Maak 9

1Muñeˈe Yéesu li alaañen aan búsukabu li kúgoomaku koola:

— Li mal̥egenamu fan ilobuul, kukee li bukuluul kaanomuu taate, let kuket buko bajukut Jáyiiyaju jata Ateemit li jibil li sembe.

Yéesu li ajaŋaŋen

(Máciya 17:1-13; Lík 9:28-36)

2Muñeˈe nan jowe bajumuu kunak koono hutok li hano, Yéesu li aŋa’ Fiyeel, Saak, li Saŋ, min kujow boot li huyuuy hagimbe kujow kulako dó baleyiil. Nan kúliiŋ dómuu, Yéesu li ábutoo hákiliil. 3Wañawu woola li uhiit falala’, kahiit kan uhaase oon bajut li etaamayi afosa ayilo akaan wañ uhiit loon muñaˈa. 4Muñeˈe Elí buko li Móyiis li kúfuliil min kulako elob li Yéesu. 5Fiyeel li aan Yéesu:

— Anahaan, jaajak min ulakowaal taate. Ukaanaal úfooyum úhaaji. Kano boot li awu, kano boot li Móyiis, kaaku boot li Elí.

6Li mal̥egenamu, Fiyeel ahaasut waa lalakowe elob, mata akila humumool li kúgoom kaabuku kúkolikoli ŋáa’. 7Muñeˈe kafaal li kuyaan kúhimeniil li máyiinowamu mata ko. Hulim li húfulumul li kafaalaku haane:

— Laalu Añoolom an iboolaatumuu. Jijantenool!

8Muñeˈe kúgoomaku li kuyaan kugegoo to, kulaañenut kujuk an ábuti li Yéesu li buko humumiil.

9Muñeˈe nan kulakomuu káwalowulaku li huyuuyahu, Yéesu li aaniil jakum kuban li kulob an wahawu wan kujukumuu boot yok nan Añool-An ammuu li ayitowumul li eketayi. 10Muñeˈe kúgoomaku li kujok li hulimahu unhu, ban li kunaak kugel̥l̥enoo koon:

— «Kayitowul li eketayi» yo yommuu waa?

11Muñeˈe kúgoomaku li kugel̥l̥en Yéesu koonool:

— Kama wáa újiye kaliikenemuu ésukayi eluwaayi ésukayi eluwaayi yata Móyiis li koon: «Elí aate ajand abil?»

12Yéesu li aaniil:

— Li mal̥egenamu Elí fan ajand abil min alaañen akaan wahawu feh ul̥uul loon naanaŋ. Bale wáa újiye kama Bakiicelabu li boon ínje Añool-An fan ílaam ŋáa’, ban bukanabuku fan kubesom? 13Bale boot min eenuul Elí labile aban, ban bukanabuku li kukaanool loon súumiilumuu, loon foof Bakiicelabu bulobumuu buya li akila.

Yéesu li afaken añiil an buyinum bajakut bújufowe

(Máciya 17:14-21; Lík 9:37-43)

14Muñeˈe nan Yéesu li kúgoomaku kúhaajiyaku kúlaañulumuu boot tan kúgoom kaabuku kulakomuu, li kujuk min búsuk báamak báguutiilumuu. Li kujuk foof kaliikenemuu ésukayi eluwaayi yata Móyiis buko li búwonnoo li kúgoomaku. 15Nan búsukabu buyaane bujukumuu Yéesu, li busego ŋáa’. Bukanabuku li kúteyoolul kubil kusaafool. 16Muñeˈe Yéesu li agel̥l̥eniil aaniil:

— Waa jíwonnoole li wo li buko?

17Akee li búsukabu li aanool:

— Anahaan, líŋaluliŋalul añoolom áyine, mata buyinum bajakut bújufowool bájimuu ayilaat alob. 18Tanootan tan buyinumabu bajakutumuu bommuu bujok añiilawu, fan bubetool li etaam. Butumabu boola fan buhoohet, ban li anaak akilititen úŋiiŋawu woola. Eniilayi yoola fan esay. Liyakooyakoo kúgoomaku kooli mantee li kukesoo buyinumabu umbu bajakutumuu búfu’ li akila, bale kuyilaat.

19Yéesu li aaniil:

— Huwaj, akila bukuluul! Jibajut káyinen! Boot min ilako li bukuluul boot yok nay? Kama boot min ímuñuul boot yok nay? Jíŋalulom añiilawu.

20Mal̥egen bukanabuku li kúŋalulool añiilawu. Nan buyinumabu bajakutumuu buyaane bujukumuu Yéesu, li búlilliŋen añiilawu li sembe. Li alo li etaam min anaak ababbaloo. Butumabu boola li buhoohet. 21Muñeˈe Yéesu li agel̥l̥en atuubaawu ata añiilawu aanool:

— Kábilum nay tóŋe kaanool loon muñowu?

Atuubaawu ata añiilawu li aan Yéesu:

— Okila añiil atit tóŋe kaanool mo. 22Ban ñameeŋe buyinumabu bajakutumuu fan bubetool li sambun naanu li mal, mantee li aket. Bale nokoomuu loon luyilo ukaan to wah ukee, úyiyenoli min ubonket úlambenoli.

23Yéesu li aanool:

— Wáa újiye li oon: «Nokoomuu loon luyilo ukaan to wah ukee?» Bajut wah wan an áyinene ayilaat akaan.

24Muñeˈe atuubaawu ata añiilawu li ayaan alob butiya aan:

— Líyinene, Amaaŋen! Bale ulambenom mata káyinenom kufamut.

