ADUNHEL 22

1“Ei kortehel aro pa hel, minon ne nalingo, nebithang alam nalithan bang, bangpoyok onenot.” 2La-amun anang Hibru alam pen lam kithan arjusi anali do klipmo, aro Pol po thanhisi damo: 3“Ne Jihudi arleng, aro Silikiya alongri Tarsas arongpe long ne kiplang athem, manta ne labang arongpe long the-dingsi, Gamaliyel po adun kido amunsi ili sar-lar hel kanong hel chirlilo; aro mini nali holek kido badi, ne ta Arnam yok chipeksi kido. 4Aro labang aduwar kidam arleng helyok arloso aro penso yokta bamsi ne analiyok akrol long thalsi kamariyok lahelyok aduk kipi. 5Labang alam bangthepo pen ason amel abang ne hakhi do. Ne anali parasi Jihudi kortehel yok kiwi alo ensi, Damaskas long inghosi kido, analiyok ado kapapi yok, nepsi Jerusalem yok kiwan aphan, lalongyok damsi kido.”

Pol po Abithang Dhorom Kilut Alam Kachithan

(Aka. 9:1-19; 26:12-18)

6“Manta ne damjongne kido amun Damaskas adung kihlengyok ke, nerlo sitem arni sokhrang apun photsi athak para katha-ang wang chikomwolsi neyok klano. 7Lalong ne lungle athak kikrep dung amunsi, ‘O Sol, O Sol! Ne yok piyok aduk nepido?’ pusi neyok nekithan isi lamthe arju hlongo. 8La amun ne angthan duno, ‘Hemphu, nang inghote?’ Anang neyok pulo, ‘Nang ingho yok honjat wangpido, hanesi la Najaret Jisu.’ 9Nelok kido abang ta katha-angpo thek hlongo; manta neyok nekithan asike wang-arju hlong yongta alamthepo abhu hlonghle yongot. 10La aphel ne arjulo, ‘O Hemphu, ne pot inghol nang?’ La-amun Hemphu nethano, ‘Ingthurne, Damaskas yok lutdamot; aro nang katiki nange potsi pachipsi do, labang alam lalongsi nang than detne.’ 11La aturu po kikar-plam apot nemek kithekthe det, nelok hel ari otsi Damaskas yok damo. 12“La-aphel labang arongpe long kido ahuwit Jihudi hel asitem anang kachitha-ang Ananiyas amen pusi kanong kimeng arleng ihut, 13nedung wango aro nikung arjap si anang thano, ‘Ei korte Sol po, nang mek thekngot!’ La-aporsi ne amek thek phakngo aro anangyok thekngo. 14La-amun anang nipulo, ‘Nang ke ili atono sal-lar hel Arnam nangyok anang neng kihang alamthe kithek yok aro dhorom kangthirpo yok pathek nang, aro anang angho lamthe arjuhlong, la-anat nangyok arwal tango; 15piyok pu tene pipotsi thek hlongo, arju hlongo, ahuwit arleng angot anang phan labang kithanpon hakhi chiplang hlonge. 16Aro minon piyok pabhem dolang? Thurnot, aro baptist chiplangsi, nang bithang pap hel cham pangthir not.’

Bang-Ajat Adung Pol poyok Kitol

17“La-aphel ne Jerusalemyok wang phaksi, Arnam ahem long kapingkit jong amun, artihet hlongsi anangyok thekngo. 18Anang neyok pulo, ‘Parjang ngot, aro Jerusalem tikangne dam sirak, piyok pu tene labang arleng hel nelamthe hakhi kipipo chidengde ye.’ 19La-amun ne pulo, ‘O Hemphu, ne nangyok kikrol abangyok Jihudi Arnam ahemten pam-thengsi akrol long kithal, 20aro nang hakhi kipi Istiphenpo yok kamari amun, nebithang adung arjap si chikeng dunsi, anangyok kamari arleng hel ape-rik ensi lalong kido.’ Labang alam anali bithang than un. 21La-apor Hemphu neyok pulo, ‘Damot; piyok pu tene akaholo kido Bang-ajat abang adung ne nang toldo.” 22Labang adengyok anang lam onesi, anali hangsolsi pulo, “Labadi arlengyok pirthimipe para mari minang; piyok pu tene anangyok kihreng kido michangche.” 23Anali hangsol solsi, anali pe hel wardetsi, angsong dhula kapangjar amun, 24hajar sonturi Roman aghaipo Pol po yok sonturi ahem arlo kapapon yok thano; aro anang yok ado pisi Jihudi hel piyok ladi chihang-hlokdo, labangpo kithan-un aphan, anangyok sabuk pamsi karju tolyok thano. 25Latang si anangyok sabuk kipamyok arik kibam amun, Pol po adung arjapsi kido aphoro sonturi aghai poyok pulo, “Ado kangwe Roman arlengyok sabuk kisapyok kanong long ajakong doma?” 26Aphoro sonturi aghaipo labang alam arjusi, hajar isi sonturi aghaipo adungyok damsi pulo, “Nang pot katiki yok chirondo? Piyok pu tene labangpo Roman arleng.” 27La-amun hajar sonturi aghaipo Pol poyok damsi arjulo, “Nang nethannot, nang Roman arleng ma?” Anang pulo, “Oik.” 28Hajar sonturi aghaipo pulo, “Ne nohok ako-ong thok tangsi bangpo asal aphangpo hlongo.” Pol po pulo, “Ne ke kiplang pen-pan hlongo.” 29La-amun inghosi Pol poyok bisar-kahonthe yok kido, anali la-aporsi anang para chikak detno; aro hajar sonturi aghaipo Pol poyok Roman arleng pusi than-unsi, anang bithang hirkuli kibam apot, chiphere phakngo.

Pol po Ason Amel Ango Kaparjap

30La-aphel arni Jihudi hel Pol poyok potsi ado kipi, labang khanang alampo kithan-un aneng si hajar sonturi aghaipo anangyok phloksi, bangthe hel aro ason amel ahuwit kachingrum yok than parjulo; aro Pol poyok wang pasunsi anali ngo parjapmo.

Currently Selected:

ADUNHEL 22: AMRI-BSI

Highlight

Copy