KIIMWEBI JAQSHAM 9

Saul Ka Jesuq Puk Na Nyapto

(Kiim 22.6-16; 26.12-18)

1Kra bala siili, Saul raq Tatiwe sengi thun ka, tiikot mrot rit raüta, atsea ata tiiphiip miijiip, shiikeng wanto. Krai mren, apaiq ka Ramwe Ajong Pinthum we phana wato. 2Raüta, Damaskas chela na sinagok thun sitlaq kra liiwanti welabi ma, apaiq rai mang triisapke, lak thun ka jaüto. Kra lak thun ka, apaiq raq Tatiwe Lam phantibi Damaskas chela na asi hum wa raüla, apaiq raq tsangshiq ka, jechak maiqwe wiita lapho raüta, Jerusalem na tiijang hitho nong miitu jaüto.

3Saul ka Damaskas chela na asaü wan nini she riito. Kra bala liipan niili, tiihanghiiq miili, ra wa walüli henghea ashi saüki saq raüta, apaiq tro na chhairaito. 4Kiimaq apaiq ka kumrang raikhü wa, hiq na tiidearok dea wato. Kiimaq apaiq raq ra wa maiq bom ashi akha taito. “Saul, Saul! ümniiraq ngi ka jam khano tiichamchao tlaü?”

5Kiijiishe, apaiq raq, “Tatiwe, ümniika juwa?” nguta waito.

Kiijiishe, bomtsi raq, “Ngi ahata Jesuq. Ümniiraq tiichamchao tlaü we ahata,” nguta treto. 6“Shatmaq, tiidolaq. Laüta, chela mong kiina walaq. Kiijaq ümniiraq akhek jamlai phan jaqsham chang wa, kra achongketi asi miraq.”

7Kra chhi raüta, Saul rai wadamti akongtibi ka kaiqshak, poshi min bom mak, atiiraili riito. Tsangshiq raq maiq bom ka taito. Shatmaq, maiq sham ka chhi mak dea. 8Saul ka hiq wa tiidoto. Raüta, amak ka tiipiiq raüta liito. Shatmaq, amak ka amii kai wishe riito. Apaiq raq jam min chhi mak she riito. Kriikha miishe, tsangshiq raq apaiq ka, ajaq maq kamshat miishe, Damaskas chela na shea wanto. 9Apaiq ka ranaiqtsam, jam min chhi mak, makchuk sito. Kiimaq kra ranaiqtsam liipan na apaiq raq jam min phaqsiq mak, amang maq, kiimaq kham min nyang mak maq sito.

10Kiijaq, Damaskas chela na Phungmaiqse weshi asi. Apaiq mang ka Ananias. Apaiq raq riisham mak maq Tatiwe ka chhito. Kiimaq Tatiwe raq apaiq ma, “Ananias!” nguta heato.

Kiijiishe, “Tatiwe loi, ngi ajaq asi lii,” nguta apaiq bom ka treto.

11Kiijiishe, Tatiwe raq apaiq ka thaüto, “Tiije laq. Laüta, Rusansan Lam ngutlaq maiqchii kiina kilaq. Kiijaq Judas nguta maiq weshi asi. Apaiq jam na kilaüta, Tarsas chela na siti, maiq weshi, amang Saul ngutliiwe ka arjaq asi sha nguta wailaq. Apaiq ka ümchaü achu jaü rea. 12Kiimaq, Saul apaiq riimin, riisham mak maq achhi wishe. Apaiq raq chhi ka, maiq weshi amang Ananias nguta, kriiwe ka waraüta, apaiq mak ka tiipiiqke miitu, adü na kriiwe raq ajaq maq sham chhito.”

13Kiijiishe, Ananias raq treto, “Tatiwe, nanok pahea raq, ngi ma arwe arka abi pinthum nguta chongtlo. Kiimaq apaiq raq, Jerusalem na siti ümsengibi ka pinthum phiiptsi jiiptsi tiichamchaotlo nguta tai tiikang. 14Kiimaq, apaiq arjaq Damaskas chela na wataq arka, ramwe jongbi jaq wa arang lak howan raüta, ara chela na ümnaq shomnoqti, ümsengi thun kra wiita lap wa wato nguta chongtlo.”

15Kiijiishe Tatiwe raq treto, “Kilaq. Naqhai kiq. Ngi raq apaiq ka i khiiq wi ma nguta atsea wan wishe. Kiimaq, apaiq ka i mang ara, Pongnok phan ma, kiimaq honyung hokhambi ma, kiimaq Israilnok wiitarü ma tiisap wan miitu, tsea wan kang. 16Kiimaq, apaiq ka ngi miitu, ümtinkhan chamchao chang wa, kra ngi raq apaiq ma mitiichhi kuqha.”

