MAT 18
18
Mɔɔ mɛn ye ɲɛmɔɔ ri Harijeene Mansaya rɔ
1Nba, waati wo rɔ, karandenilu ka ii madon Isa la, ka a maɲininka ko: «Yon ye ɲɛmɔɔ ri Harijeene Mansaya rɔ?» 2Isa ka den do kili, ka wo lalɔ ii tɛma, 3ka a fɔ ii yɛ ko: «N di tuɲa fɔ ai yɛ: ni ai ma ai sɔn yɛlɛman ka kɛ ikomin denninilu, ai tɛna donna Harijeene Mansaya rɔ. 4Mɔɔ mɛn wa a jɛrɛ fanmajii ka kɛ ikomin denni ɲin, wo tii le ye ɲɛmɔɔ ri Harijeene Mansaya rɔ. 5Ni mɔɔ mɛn sɔnda ka denni ɲin ɲɔɔn mira koɲuma nde kosɔn, wo tii ra n jɛrɛ le mira wo ri.
Kundatiɲan ko
6«Den mɛnilu lemɛniyani n ma ɲin di, ni mɔɔ do kɛra sababu ri ka woilu kɛ kojuu kɛla ri, a ka fisa ko kabakurun belebeleba ye sidi wo tii kan na ka a lafili kɔɔji dun ba rɔ. 7Gbalo ye dunuɲa mɔɔilu yɛ ka a masɔrɔn ko mɛnilu ye mɔɔilu bilala juulumun dɔ a fɛrɛ ti ye fɔɔ wo ko suilu ye kɛ le kɔni ii ye farala mɔɔ mɛnilu la, gbalo ye wo tiilu yɛ!
8«Ni i bolo kelen wala i sen kelen ye kɛla sababu ri ka i lɔ kojuu kɛla don? I ye wo tɛɛ a la ka a bɔ ye, baa ni i fɛɛtɔ wala i senkelen donda ɲenemaya jɛrɛ jɛrɛ rɔ, wo ka fisa i ma sani i bolofilatii wala i senfilatii ye wa don jahanama kɔndɔ, ta sabali ye yɔrɔ mɛn. 9Ni i ɲa kelen ye kɛla sababu ri ka i lɔ kojuu kɛla don? I ye a labɔ ka a lafili, baa ni i ɲakelentii donda ɲenemaya jɛrɛ jɛrɛ rɔ, wo ka fisa i ma sani i ɲafilatii ye lafili jahanama kɔndɔ, ta ye yɔrɔ mɛn.
Saa tununni kuma kɔrɔlama
10-11«Ai ye ai janto ai jɛrɛ rɔ. Ai kana denni ɲinilu si dɔɔya, baa n di a fɔ ai yɛ ko mɛlɛka mɛnilu ye ii jantola ii rɔ, woilu ri se ii madonna n Fa Alla la Harijeene rɔ tuma bɛɛ.#18.10-11 Sɛbɛli kura doilu ka kuma diya 11 bila ɲin ka a fɔ ko: «Baa Mɔɔ Dencɛ nani mɔɔ tununnilu ɲinin kanma ka woilu kisi.»
12A ye di? Ni saa kelen tununda saa kɛmɛ tii ma, a tɛ a tɔ bikɔnɔndɔ ni kɔnɔndɔ to koyinkɛ yɔrɔ rɔ ye ka wa saa tununni ɲinin diya wa? 13N di tuɲa fɔ ai yɛ: ni a ka a yen, a ri sɛwa a la ka tamin a tɔ bikɔnɔndɔ ni kɔnɔndɔ la ko kan, mɛnilu ma tunun a ma. 14Wo ɲa kelen de ma, ai Fa mɛn ye Harijeene rɔ, wo tɛ a fɛ hali dennin ɲinilu kelen pe a ye fɔ a la.
