Máciya 14

Eketayi yata Saŋ Batiis

(Maak 6:14-29; Lík 9:7-9)

1No unnu, Elod alako nomuu águubelunaalawu ata Gálile, li ajam li kulob mata Yéesu. 2Muñeˈe li aan kulokaabuku koola:

— Laalu Saŋ Batiis. Layitowuuyitowul li kaketumuu. Wahawu unwu újimuu li abaj sembe sata kakaan wah wájaahaleniye.

3Elod lajoojok no Saŋ ajenk ban li aŋalool akul̥, mata Elodiyaas áji, an Elod aŋa’muu akaan aseekool, ban anaale ata atuyool Fílib. 4Elod lakankaan mo, mata Saŋ laanoosaan:

— Loon Eluwaayi yata Móyiis elobumuu, colut min uŋa’ Elodiyaas ukaan aseeki.

5Elod li afañeen min amuk Saŋ, bale li ákoli ésukayi, mata bukanabuku kujoojok Saŋ loon afulofet.

6Bale nan hunakahu hawayil̥enumuu kabukiyaku kata Elod húliiŋumuu, ásungutaawu ata Elodiyaas li agom hákil ésukayi yan Elod áhooñulumuu, li súum Elod ŋáa’. 7Elod li anuu aan fan asen ásungutaawu wahoowah wan ammuu al̥awool. 8Elodiyaas li atiken ásungutaawu oola min aan Elod:

— Usénulom taate li buyinjaay húkowahu hata Saŋ Batiis!

9Nan ásungutaawu alobumuu áyiiyawu Elod loon muñaˈa, li jokool ŋáa’. Bale hunuulahu han anuulumuu hákil bukanabuku kan áhooñulumuu, li hújiwool li alob min kusen ásungutaawu húkowahu hata Saŋ Batiis. 10Mal̥egen li aboñ kujow kúfalenul húkowahu hata Saŋ Batiis li hukul̥ahu. 11Li kúŋalul húkowahu hata Saŋ Batiis li buyinjaay kujow kusen ásungutaawu, min aŋa’ ho ajow asen jaawool. 12Kúgoomaku kata Saŋ li kubil kuŋa’ ehuluŋayi yoola kujow kuhok, ban li kujow kulob Yéesu wahawu wabajumuu feh.

Yéesu li ákuumen bukan koono sínjunne hutok

(Maak 6:30-44; Lík 9:10-17; Saŋ 6:1-14)

13Nan Yéesu ajamumuu wahawu wabajumuu Saŋ Batiis, li aŋa’ busaana min ayinno tan alakomuu ajow balewool boot ban wayitowe. Bale nan búsukabu bujamumuu, li búfulumul li sísukasu, bujow koot bunabenool. 14Nan Yéesu áwalowulumuu li busaanaabu, li ajuk búsuk báamak, li áyiyen min afaken kásomutumuu li buko.

15Li líiŋ kátiimaku, kúgoomaku kata Yéesu li kúlohulool min koonool:

— Baabe wayitowayito ban banakabu bujone. Ulob búsukabu min bujow boot li sísukasu mantee li kunoom bo wah kutiñ.

16Bale Yéesu li aaniil:

— Jakum kuyok li ejow. Jiseniil bukuluul humumuul kutiñ.

17Li koonool:

— Kúmbuulu hutok bale jooke taate, li muwol múl̥uba.

18Yéesu li aaniil:

— Jíŋalulom kúmbuuluwaku li muwolamu taate.

19Muñeˈe nan kúŋalulumuu Yéesu kúmbuuluwaku li muwolamu, li aan búsukabu bubah li mahosamu. Nan bubahumuu, li aŋa’ kúmbuuluwaku hutokayi li muwolamu múl̥ubaamu, ban li ateb kúkilool ajooŋoo haatiya emitayi, min asal Ateemit. Fúlum tó, li amuncul kúmbuuluwaku asen kúgoomaku koola min kugaben ko búsukabu. 20Bukanabuku feh li kutokoñ kujow kufooñ, min kúgoomaku kuwomen kumunculaku kasaŋomuu, kujow kuyok kumeeŋen utekel woono kuŋen li úl̥uba kuteb kújowetum. 21Ban kánayinaaku katokoñumuu kúmbuuluwaku li siwolasu kuyilo kúliiŋ sínjunne hutok. Ban kaalaabuku li bañiilabu kucobuti ló.

Yéesu li akak li malamu min ajow

(Maak 6:45-52; Saŋ 6:15-21)

22Nan yaane fúlum tómuu, Yéesu li atuuŋ kúgoomaku koola kújufo li busaana, min kujow ló boot kageb kaaka húwajahu, min akila alob búsukabu min buyiisoo. 23Nan Yéesu alobumuu búsukabu min buyiisoo aban, li aŋito li huyuuy ajow al̥aw ló balewool. Banakabu li bujon, akila buloŋe ló liwoonool. 24Bale emmuu busaanaabu bo báloyiye katantaku, kulambajaku li kunaak kufamb bo, mata bulallaaj élusayi. 25Muñeˈe nan banakabu bulakomuu kákatenul, Yéesu li ájowum koot li malamu ajooŋoo ban kúgoomaku koola kulakomuu. 26Nan kúgoomaku kujukumuu Yéesu li abil koot li malamu, li kúkoli ŋáa’ min koon:

— Afúlafu’!

Li kúluulen, mata kúkolikoli. 27Bale Yéesu li ayaan aaniil:

— Sákoluul, jítik, laalu ínje.

28Muñeˈe Fiyeel li aanool:

— Amaaŋen, nokoomuu loon mal̥egen awu, kama ulobom min ibilum li malamu li koot boot buya.

29Yéesu li aanool:

— Ubil.

Mal̥egen Fiyeel li áwalowumul li busaanaabu min ájowum koot li malamu ajooŋoo ban Yéesu alakomuu. 30Bale nan Fiyeel ajukumuu kaanaku búlusabu bululluuk, li ákoli. Nan ákolimuu, li átoŋ ayooko li malamu. Li akaaw butiya aan Yéesu:

— Amaaŋen, ufakenom!

31Yéesu li ayaan atooken ájokulool, ban li aanool:

— Mo káyineni kukite kutiti! Wáa újiye li úwettoo?

32Muñeˈe nan kújufomuu buko kúl̥uba li busaanaabu, búlusabu li buyaan buweelen. 33Bukanabuku kalakomuu li busaanaabu li kúkuntuŋ hákil Yéesu min kumanenool koon:

— Li mal̥egenamu awu ommuu Añiilawu ata Ateemit!

Yéesu li afaken kásomutumuu li etaamayi yata Genesalet

(Maak 6:53-56)

34Nan Yéesu li kúgoomaku koola kulimbumuu húwajahu, li kúliiŋ li etaamayi yata Genesalet. 35Muñeˈe nan bukanabuku kakin bomuu kuhaasumuu Yéesu, li kuheben bukanabuku feh kakinumuu li sísukasu sata halaabahu unhu jow kujam. Li kúŋalul Yéesu bukanabuku kásomutumuu feh. 36Li kuyaakoo Yéesu mantee li akat kásomutumuu min kugo’ kabeyaku bale kata kañaku koola. Mal̥egen kago’ komuu feh li kufak.

Currently Selected:

Máciya 14: cskDBL

Highlight

Copy