17Krai mren, Ananias ka Saul jap chang jam kiijiishe kihoto. Raüta, jam mong na nyap wato. Raüta, ajaq maq Saul dü na sham raüta, “Phuno we Saul le,” nguta bom damto. “Ngi ka ümniiphana Tatiwe raq tiikito. Ümniika ana wa lam na awarai shon, ümniirai lam na sham riichhikitaq Jesuq apaiq raq tiikito. Apaiq raq ngi tiikitaq arka, ümmak kra tiipiiqke kai miitu, kiimaq ümniika Asii Wenyi raq ama maq rom raüta, ama miishe misi laq nguta tiikito.” 18Kiijiishe, tiihanghiiq miili, amak wa ngiq saksetiim ikha hiq na dea kito. Kiimaq amak ka piiqsaqli she heakito. Krai mren, apaiq kiimin tiidopot she chapto. Raüta, kham lam wantlii riito. 19Kiimaq apaiq raq tü adung ka phaqsiqto. Krai mren, ahan kiimin phin wan saqli, phinto.

Saul Raq Damaskas Na Trahoto

Kiimaq, Saul ka Damaskas chela na Jesuq jaqshisetiim rai heashi sithü damto. 20Kiimaq, apaiq raq sinagok thun kiijaq kokkok wawan raüta, Jesuq kiidea Shiikeawe Se nguta trahokuq pha wanto.

21Apaiq traho kra tai raüta, nokmaiqse thun tarü ka awang riito. Kiimaq tsangshiq liipan na, “Notsam, arwe ara mak sha, Jerusalem wa Jesuq puk na nyap wantibi thun kra tseabaiq wanti we ira? Kiimaq ümchaü apaiq arjaq wataq arka, tsangshiq thun kra lap wa nguta awa riimak sha? Tsangshiq ka lapho raüta, Jerusalem na ramwe jongbi kiima kiinong keho miitu awa riimak sha?” nguta riiwaisoto.

22Shatmaq, Saul raq Damaskas na siti Jehudinok ma apaiq traho bom chongke kriika, achaq awaq maq hakhi tiichhi kuq raüta chongkuqto. Kiimaq apaiq raq Jesuq kiidea Khristo nguta tiitho tiipha chongkuqto. Krai mren, Damaskas na siti Jehudinok raq apaiq kiq ka poshi min khii lot mak riito.

23Kiimaq, rahiq luhea siwan jai she, kiijaq siti Jehudinok thun ka adam na kiqshi maq ri raüta, Saul ka atsea baiq raa tlo nguta tsangshiq raq matkii ka süriito. 24Shatmaq, kra tsütsa ka apaiq ma maiq ashi raq tiihe chongkuqto. Tsangshiq raq apaiq tsea baiq miitu, maiq ma raikao tat raüta, chela kilam thun kriika ranaiq rawa tiikheshat thüto. 25Shatmaq, apaiq jaqshisetiim raq, apaiq ka rawashi raqhii mong na tiinga raüta, raqhii ka raü maq paq raüta, chela rukpu maq, rukjai nü na tiisat baiqto. Raüta, apaiq ka maiqhiq ahin niishe tiiki baiqto.

Saul Ka Jerusalem Na Jangkito

26Saul ka Jerusalem na hali jangho nongto. Raüta, kiijaq siti Jesuq jaqshisetiim phung na pong wan dam miitu ritto. Shatmaq, tsangshiq raq apaiq ka Jesuq jaqshise she dea nguta kammak. Kiimaq, tsangshiq tarü ka apaiq ma ahai. 27Kiijiishe, Barnabas raq Saul ka khrumto. Apaiq raq apaiq ka kiimwebi phaniishe shea wanto. Raüta, Saul raq lam maq Tatiwe rai jamkho riihumtaq, kiimaq Tatiwe raq apaiq ma bom ka jamkho chongkuqtaq, kra thun tsütsa kriishe tsangshiq ma tru chongkuqto. Kiimahali, Saul raq Damaskas chela na, nokmaiqse ma, Jesuq mang na achaq awaq maq tra hokuqtaq kra tsütsa kiimin tsangshiq ma tiitai chongkuqto. 28Kra chongkuqtaq krai mren, kiimwebi raq apaiq ka tao wanto. Kiimaq Saul ka tsangshiq rai adam miishe pong damto. Raüta, achaq awaq maq Jerusalem hamli na konchi koncha khum raüta, Tatiwe mang na tra hokuqto. 29Apaiq raq Grik bom maq bomti Jehudinok rai min, bom ka riiphan chanto. Raüta, tsangshiq rai tri maq riikhiito. Shatmaq, tsangshiq raq apaiq ka tsatbaiq haijaq nguta kheshat maq khuito. 30Jesuq jaqshisetiim raq kra matkii sü tho kra he raütiishe, tsangshiq raq Saul ka, Sisiria chela niishe sheahoto. Kra miishe hali apaiq ka Tarsas chela niishe tiiwa baiqto.

