ATÜTSAR 14

Abram nüh Lot Küülole

1Shinar vü kajiwa Amrafel, Ellasar vü kajiwa Ariok, Elam vü kajiwa Khedorlaomer thi Goiim vü kajiwa Tidal tsotho vü, 2Sodom vü kajiwa Bera, Gomorrah vü kajiwa Birsha, Adma vü kajiwa Shinab, Zeboiim vü kajiwa Shemeber thi Bela (jüma tü Zoar) kajiwa sie nü arie sa. 3Kaji münga hamari tü Sidim nyuo, (jüma tü Amtsü souzü) vünüh mari sezhuh khe. 4Mari tü mahvi türakünyi Khedorlaomer kütsü sa, thitü mahvi türakücheawa thuoüji mari sie saluo tewa. 5Mahvi türamzüwa thuoüji Khedorlamer thi kajiri ma siekütseri tü Ashterotkarnaim vü Refaim, Ham vü Zuzim, Shavehkiriathaim vü Emim, 6thi Edom küzhiho nyujiri vü Horri cham nü Elparam reza rüshu küju zhewa. 7Jüti sanü mari tü shele nü Enmishpat, Kadesh vü teru, thi Amalekra anyu aveh cham, thi jü mpa mükünyu Hazazontamar vü küpeh Amorri aveh nga cham.

8Thinü Sodom kajiwa, Gomorrah kajiwa, Adma kajiwa, Zeboim kajiwa thi Bela, (jüma tü Zoar) Zoar kajiwa tü tsezhuwa nü Sidim nyuo vünüh sarü, 9Elam kajiwa Khedorlaomer, Goiim kajiwa Tidal, Shinar kajiwa Amraf el thi Elasar kajiwa Ariok sie saluo, kaji müzü nüh kaji münga sie saluo. 10Sidim nyuo tü athsonyi zhikrie mpa, Sodom thi Gomorrah kajiri kütevü mari wuori thuoüji zhikrie jüri lovü küluket, thi küpari thuoüji küzhiho vü tekewa. 11Thi mükünongüri nüh Sodom thi Gomorrah tsokrü aveh thi kütsaküzhu aveh vi nü tewa; 12jü mpa mükünyu mari tü Lot, Abram anü atsa, Sodom vü pehküveh thi ma tsokrüri nga ti vi nü tewa.

13Thinü küthi kütera nyi küsü nüh ru nü Abram, Ebriwa, Mamre Amorwa nguzheza kütuoh vü kürhowa vü zhüke aveh tsü. Mamre thi ma jie Eshkol thi Aner tü Abram sie zarike küsari. 14Abram tü ma zhü re nü küsi satewathuoh taküsa thsüra ünü ma zheh vünüh küwuo arie küsari jizhuh nü mari müzaküche nü türatüze sie nü mari zhe Dan küju wa. 15Thi ma nüh arüza vü ma rienyiri küsuo nü mari zhe taji chara kheh, ma thi ma sieperi nüh mari zhe Hoba, Damaska zhietü wuovü küju wa. 16Jüti sanü mari nüh atsokrü viteküwari aveh ngura le nü ma nüh ma zhü Lot thi ma tsokrüri, nyimzari thi anyiri aveh sieteru le.

17 # Ebr 7.1-10. Ma nüh Khedorlaomer thi ma kaji ma sie kütseri cham nü teküru vü Sodom kajiwa tü Shav Anyuo (jüma tü Kajiwa Nyuo) vünüh ma mütu nti tsezhuwa. 18#Ebr 7.1-10. Jüti küsa vü Salem vü Kajiwa Melkhizedek tü lohse thi akhah ti vi nü Abram vü ru. Melkhizedek tü Saküüwuowa Kümsie Tsa anavüwa. 19Thi ma nüh ma tsiatsü taji,

“Saküüwuowa Kümsie Tsawa,

Thajüwu thi azhih küsawa nüh tsia Abram kütsüwa saluo;

20Thi Saküüwuowa kümsie Tsawa nüh noh mükünongüra nyiehvü saküükhrawa tü kütsia küvüwa saluo!”

ti küza. Jüti küsa vü Abram tü zanyo aveh nga türake vü küsü vi ma tsü.

21Thinü Sodom kajiwa nüh Abram vü, “Atsokrü nü noh mpa nüh vimketü nga anyiri thuoüji hi tsüm le luo,” ti khuo.

22Abram nüh rüle taji, “Saküüwuowa Kümsie Tsawa vünüh hi nüh küshie wieveh nü, 23hi thuoüji alo lohso küsü nga nyutü jiküükruvüh li küsü nga thi noh zhi ta küsa zanyo küsü nga küviwa nyu, küpakenühnyunü hi nüh Abram sakünyirhie ta küsa noh nüh thama küüphrahte kenüh. 24Hi thuoüji zanyo küsü nga küviwa nyu, thitü vizari nüh mowa tsathuoh ünüh hi nüh vi naveh, thi hi sie küwari müthoh tü Aner, Eshkol thi Mamre nüh küvi luo,” ti küza.

Currently Selected:

ATÜTSAR 14: POCHBSI

Highlight

Copy