YAPHANG 19

Sodomni sumsokrok

1Sarigo Suari khoroknwi Sodomo phai kha; aphuru Lot Sodomni kamiyungni duglamo achugwi tongo. Lot bórokno nuk’-kheno bórok bai malaina bagwi bachaui tháng kha tei ha-o botok khe bolokhógwi khulumui hai hwnwi sa kha, 2“Ani bugrarok, ang norokno koi ja-o, ani nogo kasa lai phai jaui horo tongwi tháng lai ja di, yakung yak sú phai lai di; hakhe norok aidrobo bachaui norokni thángna lama-o thángwi man anw.”

Hakhe bórok hai hwnwi sa kha, “I’nhi chwng lampra’-ono hor ai lai anw.”

3Tamo khe bo bórokno belai khe koi kha, hakhe bórok bini nogo habwi kasaui lai kha; bo bórokno chámung rw kha, auang bángla snamjakrok rw kha, hakhe bórok chá lai kha.

4Tamo khe bórok thu lai ya kho sini’-no, a kamiyungni chwlarok, Sodomni sikla tei chakra chwlarok, bebak borokrok phaiwi a nokno chorsa khe kitingwi gerep lai kha, 5#Buj 19.22-24.hakhe bórok Lotno ringwi hai hwnwi sẃng kha, “Tini horo nini nogo phainai a chwlarok biyang tháng bai kha? Bórokno phataro tikhlai tubu-ui phai di, chwng bórok bai thu lai-chá lai khlai grana.”

6Lot phataro a borokrokni thani nongkhorwi tháng kha tei bo nongkhor khe uklok tẃi dugar berebwi rwui 7bo a borokrokno hai hwnwi sa kha, “Takhukrok ang norokno koi ja-o, bórokno ahai ta khlai ja di. 8Nai di, ani sajwk sikla khoroknwi tongo, tabukbo bórok kwthar kho; bórokno norokni thani tikhlai rw phai anw, norok muchung tẃi’-no khlai di; tamo khe bórok ani nogo se bom phai laijama ba, a borokrokno le mungsa ta khlai ja di.”

9Tamo khe bórok hai hwnwi sa kha, “Chwngno ta kebeng di!” Tei bórok hai hwnwi sa kha, “O borok buini hani phaimani se, bo se tabuk buj thumnai! Chwng tabuk nono se o borokni slái’-bo sitra rwnai.” Bórok Lotno dagar lai kha tei duglam swbaina bagwi seder lai kha. 10Tamo khe a khoroknwi borokrok Lotno yak phologwi bisingo sotonwi nahorwi duglam soui rw kha. 11#2Ha 6.18.Hakhe bórok nok duglamni phataro tongnai bebak chakra-kusu borokrokno mokol nuk ya khlai rw kha, hakhe bórok tei duglam naitugwi man lai li ya.

Lot Sodomni nongkhormani

12Hakhe a borok khoroknwirok Lotno hai hwnwi sa kha, “Oro nini chamarisarok, sajlasongrok, eba tei nini khoroksa swk o kamiyungo to de tong? Tong khe bórokno oroni kariui tlang si di, 13chwng omono sokomorna naiwi tong kha, tamni hwn ba Subraiyung o borokrokni belai samung hamyarokni kókno khna kha tei Sodomno sokomorna bagwi se Subraiyung chwngno rwui rohoro.”

14Hakhe Lot bini sajwksongno káijakna bagwi kók kha laijak chamarirokno thángwi hai hwnwi saui kha, “Do di! O kamiyungni nongkhor lai di; Subraiyung o kamiyungno sokomornani naiwi tong kha.” Tamo khe bwchamarisong bórokno hai’-no kara thwngwi se sa khna hwnwi uansuk lai tong kha.

15Phung ai khe’-no suarirok Lotno hai hwnwi dagiui sa kha, “Bacha di, nihikno tei oro tongma nini sajwk khoroknwino tẃiwi nongkhor di, wng ya khe o kamiyungno sokomorma bai baksa norokbo pái bainai.” 16#2Pi 2.7.Tamo khe bo lerwi tong kha; tamo khe Subraiyung bono khairok kha, hakhe borokrok bono, bihikno tei bwsajwk khoroknwirokno yak romwi kamiyungni tikhlai tubu kha. 17Bórok bórokno tikhlai tubu phuru hai hwnwi sa kha, “Thangnani bagwi se khár di, uklok phaising uphilwi ta nahar di tei o harungo kwrẃngsa swgo tabo ta bathak di; o hatháirogo khár di, wng ya khe norokbo khamwi páinai.”