31Riita, ara chong tiikai arai mren, Judia wang na, Gelili hong na, kiimaq Samaria wang na siti phungtuti thun ka, ahai asong jam min ahü miishe, hansang miishe shongngato. Kiimaq Asii Wenyi jaqkhong maq, tsangshiq raq ningkun lap wanto, kiimaq Tatiwe ka kai shreng raütiishe shongnga wanto. Krai mren, phung na shang wanti maiq ka pawan ruq li she pawanto.

Petar Raq Lidda Nai Joppa Na Trahoto

32Petar ka barap binrii na trahoke khum wanto. Kiimaq jangshi ka Shiikeawe sengi Lidda na siti liikai kito. 33Kiijaq, apaiq ka maiq weshi, amang min Ainias nguta, kriiwe rai riihumto. Kriiwe ka ahan ama riiki raüta, atsi wiitiichat she, chang na weshat li chhi hoto. 34Petar raq apaiq ma, “Ainias, Jesuq Khristo raq ümthatsi ka tiihea kuqto she. Tiidolaq. Laüta, ümchangdü ka tiihea laq,” nguta thaüto. Krai mren, Ainias ka abum wa tiidopot chap hiiq heakito. 35Lidda hiqti nai Sharon hongti nokmaiqse tarü raq, apaiq thatsi heakai kra chhito. Krai mren, tsangshiq riimin, Tatiwe miishe kamwanto.

36Kiimaq, Joppa chela na maiqnyung ashi asi. Apaiq mang ka Tabitha. Apaiq ka Jesuq jaqshise. (Apaiq mang ka Grik bom maq Dorkas ngutlo. Kra liichum ka “Chok kaü” nguta ngo.) Apaiq raq arilung ka, nanok khrumke jaqsham na nai miitsan miijan maiqse khrumke niili tiisungto. 37Kra bala, apaiq ka atsi riikito. Raüta tsaikito. Amaa ka kham maq tiiheto. Raüta rathong khok na tiiweto. 38Jopa ka Lidda maq ajeli. Kriikha maq, Jopa na siti Jesuq jaqshisetiim raq Petar ka Lidda na nguta tsütsa tai raüta, tsangshiq raq maiq wenai Petar tiihea kai tiikito. Tsangnai ma, “Ümniika naishiq phana jaqlo wara ngu wa,” nguta tiichong kito. 39Krai mren, Petar ka tiidopot raüta, apaiq heakaiti rai wawan damto. Apaiq saüwa kiitiishe, tsangshiq raq apaiq ka rathong khok kiina shea wanto. Kiijaq manti-nyungre ka apaiq tro na riitam ngato. Tsangshiq ka aho anyi lam maq, Dorkas raq atra siji na samtong nai samtong jong ataq thun kra, Petar ma tiichhi raüta hoq trangto. 40Kiijiishe, Petar raq tsangshiq ka tarü tapmong wa rin niishe tiiki baiqto. Raütiishe, apaiq ka kaütsrong na nga raüta achu jaüto. Apaiq raq achu jaülot raütiishe, maiq maa wetlaq kiinü na nyi raüta, “Tabitha, tiidolaq!” nguta apaiq rai bomdamto. Krai mren, kra nyung raq amak ka tiipiiqto. Kiimaq apaiq raq Petar ka chhi raüta, chang na awe wa, anga she riito. 41Kiijiishe, Petar raq kra nyung ka ajaq maq kamsaq raüta, tiichapto. Raütiishe, Petar raq Jesuq jaqshisetiim thun ka wiita, manti-nyungre miitaq, rin niiwa, jam mong niishe hali tiijang hea nong raüta, Dorkas ka atra she, tsangshiq jaq na kiinong kuq thüto. 42Kiimaq, ara tsütsa arka, Joppa chela hamli niishe nyam wanto. Krai mren, maiq pahea raq Tatiwe miishe kamwanto. 43Kiimaq, Petar ka Joppa chela na rahiq aluwiq sithüto. Apaiq ka ngamkhü shati laopan we Simon jam na sito.

Currently Selected:

KIIMWEBI JAQSHAM 9: TANGSBSI

Highlight

Copy