Maak 7

Yéesu li ahoy múkaaniinamu manabutumuu li húnongumahu hata Ateemit

(Máciya 15:1-9)

1Kukee li Kufaaliisiyeŋaku kubil kujojoo tan Yéesu alakomuu. 2Muñeˈe li kujuk kaanaku kukee li kúgoomaku kata Yéesu kutintiñ hutiñahu hooliil li kuŋen kakonte, yo yommuu kufosut kuŋeniil tówum kutiñ loon bútinabu booliil bulobumuu#7:2 Kusuwifaku kubaje buu kunaake kufosumuu kuŋeniil kútowum kutiñ loon bútinabu booliil bulobumuu.

( 3Li mal̥egenamu, Kufaaliisiyeŋaku li Kusuwif kaabuku feh kútuutuk múkaaniinamu mata situubayiil sihaan jak. Fan kunaak kufos kuŋeniil jak loon múkaaniinamu mooliil mulobumuu, tówum kutiñ. 4Nanoonan nan kúlaañumulo bata waayeenawu, let kutiñ buko bafosut kuŋeniil. Li kunab foof li múkaaniin mukee mata situubayiil sihaan loon: kafos sijunk, kukobot li uyinjaay.)

5Wahawu unwu újimuu Kufaaliisiyeŋaku li bukanabuku kaliikenemuu ésukayi eluwaayi yata Móyiis li kugel̥l̥en Yéesu koonool:

— Kama wáa újiye kúgoomaku kooli kúnabeliit li múkaaniinamu mata situubawolaal sihaan, min kunaak kutiñ buko báfosut kuŋeniil?

6Yéesu li aaniil:

— Min jíhoolo muñowu! Esay ammuu afulofet lakonkooŋ li bukuluul nan Ateemit álobummuu li akila aan:

«Esúkayi inyu, li utumiil bale kuluukenumom.

Bale uyinumiil ulet lí ínje maayeet tuf.»

7Kamanenaku kan kumanenewommuu hin kakaal̥o,

mata siluwaasu san kukittenemuu bukanabuku,

loon eenimuu sata Ateemit,

siluwa sata bukan#Esay 29:13.

8Muñeˈe Yéesu li afamen aaniil:

— Bukuluul fan jinaak jikat bo wahawu wan eluwaayi yata Ateemit elobumuu, min jinaak jinab li makaane mata bukan.

9Yéesu li amit aan:

— Bukuluul jihaase min jikaanemuu min jihoy eluwaayi yata Ateemit, mantee li jiyili jijok múkaaniinamu mooluul jak! 10Móyiis lansaan li mal̥egen: «Uluuken atuubayi li jaawi#Húwuyahu 20:12; Dótelonom 5:16». Li aan foof: «An alobumuu kulim kajakut aya li atuubawool mantee foof li jaawool, laate amuki#Húwuyahu 21:17; Lebetik 20:9.» 11Bale bukuluul li jinaak joon bukanabuku, an aanumuu atuubawool mantee jaawool: «Wahawu wan eeteenumuu iŋa’ min ilambeni, wo wommuu “Kooluban” (yo yommuu “bujuuñak boot li Ateemit”). 12Muñowu jóonummuu éehe’ jakum anawu ummu alamben atuubawool mantee foof jaawool. 13Muñowu jíkajenummuu hulimahu hata Ateemit li bakaanelabu booluul ban jilobemuu bukanabuku jikat to. Ban li jikaan wah wameeŋe wanokoole li wo.»

Wahawu wakaanemuu an min eeni lasikosiko hákil Ateemit

(Máciya 15:10-20)

14Fúlum tó, Yéesu li alaañen áhooñul ésukayi min aaniil:

— Bukuluul feh jijantenom jak ban li jínaanum. 15Inti wah wan an atiñe, wo woote úji li eeni lasikosiko hákil Ateemit. Bale wahawu wan an alobemuu li wan akaanemuu, wo újiyemuu li eeni lasikosiko. [ 16An áakimuu sijan li ajanten min ajam.]#7:16 Hulimahu unhe hubajut li síliibal sameeŋe li sihaanasu

17Muñeˈe nan Yéesu akat tomuu búsukabu min ajow anoken li eluufayi, kúgoomaku umbu. 18Yéesu li aaniil:

— Kama bukuluul foof jiyiliwolut jínaanum? Jihaasut joon bajut wah wan an atiñe wayilo ukaanool min eeni lasikosiko? 19Mata mutiñamu man atiñumuu let munoken li buyinumabu boola, bale fan mujow li halahu hoola, ban li ajow mo li siŋam. [Li kulimaku unku Yéesu áanummuu mutiñaayamu feh mujaajak hutiñ.]

