MATHI 28

Jisu Rholeküsüra

(Mrk 16.1-10; Luk 24.1-12; Jhn 20.1-10)

1Sabbath ti küji Judahri kümünyie rülo jumü taji Jüasekhe rülo saluo nta küsa ashu vü Magdalene Maria thi Maria küpavühwa masü rüku no nti ru; 2thinü halie, mükhrü khieloti küzhüh, küpakenühnyunü Vüwa zhühleri küsü rügi vünüh turu nü alohwa khaküprimü tajinü wa jü rügi vü pehteküwa kenüh. 3Ma tso tü atsorie kümüjie, thi ma thsümünyi tü amüra kümüji kümüjie müji. 4Thi ma kükrü kenüh rüku kühuori tü khekhe ti küshü nü aküsüri kümüjie satewa.

5Thitü rügizhülewa nüh nyimzari vü, “Nohri mükrütümü luo, nohri nyi küsü khieluothso rügivünüh zekekümüwa Jisu phakütse hi nüh thsüvehthuoh. 6Ma tü hala pehmüvehthuoh, küpakenühnyunü khana küüza kümüjie ma rhoshele tewathuoh. Ra nü Vüwa khiela küzehünü noluo. 7Thi shita wa nü ma sehnyiri vü ma nü aküsü vünüh rhosüra tewathuoh nüh ti küza luo, thi halie ma tü nohri atü vünüh Galilee vü tewathuoh nüh, halie, hi nüh nohri vü küza veh, nohri jüla nüh ma mütu naveh,” ti küza.

8Jüti satajinü mari tü krü thi khieloti lozhe nü shishiti rüku vünüh zhüwa nü ma sehnyiri vü küza nti tewa.

9Jütisanü ma sehnyiri vü küza nti wa ünü halie, Jisu tü mari mütu nü, “Kümühiewa saluo,” ti küza! Thinü mari tü ru nü ma jih kheke nü ma khuhrü. 10Thinü Jisu nüh mari vü, “Mükrütümü luo, wa nü ehnüri tü Galilee vü ru üti küza luo, mari jüla nüh hi siemütura naveh nüh,” ti küza.

Rüku Kühuori vünüh Zhühle Küru

11Jütisa taji mari tü kuotsewa ünü halie, momo kümüjie sathuoh ünüh rüku kühuo wuori tü nyuküjiwa vü wa nü levü küjiri vü küza kheh. 12Thi mari tü wa nü kükhruori sie sehzhuh nü kürüchie taji mari nüh raka hozake vi nü arienyiri tsü taji, 13“Hiri zehküveh vünüh ma sehnyiri nüh ru ma kümo wa rüza vünüh rühutewathuoh ti küza luo, 14thi azhü hama Kümükhrüwa nüh thsü tewa thuoüji nohri müküümünomüna nah küsa kenüh hiri mpa ma jüle naveh,” ti küza.

15Thi mari tü raka vi nü mari vü küüza kümüjie sa; thi zhühku hama tü khinyi küju nga Judahri azhie vü küzanyuo tsewie.

Jisu nüh Ma Sehnyiri vü Küüngule

(Mrk 16.14-18; Luk 24.36-49; Jhn 20.19-23; Krr 1.6-8)

16 # Mat 26.32; Mrk 14.28. Jütisanü sehnyi türaluokeri tü Jisu nüh mari vü küüza kümüjie Galilee vü küzhiho rügi vü tewa. 17Thinü mari tü ma ngu ünü ma khurü khe, thitü wuori thuoüji mütsotü nüh sa. 18Thinü Jisu nüh mari vü, “Kükhra aveh, thajüwu vü nga satü azhih vü nga satü hi vü tsükhehmüthuoh. 19#Krr 1.8.Jükenüh wa nü akuoh aveh eh sehnyi küüsaluo, Pawa thi Tsawa thi Kümtse Sietsewa nyo vünüh baptis küüsaluo. 20Hi nüh nohri vü momowa küza nüh vi mari vü sosietsü nü mari küümüzhe luo; thi halie, hi nüh nohri sietsehuowie naveh, tsotho sehkhe küju sietsewie naveh,” ti küza.

Currently Selected:

MATHI 28: POCHBSI

Highlight

Copy