ADUNHEL 21

Pol po Jerusalem yok Kidam

1Hali anali para chikaksi, jahaj pen Kos lang-lompe yok damsi, aphel arni Rodas lang-lompe hlongo; 2aro lalong para Patara yok damsi, labang athem Phoyenikiya yok kidam jahaj isi hlongsi, hali lalong arlusi damjongo. 3La aphel Saipras langlompe theksi, bangpo para debera aga tikangsi, Siriya alongriyok damsi, Tayar arongpe long suno; piyok pu tene jahaj po bihini kapasunme kido. 4Labang athem adun helyok angkhan kikrol arleng thek hlongsi, hali lalong hathi irul dolo; anali Jiuli-Kangthir para hlongsi Pol po Jerusalem dam nangne pusi thano. 5Labang bekso adin dosi hali chikaksi kidamjong amun, anali so, arloso ahuwit ta rongpe para olesi langpe akungyok hali thon duno; aro langpepe akung hali tarhuksi pingkitsi, lalongsi ihut para ihut chirdomsi chipadisi, hali jahaj along arlulo; 6manta lahel anali abithang hemyok chirulsi damo. 7Hali jahaj pen Tayar para Polemas yok hlengsi, langpe aduwar kidam pajut no; aro lalong kortehel yok kardom pisi, anali pen inirsi dolo. 8La-aphel arni hali lalong para damsi Sisiriya yok hlengsi; aro bang thorok isi asitem kime-alamthe kapahar arnam asal katiki Philip po, ahem lut damsi, anali pensi dodun no. 9Aro anang turki alam kithanpon bang-phili pihan ki-en-eh so-arlo kido. 10Hali bekso adin lalong kido amun, Judiya para Agabas amen ihut turki kiwang. 11Anang hali dung wangsi, Polpo apongho ensi, anang keng-ari chibamsi pulo, “Jiuli-Kangthir labang alam pudo, ‘Ingho pongho ape, labang arleng poyok Jerusalem long Jihudi hel ladisi bamsi, Bang-ajat arideng champiye.’ ” 12Hali lamehel alam arjusi hali pen lalong kido arleng hel Pol poyok Jerusalem kidamde yok chingdukngo. 13La-apor Pol po pulo, “Nali suru-surusi ne ingthin panghodak si, nali pot ote do? Piyok pu tene Hemphu Jisu amen aphan, neyok Jerusalem long nekibam detke kalek, kithiyok ta trepsi do.” 14Anang hali lam kimengme anat, hali doklipsi pulo, “Hemphu pot ahisa, labang pachok minang.” 15La-aphel hali boi-bihini chihonjoksi Jerusalem yok damsi dolo. 16Aro Sesariya para angkhan adun hali pen angkidun; aro Mason amen Saipras langlompe arleng anang aporong adun ahem hali don badi kido alam kido, anang yok wano.

Pol po Jems poyok Kachiklangdam

17Hali Jerusalem long wang kihleng amun, kikrol kortehel anang arongpen hali chingdeno. 18La-aphel arni Pol po hali pen Jems po ahem lutno; aro kachikruk long akisarhel ahuwit lalong wang kido. 19Lalong Pol po anali chirdomsi, Arnam anang sal katiki longpara Bang-ajat asitem potsi tikilo, labang alam kido kangwe alam isi para isi than detno. 20Bang alam po arjusi, anali Arnam amen parklamo; aro anangyok pulo, “Ei korte Pol po, nang thek do, Jihudi hel asitem kikrol konbak hajar arleng do; aro lahel ahuwit kanongyok anang kipi abango. 21Manta nang lam anali a-odi hlongo, nangke tang Bang-ajat asitem kido Jihudi helyok, Mosi po akanong patikang yok paklangsi thando tang, lake anali asohel yok sunnot ote nangnelo, aro Jihudi abi-pun ateng mengdun nangnelo. 22Tene pot tiki nang? Nang wangdo pusi anali arjudo. 23Lasi hali nangyok isi alam nang pubang, nang bangpone tiki; hali seme-kitang arleng bang-phili do; 24analiyok ponsi, inansi abang chipangthir, aro tang si anali aphu-achu kangtep ayok nang nohok pidunot. La-amun nanglam a-udi parju une, labang parake kime chokche, manta nang bithang Mosi po kanong mengsi tikido pusi rat ahuwit ayok pathek nang. 25Manta Bang-ajat hel asitem kikrol abang alamke, arnam kangton, cho-jun, lale awi, lale angphun kiber ape a-ok kicho, aro kidonerhel para abithang yok kachiterek alamhel ke hali chipachip krengsi analiyok lo wisi hlolo.” 26Lasi Pol po bang arleng helyok ensi, aphel arni anali abang chipangthirsi, kachirdom ahem lutsi, nali abang-ten aphan, buli karklipi para kapangthir ki-or arniyok, kachipangthir abi-pun nikan-chok nange, parjulo aro abangten banta pajiro.