20Yéesu li afamen aaniil:

— Wahawu wáfulumulemuu kata láala an, wo ukaanewoolumuu min eeni lasikosiko. 21Mata kata láala an, li buyinum bata an uyinoolawu wajakutaawu úfumulemuu, wata kahinten kanaale kalet kooliil, ékuwet, jamuk bukan, 22húfulo aletalet, efañ waleewalet, búl̥afutabu, jabunt bukan, ékandomaayiiñ, kásiibo wah, kúloboo bukan, katebenoolo, búguno. 23Wahawu unwu feh wajakutumuu, li buyinum bata an úfulumule, min ukaanool min eeni lasikosiko.

Yéesu li afaken jísungute jata anaale alet Asuwif

(Máciya 15:21-28)

24Nan fúlum tómuu, Yéesu li ajow boot li etaamayi yata Tiil. Nan áliiŋ bómuu, li anoken li eluuf ban afañeenut min an ahaas; bale ayilaat ayolo. 25Muñeˈe anaale akee an buyinum bajakut bújufowe jísungutewool, li ajam li kulob mata Yéesu, li ayaan abil ákuntuŋ hákilool. 26Anaalaawu ummu an alet asuwif. Li etaamayi yan koonemuu Síilo Feniisi labuki. Anaalaawu li ayaakoo Yéesu mantee li akesoo buyinumabu bajakutumuu búfu’ li jísungutaaju joola. 27Yéesu li aanool:

— Ukat bañiilabu min bujand butiñ, mata colut min an aŋa’ hutiñahu hata bañiilabu atahen bajangiyabu batitabu.

28Anaalaawu li aan Yéesu:

— Mal̥egen, Amaaŋen, bale maayeet bajangiyabu batitabu butiñetiñ bafoyabu bálowulemuu li uyinjaayawu wata bañiilabu.

29Muñeˈe Yéesu li aan anaalaawu:

— Ujow úbalo. Buyinumabu bajakutumuu búfule li jísungutaaju jooli, mata hulimahu unhu han ulobumuu húji.

30Muñeˈe nan anaalaawu ábalomuu áliiŋ, li atook jísungutaaju mahintowe li elalayi, buyinumabu bajakutumuu bo báfule li akila.

Yéesu li afaken ánayine akumbowe ban li ásoko

31Muñeˈe Yéesu li amit áfu’ li etaamayi yata Tiil. Li álaañumum li etaamayi yata Sidoŋ alo li yata Dekafool, ajow boot bata húwajahu hata Gálile. 32Nan Yéesu áliiŋ bómuu, bukan kukee li kúŋalulool an ásokowe ban ayilaat alob jak, kúliiŋul li kuyaakoolool mantee li aŋa’ kaŋenool awalen li húkowahu hata ánayinaawu ásomutumuu. 33Muñeˈe Yéesu li aŋa’ ánayinaawu min kuyinno li kakaŋ lóyi ésukayi, ban li aŋa’ kusiikool aya li sijanasu sata ánayinaawu aban, li amasen min ago’ húlellufahu hata ánayinaawu. 34Fúlum tó, Yéesu li ajuke haatiya emitayi, li ahuuf aban li aan ánayinaawu:

— Efata!#7:34 Effata: hulimahu unhu hulim hata elobayi yata Kuwalameyeŋaku. (Yo yommuu: «Utónfulo!»)

35Mal̥egen ánayinaawu li ayaan átonfulo, húlellufahu hoola li húkotulo, min alob jak. 36Yéesu li alobiil aaniil jakum kulob mo an. Bale mo Yéesu aaneyiilumuu jakum kulob mo an, mo bukanabuku kuhaŋemuu malob mo. 37Muñeˈe bukanabuku li kusego masego ŋáa’ gay li kunaak koon:

— Wahoowah feh wan Yéesu akaane ujaajak ŋáa’! Maayeet kásokomuu li akaaniil min kujam, kakumbomuu li akaaniil kúlobul.

Currently Selected:

Maak 7: cskDBL

Highlight

Copy