ADUNHEL 20

Mesidoniya Pen Akhaya Alongriyok kidam

1La-ahul ingsamo apot, Pol po kikrol adun helyok taramsi nengrungsi, chipadi tang aphel Mesidoniya yok kidamyok olelo. 2La-parake anang lamehel angbong artingsi, analiyok neng rungo aro anang Grik alongriyok hlengo. 3Lalong anang chiklo jonthom dosi, langpe aduwar Siriya alongri kidamyok chihonjok ngo apot, Jihudi arleng hel anangyok lang un-eh yongot, lasi anang Mesidoniya agasi kachiruyok chipachipmo. 4Beriya arongpe long Parnes po aso po Sopatar po, aro Thesalonika along Aristarsas po pen Sekundas poke Darbe arongpe long Gaiyas po aro Timothi po, Asia long Tisikas po aro Trophimas po, labang ahuwit Asia long yok anang pen duno. 5Manta arleng hel ango dam dapsi, Troyas long hali phan inghongsi kido. 6La-aphel Onga Ahim kamai adin dam tangsi, hali Philipi para jahaj pen damsi, ni-phongo aphel Troyas long analiyok chiloksi, lalong hali hat-arul dolo.

Pol po Troyas long Aphel Kidam

7Ni-arni anithu hali him kangbeng kichoyok kachingrum apot, Pol po analiyok lamthe paklang phit-phatsi, aro la-aphel arnike kidam jongyok chihonjok ngo apot, ajo-jarlo yok anang lam than jongsi kido. 8Aro hali kachingrum ahem athak apulu po long ako-ong me lursi kido. 9Lalong inghapso adung iningsi kido Eutikhas pusi ihut riso arleng amek jang sit si kido; Pol po apor padingsi lam kithan jong amunsi, anang amek jangsitno aro anang thak-kithom athak para alingyok jangklungo; lalong anangyok akithisi rungsi wano. 10Manta Pol po wang sundunsi, anangyok arbaksi pulo, “Nali surujo yek; piyok pu tene anang abang arlo ajiu do.” 11Lapara Pol po athak apulu longyok damsi him ingbengo aro chosi, apor ding si, lake adap arni kiwang yok lam chithansi kido aphel, ladisi damo. 12Aro anali labang risopo yok akihreng hlongsi, neng ingsamo.

Troyas para Miletas yok Kidam

13Manta tilong pen pango dam dapsi, Pol poyok Asos rongpeyok jahaj pen lalong yok damo; piyok pu tene anang abithang akeng pen kidame anang kido apot, ladisi kipadam yok kithan. 14Asos arongpe long anang hali pen chiphochaksi, hali anangyok tilong athak parlusi, Mitileni langlompe longyok damsi dolo. 15Lalong para jahajpen damsi, aphel arni Khayos langlom pe adung hlengo aro inirsi aphel hali Samos langlompe pahlongsi aro la arni si Miletas rongpeyok wango. 16Piyok pu tene Pol po Asia along apor padingdesi, Ephisiya arpatsi kidam yok chipachipmo; piyok pu tene un-putang tene, anang Pentikos-kamai arni Jerusalem kihlengyok parjango.

Pol po Ephisiya Phu-phangyok Kijut Alam Kithan

17La-aphel Pol po Miletas para Ephisiya yok arleng tolsi, kachikruk phu-phang hel yok pataramsi wano. 18Anali anang dungyok kiwang amun anang analiyok pulo, “Ne Asia alongri kiwang cheng arni para nali pen aporten dosi, chinom hopsi aro mek-kri pajangsi, 19aro Jihudi arleng hel kilang setset apotsi nelong honjat wangta pot badi Hemphu murkiya asal tikilo, 20aro pot badi nalingot, pene bak kiwang alam kaparju yok do, aro rat ango, aro adonten naliyok lamthe paklangpon yok seleple yongot. 21Aro Arnamyok neng kachipharlep aro Hemphu Jisu Khristo yok kikrol alamthe Jihudi aro Grik hel ango hakhi pilo; la- ahuwit nali abithang thek. 22Aro minon langot, ne Jiuli-Kangthiryok mengketsi Jerusalem yok dam hlong do; lalong neyok pot chiplangene, bangpo than un-eh. 23Kithan un ahol ke, aduk-tap neyok inghong sido aro arongpe ten nelong Juli-Kangthir neyok lam kipathan hakhi pisi do. 24Manta ne jiubong nengdok puke beksota alekhot en-ehlo, aro kipatiki asal kapatang ayok pango pon do, aro Hemphu Jisu para kihlong ne kapahar asal, Arnam kajinso kime-alamthe aphan hakhi kipiyok neng pido. 25“Aro minon langot, ingho asitem ne Arnam-alongri alamthe paharsi artingo, lake nali lo, nali nemahang aro thek-phak hlonghle ye, labang ne chithan un do. 26Lasi apotsi ne ahuwit awi para ingthir phlen, labang hakhi mini nalipi do; 27piyok pu tene naliyok Arnam ahuwit aron alam kaparjuyok seleple yongot. 28Nali abithang yok, aro Jiuli-Kangthir pen bherabik apal hel asitem naliyok kilang phuphang pangningo, labang ahuwit bherabik apal me-at chilangpon, jaiyok Arnam abithang awi pen kachikruk yok namsi eno, labang poyok al-enpon. 29Ne katikang aphel nali sitem timit hel nali sitem lutsi, bherabik apal yok kajinsose aneng paklange. 30Aro nali sitem parata angkhan arleng olesi, lahel aphel-phel adun helyok hungsi kiponyok kamprek alam than ne, bangpo ne than-un do. 31Lasi nali mesone chinghongne do; aro ne ke nengkan-kithom ayok adap-anuwe nali abang ten aphan nemek-kri pajangsi ahari kipiyok seleple yongot, labang hel chipurkine do. 32“Minon, Arnam naliyok krol-kimeng kapachan ponyok, aro kangthir phlen kachiplang ahuwit asitem bor-eh kihlong aden nali pi-une, anangyok aro anang kajinso alamtheyok naliyok nali pek det do. 33Bang hel ser, lale rupa, lale pe-rik along ne ke alot ingjong. 34Ne aro nelokjor kanange hel ne-ripensi nerapmo, labang nali bithang than undo. 35Ahuwit alam ne naliyok arjan nali paklango; nali labadi ne sal tikisi, ki-un eh hel ayok rapdun nange; aro Hemphu Jisu alamthe neng chipurki nange; anang abithang kipu, te ‘Ki-en yok ke banta kipi bor-eh dochot.’” 36Labadi alam thansi, anang tarhuksi ahuwit pen pingkit no; 37La aphel ahuwit ta surujo lo; aro Pol po yok chirbaksi angphun otsi mungo, 38ne mahang aro thek hlonghle ye, kipu alam anang kithan, la-anat watsi neng-doho si, anali anangyok jahajpo yok wang thon duno.

Currently Selected:

ADUNHEL 20: AMRI-BSI

Highlight

Copy