25Nan Yéesu ajukumuu búsukabu li búteyoolul, li anuuloo buyinumabu bajakutumuu aan bo:

— Buyinumabe bajakutumuu bájimuu añiilawu umme ayilaat alob, ayilaat foof ajam, úfu’ li akila ban jakum ulaañen újufowool!

26Mal̥egen buyinumabu bajakutumuu li bukaaw butiya, ban li búlilliŋen añiilawu li sembe min búfu’ li akila. Añiilawu li afan anokoo to loon an akete, gay bukan kameeŋe kalako to li koon lakeeket. 27Bale Yéesu li átuk añiilawu li kaŋen min alambenool ayito. Mal̥egen añiilawu li ayito.

28Muñeˈe nan Yéesu alaañumuu boot li eluufayi, kúgoomaku koola li kugel̥l̥enool buko balakowe baleyiil koonool:

— Wáa újiye óloli jiyilaat jikesoo buyinumabu umbu búfu’ li añiilawu?

29Yéesu li aaniil:

— Buyinum bajakut loon umbu, kal̥aw bale kuyilo bo kúfulen li an.

Yéesu li alaañen alob mata eketayi yoola li kayitowulaku koola li eketayi

(Máciya 17:22-23; Lík 9:43b-45)

30Muñeˈe li kúfulum tó, li kujow kuliij etaamayi yata Gálile, ban Yéesu afañut min an ahaas, 31mata lanaanaak aliiken kúgoomaku koola aaniil:

— Añool-An fan abeti li kuŋen bukan min kumukool. Bale aketumuu jow baj kunak kúhaaji, fan ayitowumul li eketayi.

32Bale kúgoomaku kuliitikenut hulimahu unhu han alobumuu, ban li kúkoli bagel̥l̥enool mata ho.

Ayi ahaŋumuu kufaalool?

(Máciya 18:1-5; Lík 9:46-48)

33Muñeˈe li kujow, li kúliiŋ Káfeenawum. Nan kunokenumuu li eluufayi, Yéesu li agel̥l̥eniil aaniil:

— Kama mata waa jilakomuu búwonnoolabu alolaal li ebilayi?

34Bale li kulu, mata nan kulakomuu ejowayi, búwonnoo kulakowe boot min kuhaas ayi li buko ahaŋumuu maluukeni li kufaalool feh. 35Muñeˈe Yéesu li abah, ban li áhooñul kúgoomaku kuŋen li kúl̥ubaabuku min aaniil:

— An afañumuu min ayab kayooŋ kufaalool feh, alako búsol ésukayi feh ban li alako alokaawu ata bukanabuku feh.

36Fú’ tó, Yéesu li aŋa’ añiil atit akaan li tut kúgoomaku, ban li atebool min aaniil:

37— An ayabumuu boola añiil loon umme mata ínje íji, ínje humumom layabe boola. Ban an ayabommuu boola, inti ínje bale layabe boola, bale anawu áboñulommuu foof layabe boola.

An aletumuu alatoolawolaal, boololaal lalaañe

(Lík 9:49-50)

38Muñeˈe Saŋ li aan Yéesu:

— Anahaan, jijuujuk ánayine akee li kaŋa’ kajawaku kooli min akesoo uyinumawu wajakutumuu úfu’ li bukan, li joonool akat, mata alet akee li ololaal.

39Yéesu li aaniil:

— Jooteenut jíhilool ákaanum mó; mata bajut an ayilo aŋa’ kajawaku kúmbaam min akaan wah wájaahaleniye aban li ayaan áfulum tó li alob majakut aya lí ínje. 40Li mal̥egenamu, an aletumuu alatoolawolaal, boololaal lalaañe. 41Li mal̥egenamu fan ilobuul, an asenuulumuu efot yata mal jihob mata min jommuu bukan kata Kilisita, akaal̥owut mata manooman Ateemit fan acaamool.

Májakaati mata kahoofoo

(Máciya 18:6-9; Lík 17:1-2)

42Yéesu li afamen aan:

— An ájimuu akee li umbuku kakitemuu li kúyinen lí ínje, li alo li kahoofoo, anawu ummu kóyumool min kukok kaneew li enuy kul̥oofool li ekondo’, ban li kuŋalool kujow kubeten li halahu. 43Li bil nokoo loon kaŋeni koote kújiyi li ulo li kahoofoo, ufalen ko. Kóyume min unoken li buloŋabu bábaneliitumuu li kaŋen kano bale, awu babaje uŋen úl̥uba ban li ujow li sambunasu sáhokoweliitumuu, [ 44dán bal̥ol̥abu búketeliitumuu li dán sambunasu síhokoweliitumuu.] 45Li bil nokoo loon kaati koote kújiyi li ulo li kahoofoo, ufalen ko. Kóyume min unoken li buloŋabu bábaneliitumuu li kaat kano bale, awu babaje woot úl̥uba ban li kubeteni li sambunasu sáhokoweliitumuu, [ 46dán bal̥ol̥abu búketeliitumuu li dán sambunasu síhokoweliitumuu.] 47Li bil nokoo loon jíkilaju jooli joote jíjiyi li ulo li kahoofoo, úkool̥ul jó ubeten. Kóyume min unoken li Jáyiiyaju jata Ateemit li jíkil jano bale, awu babaje kúkil kúl̥uba ban li ubeteni li sambunasu sáhokoweliitumuu, 48dán bal̥ol̥abu búketeliitumuu li dán sambunasu síhokoweliitumuu. 49Mata anoowan laate asisumi li sambun.

50«Musis wah wajake. Bale kacabaku kata mo kúfulumuu, waa an ayilo aŋa’ min alaañen akaan mo mucab? Jibaj musis li bukuluul humumuul, ban kajamoo li kubaj li bukuluul.»

Currently Selected:

Maak 9: cskDBL

Highlight

Copy