MAT 17
17
Isa kɛɲa yɛlɛmanda
1Nba, tele wɔɔrɔ taminnin kɔrɔ, Isa ka Piyɛri ni Yakuba ni wo dɔɔcɛ Yuhana kili ka wa ii ri koyinkɛ jan do kan. Mɔɔ gbɛrɛ tun tɛ ye. 2Isa kɛɲa yɛlɛmanda karanden sawa woilu ɲakɔrɔ. A ɲakɔrɔla mɛlɛnmɛlɛnda ikomin tele. A la faaninilu gbɛra pepe ikomin yelen. 3Nabi Musa ni Nabi Eli bɔra gbɛ rɔ karanden sawa woilu ɲakɔrɔ. Woilu ni Isa tɛrɛ ye kumala i ɲɔɔn yɛ. 4Piyɛri ka a fɔ Isa yɛ ko: «Maari, an na yan, wo bɛnni. Ni i sɔnda, n di gba sawa lɔ, i ta kelen, Nabi Musa ta kelen, a ni Nabi Eli ta kelen.» 5Ka Piyɛri to kuma wo la, duru yelen nara ka birin ii kun na. Kumakan do bɔra duru rɔ ko: «N diyana dencɛ le ten. N sɛwani ale la kosɛbɛ. Ai ye ai tolo malɔ a la.» 6Karandenilu ka kuma wo mɛn tuma mɛn na, ii silanda kojuuya fɔɔ ka ii be duu ma ka ii ɲa birin. 7Kɔni Isa ka a madon ii la ka a bolo maa ii la, ka a fɔ ii yɛ ko: «Ai kana silan, ai ye wuli.» 8Ii ka ii ɲakɔrɔta tuma mɛn na, ii ma mɔɔ si yen fɔɔ Isa kelen pe.
9Ka Isa ni a la karandenilu to jiila ka bɔ koyinkɛ la, a ka ii jamari ko, ii ka ko mɛn yen, ii kana wo fɔ mɔɔ si yɛ, fɔɔ Mɔɔ Dencɛ wa wuli ka bɔ saya rɔ. 10Ii ka a maɲininka ko: «Nfenna sariya karanmɔɔilu ye a fɔla ko Nabi Eli fɔlɔ le ka kan ka na?» 11Isa ka ii jabi: «Tuɲa le, Nabi Eli ri na ka fen bɛɛ rabɛn. 12N ye a fɔla ai yɛ ko Nabi Eli ra ban nala. Kɔni mɔɔilu ma a lɔn. Ii ka ii sawonan koilu bɛɛ kɛ a la. Mɔɔ Dencɛ fanan di tɔrɔ ii bolo wo ɲa kelen de ma.» 13Karandenilu ka a ɲayen wo rɔ ko a ye kumala ii yɛ Yaya le la ko kan.
Isa ka den jinatɔ do lakɛndɛya
14Isa ni karandenilu sera jama rɔ tuma mɛn na, cɛɛ do ka a madon Isa la. A ka a ɲɔnkin Isa kɔrɔ ka a fɔ ko: 15«Maari, i ye hina n dencɛ la. Kerekeremansa ye a la, a ra tɔrɔla kosɛbɛ. Siɲa siyaman a ri a labe ta rɔ, walama ji rɔ. 16N nara a ri i la karandenilu ma, kɔni ii ma se a lakɛndɛyala.»
17Isa ka a fɔ ko: «Ai bi mɔɔilu ye lemɛniyabali ni kun gbɛdɛnilu le ri. N di to ai tɛma haan waati ɲuman? N di ai la ko muɲunnin fɔɔ waati ɲuman? Nba, ai ye na den di n ma yan.» 18Isa jamanda jina ma. Wo rɔ, jina bɔra den fɛ. Den kɛndɛyara i kɔrɔ ye.
19Wo kɔ rɔ, Isa la karandenilu ka ii madon a la ka a maɲininka ii dan na ko: «Nfenna andeilu ma se jina wo gbɛnna?» 20Isa ka ii jabi: «Ai ma se ka a masɔrɔn ai la lemɛniya le ka dɔɔ. N di tuɲa fɔ ai yɛ: Hali ni ai la lemɛniya dɔɔman ikomin bɔrɔn fira kisɛ, ni ai ka a fɔ koyinkɛ ɲin yɛ ko a ye bɔ a nɔ rɔ ka wa, a ri wa. Ko si tɛ ye, ai ti se mɛn kɛla. 21[Kɔni jina ɲin ɲɔɔn ti se bɔla mɔɔ fɛ, ni ai ma sun don ka Alla tara.]#17.21 kuma diya ɲin tɛ sɔrɔn Sɛbɛli kɔrɔ doilu kɔndɔ.»
Isa ka a la saya ni a wuli ko fɔ ikɔ
22Nba, lon do rɔ, karandenilu bɛɛ ka i ɲɔɔn nadɛn Kalile mara rɔ. Isa ka a fɔ ii yɛ ko: «Mɔɔ Dencɛ kɛtɔ donna mɔɔilu bolo. 23Woilu ri a faa. Kɔni tele fila a sawana, a ri wuli ka bɔ saya rɔ.» Kuma wo ka karandenilu jusukasi kosɛbɛ.
Isa ni Piyɛri ka Allabatobonba wodi sara
24Isa ni a la karandenilu sera Kapɛrinahumu so kɔndɔ. Ka ii to ye, Allabatobonba niisankɔ miralalailu ka ii madon Piyɛri la ka a maɲininka ko: «Ai la karanmɔɔ tɛ Allabatobonba wodi sarala wa?» 25Piyɛri ka a jabi: «Ɔɔn, a ye a sarala.» Piyɛri wara don bon kɔndɔ. Kɔni sani a ye kuma, Isa fɔlɔ le ka a fɔ a yɛ ko: «Simɔn, dunuɲa mansailu ye mɔɔ niisankɔ ni fen tɔilu niisankɔ mirala yon na? Ai denilu wa, wala londanilu? I la miriya ye di?» 26Piyɛri ka a jabi: «Londanilu.» Isa ka a fɔ ko: «Wo rɔ, a denilu sen tɛ a rɔ. 27Wo bɛɛ ni a ta, an tɛ a fɛ ka mɔɔ ɲinilu tɔrɔ. Wo le kosɔn, i ye wa dala la ka lɔn bila ji rɔ. I wa jɛɛ fɔlɔ mɛn mira, i ye wo da laka ka a dakɔndɔla ragbɛ. I ri wodi gbanan do yen ye. I ye wa wo di ii ma. Nde ni ile ka kan ka wodi mɛn sara, wo ri a bɔ.»
Currently Selected:
MAT 17: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