Ni i badenma ka kojuu kɛ
15«Nba, ni i badenma ka kojuu kɛ, i ye wa a tɛrɛn. A ka mɛn kɛ, i ye wo ɲafɔ a yɛ, i kelen a kelen. Ni a sɔnda i la kuma ma, i ni a ri kɛ badenmailu jɛrɛ jɛrɛilu ri ikɔ tuun. 16Kɔni ni a ma sɔn i la kuma ma, i ye mɔɔ kelen wala mɔɔ fila ta, ka wa a tɛrɛn, sa fen fen wa fɔ, woilu bɛɛ ye fɔ sere fila wala sere sawa ɲana.#18.16 A mafɛnɛ Sariyailu sura 19 kuma diya 15. 17Kɔni ni a ka a ban ii la kuma rɔ, i ye ko wo fɔ lemɛniya jama yɛ. Ni a ka a ban dɛkuru wo la kuma rɔ, a ye kɛ i ma ikomin siya gbɛrɛilu wala niisɔnkɔmirala. 18N di tuɲa fɔ ai yɛ: ni ai ka fen fen sidi duukolo kan yan, wo ri sidi sankolo rɔ. Ni ai ka fen fen fulɛn duukolo kan yan, wo ri fulɛn sankolo rɔ fanan.
Mɔɔ fila wa Alla tara
19«N di do la wo kan. Ni ai rɔ mɔɔ fila bɛnda ko do rɔ ka Alla tara a la duukolo kan yan, n Fa Alla mɛn ye sankolo rɔ, a ri wo kɛ ai yɛ, 20baa ni mɔɔ fila wala mɔɔ sawa ka i ɲɔɔn nadɛn n tɔɔ rɔ, n ye ii tɛma ye.»
Baaraden hinabali sanda
21Nba, Piyɛri ka a madon Isa la, ka a maɲininka ko: «Maari, ni n badenma ye kojuu kɛla n na, n ka kan ka a makoto fɔɔ siɲa yɛli? Siɲa wɔrɔnwula wa?» 22Isa ka a jabi: «Ɛɛn, i kana dan siɲa wɔrɔnwula ma. I ye wo tii makoto fɔɔ siɲa biwɔrɔnwula sii diyama wɔrɔnwula.
23«Wo le rɔ, Harijeene Mansaya ye ikomin tariku ɲin. Mansacɛ do tɛrɛ ye ye, mɛn na julu tɛrɛ ye a la baaraden doilu la. A tun ye a fɛ ka wodi ko wo ɲanabɔ. 24A wulira wo ɲanabɔla tuma mɛn na, mɔɔilu ka a la baaraden do lana a ma, a la miliyɔn siyaman julu ye mɛn na. 25Se tun tɛ baaraden yɛ ka julu wo sara. Wo rɔ, maari ka jamarili di ko ii ye baaraden wo feere, ka a muso ni a denilu fanan feere, a ni a bolofenilu bɛɛ, sa julu wo ri sara. 26Kɔni baaraden ka a be duu ma ka a la maari sen kɔrɔ. A ka a madiya kosɛbɛ ko: ‹I ye i muɲun. N di i la wodi bɛɛ sara.› 27Baaraden kininkinin donda maari rɔ. Wo rɔ, a ka baaraden bila, ka diɲɛ a la julu rɔ.
28«Baaraden bɔra ye ka wa. A bɛnda a baaraden ɲɔɔn di, a la julu tɛrɛ mɛn na. A ka wo mira a kan ma ka a raja fɔɔ ka a niilakili ja a rɔ, ka a fɔ a yɛ ko: ‹N na julu sara!› 29A baaraden ɲɔɔn ka a be duu ma a sen kɔrɔ, ka a madiya ko: ‹I ye i muɲun, n di i la wodi sara.› 30Kɔni baaraden ma sɔn fewu. A ka cɛɛ mira ka a bila kaso la ko ni a ma a la julu sara, a tɛ bɔ ye. 31A baaraden ɲɔɔnilu ka wo yen tuma mɛn na, woilu jusu tɔrɔra kosɛbɛ. Ii wara wo bɛɛ fɔ ii la maari yɛ. 32Maari ka baaraden wo kili, ka a fɔ a yɛ ko: ‹Ile, baaraden juu! Julu mɛn tɛrɛ ye i la, n ka wo bɛɛ to i yɛ ka a masɔrɔn i ka n madiya. 33N hinara i la ɲa mɛn ma, i fanan tun ti se hinala i baaraden ɲɔɔn na wo ɲa ma?› 34A la maari mɔnɛra kosɛbɛ. A ka a la baaraden bolo don kaso kandanilailu bolo ka a tɔrɔya haan ni julu bɛɛ sara.»
35«N Fa mɛn ye sankolo rɔ, wo fanan di wo ɲɔɔn kɛ ai kelen kelenna bɛɛ la ni ai ma ai badenmailu makoto ai jusukun bɛɛ la.»
Currently Selected:
MAT 18: AKS
Highlight
Share
Copy

Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/