ma kiꞌin ya. 43Su yun te jiñaꞌa ya:

―Tuu, chi suni nini kuu ja kiꞌin san sava ka ñuu ja kaxtnoꞌo san nuu ñayiu naxa tatnuni ia Dios, chi tniuu yun ni tetniuu ña ya ja vaji san ―jiñaꞌa ya suaꞌa.

44Te kuaꞌan ya ja ni jiondita ya taka veꞌe ii sinagoga ka oo nii ñuu ja tnii Galilea, te ni kaxtnoꞌo ya nuu ñayiu.

Currently Selected:

San Lucas 4: xtnNTplus

Highlight

Copy