Kachirdom Ahemlong Pol poyok Kinep

27Manta Ni-thorok isi ki-orbo arni Asia alongri para kiwang Jihudihel anangyok Arnam ahem long theksi, ahuwit rat helyok ahul pawang dutsi, Pol po yok otsi pulo, 28“Ei Israyel arleng hel, wangrap mot! Inghosi ili jatpo, kanong aro labang athempo panghosi ahuwit athem long ahuwit arlengyok paklang ponsi do, anangsi lalo. La aparta, anang Grik arleng helyok kachirdom ahem long wang-palutsi, labang kangthir athempo pasuwalo.” 29Piyok pu tene anali angota Trophimas amen Ephisiya ihut po yok long thekngo aro Pol po anangyok Arnam ahem arloyok kiwan pusi, anali kachiron. 30Laparake rongpe chingthur detsi, arleng hel wang ole pungsi; anali Pol po yok nepsi, kachirdom ahem para mokolyok wungsi pono; aro photsi owahel inghap klakngo. 31Labadi si anali Pol po yok kamariyok kiron amunsi, Jerusalem dungsi ahul wangdo pusi, hajar sonturi aghaipo arjulo. 32Lajongsi aphoro sonturi aghaipo angkhan kithe-kidingyok ensi rat adung parjang lep si wango. Lalong anali hajar sonturi aghaipo aro sonturi helyok theksi, Pol po yok kipam tikango. 33La aphel hajar sonturi aghaipo Pol po adungyok wang si, anangyok nepsi, hirkuli jeng-ni pen anang yok kibamyok thano; laparake anang arjulo, “Labang arlengpo ke inghote, aro pot te katiki?” 34La-amun arleng hel asitem kamprek arleng kamprek alamthe pensi chihangsol solo apot, kachihang-hlok anat, anang bangpo alam aron potsi kidolone chipachip thekthe si, Pol po yok sonturi ahem palut pon ayok thano. 35Latang si don-karlu amun, arleng hel akang anat, sonturi helsi anangyok rung dangsi pon hlongo; 36piyok pu tene arleng hel dun-pungsi hangsol solsi pulo, “Anangyok mari not”.

Pol po Abithangyok Kachiral

37La-aphel Pol poyok sonturihel kido hem arlo long kipone amunsi, anang hajar sonturi aghaipo yok pulo, “Ne nangyok penebak pu un-eh ma?” 38Sonturi aghaipo pulo, “Nang Grik alam thanthek ma? Ijip arlengpo bekso ango ahul kipawang asitem hajar-phili sonturi yok pachonsi ingnam ayok ki-en pon, nang labang arlengpo kalekma?” 39Manta Pol po pulo, “Ne ke Silikiya alongri Tarsas arongpe long Jihudi arleng, ne akibek arongpe arleng kalek. Nang chingduk do arleng helyok lam kithanyok apor nepinot.” 40Sonturi aghaipo apor kipisi, Pol po don polong athak arjapsi, arleng helyok ari pen kithane atewa pilo; la-apor anali kidoklip amun, Pol po Hibru alampen analiyok lam thano:

Currently Selected:

ADUNHEL 21: AMRI-BSI

Highlight

Copy