18Hakhe Lot bórokno hai hwnwi sa kha, “I’nhi omo hai ta khlai di ani bugrarok; 19nai di nwng nini o selengno belai khe khairogwi nai khlai kha tei ano mwthang kha, tamo khe, ang hatháirogo le khárwi thángwi man glak, hamya se ano rom phainai kha tei ang thwinai kha. 20Nai di, u kamiyung khe sampha-o tei abo kwbo kẃlẃksasa. Aro phano ano thángna rw ja si di, ahai khe le ani langma thangwi tong rwknai! abo sói’-no kẃlẃksasa ya diba?”

21Hakhe bo bono hai hwnwi sa kha, “Do wng si thung, ang lon kha, nwng samani a kamiyungno ang sokomor glak. 22Do di, aro khárwi tháng di, nwng aro sógwi ya sak ang mungsa khlai ya.”

Aboni bagwino a kamiyungno Joar#19.22. Joar: O mung Hibru kók bai khe “bwsate” hwnma hai. hwnjago.

Sodom bai Gomora sokomorjakmani

23Lot Joaro sók phai kheno sal kasaui phai kha. 24#Mat 10.15; 11.23-24; Luk 10.12; 17.29; 2Pi 2.6; Jud 7.Hakhe Subraiyung Sodom bai Gomorani saka-o nokhani gwndwk tei hórni uatwi ua rw kha; 25tei bo a kamiyungrokno tei bebak harungrokno sokomor kha, bebak borokrok bai baksa aroni ha-o achainai bebakno’-no sokomor bai kha. 26#Luk 17.32.Phiya Lotni uklogo tongnai bihik uklogo uphilwi nahar kha tei bo sómni thongla chaui tháng kha.

27Teini phungo khe Abraham doui Subraiyung bai bacha lai thani-o tháng kha; 28hakhe bo, Sodom bai Gomora tei bebak harungno naikhlaiwi nai kha tei nuk kha, hani hoku kasaui tongo, abo thapa kotorni hoku ka tẃi wngwi tong kha. 29Hakhe Kaitor harungni kamiyungrokno sokomor phuru omo hai wng kha, Kaitor Abrahamni kókno muitu khlaiwi, kamiyungrokno sokomorna swkang a kamiyungni Lotno kariui rohor kha.

Moabsong bai Ammonsongni bosong chengmani

30Hakhe Lot Joarni nongkhorwi thángwi bwsajwksong khoroknwino tẃiwi hathái-o tongwi kha, tamni hwn ba bo Joaro tongnani kirijak kha; hakhe bo bwsajwk khoroknwino tẃiwi aro hakhoro khe tongwi kha. 31A bukhuk okra kusuno hai hwnwi sa kha, “Chini apha chakra wng kha tei o hani#19.31. hani: Bebak ha manang eba o ha. tongmung tẃi khoroksa chwla oro phano tong phainai kwrwi. 32Phai di chwng aphano chuak khanwi phek rwui bo bai thu-ui bini tẃi khe bosong narwk lai anw.” 33Hakhe a horo bórok buphano chuak khanwi phek rw lai kha; tei a bukhuk okra bupha bai thu-ui kha; bo buphuru thu kha tei bachaui tháng kha bupha saui man ya.

34Teini salo khe a bukhuk okra kusuno hai hwnwi sa kha, “Nai di, ang miya horo apha bai thu kha; tinibo bono chuak khan lai anw; hakhe nwng thángwi bo bai thu-ui di, hakhe chwng bini tẃi khe chini bosong narwgwi man anw.” 35Hakhe a horobo bórok buphano chuak khan rwui phek rw lai kha; tei a bukhuk kusu bo bai thángwi thu-ui kha. Bo buphuru thu phaiwi bachaui tháng kha si rwk li ya. 36Omo hai kheno Lotni bwsajwk khoroknwirok bupha bai khe ogo bwsa wng kha. 37Okrani okni bono Moab#19.37: Moab: Hibru kók bai o mung khe “Ani aphani aroni” hwnwi hwnma bai baksa. hwnwi mung phar kha; bono tabuk tongnai Moabrokni bupha 38kusubo chwla bwsa’-no man kha tei Benammi#19.38: Benammi: Hibru kók bai omo “ani sandaini bwsa” hwnmani tei omo Hibru kók bai “Ammonsa” hwnma bai baksa. hwnwi mung phar kha, bono tabukni Ammonsongni bupha.

Currently Selected:

YAPHANG 19: KOKBSI

Highlight

Copy