KEYUM KERO 23
23
Sarahke Siname
1Sarahke yéname dítak língko kolang takying annyi kolang dítak kínídko ito. 2Kanaan among lokke Hebron doolunglo bí sikai. Abraham simang teyong delo gííma-siimo ankíem delokke Sarah ke legape kappe emla aato.
3Simang dem delo mepo pala, Abraham Hittit ami kídílo gíla bulum poto, 4“Ngo noluke aralo, yégo magoona mibo amiko. Ngome nolu, ngok méng simang sime yusipeko amongko redope bilangka.”
5Hittit ami kídíde Abrahamme poto, 6“Ngoluke agomem ruutum no tattoka. No ngoluk aralo borona ruutum kone, ngoluke aralokke gaiyalumna agolo nok méng simang dem yutoka. Nok méng simangdem yudope ngoluke aralok sékote ngoluke agomem tolíkmape imayé delokke yumomape imayé.”
7Bulum Abraham kumdola, 8poto, “Nolu ngom simangem yumope emla tolík dumílo, dekemílo Joharke oo Ephronme ngok legape pobika. 9Bíkke arík abelo duuna, Makpelahke díítum bupík dem, ngome nolu takamke kangkolo apíípe remola, ngokke simang yupompe idope bím íngkí bika.”
10Doolung yabgo eyab lokke kebang lupom delo, Ephron agísu Hittit ami kídí raadang delo duumín gedo. Depeila, takam tatkolo bí agíe poyansuto, 11“Ma, ngok ruutum, ngok ami kídí takam tatkoso, ngokke ponamem tattoka, ngo nom díítum bupík demlang delokke dei-degong arík demte bidung. No nokke simangem delo yutoka.”
12Delo Abraham bí kebang ami kídardem kumtoku. 13Delo bí Ephron me poto, “Nom ngo íngkídung, ngom tatbilangka, ngo arík dem ríkbupe reyé, ngok renam sim torík subika, delomin ngo simangem yuyéne.”
14Ephron poyansuto, 15“Ngok ruutum, among arede baldín língko appi komin idune, iname ngonyik pénsamlo ingkoko kabosudun? Nok simang dem yutoka.”
16Abraham Ephronke agomdem torík sula, bépar ina kídíke sapdupe, Ephronke pokampe, ami takam kangkolo, nokdi língko appiko saplenla, bím bito.
17Depeila Ephronke, Mamre lok sanggo danlo duuna Makpelah among de delokke rísuloope kana arík de, díítum bupíkde, delokke esing-ééng kídí tabung de Abraham keepe ikai. 18Kebang delo deke takamde, Abraham ke ekurape ikai emla Hittit ami duuna tabude tolík bila kangkén biyinto.
19Kanaan among delokke díítum bupík delo Abraham bí bíkke méng Sarah me yusito. 20Depeila Hittit ami delokke díítum bupík delang aríkde, Abrahamke ago amongpe ila, bíkke ekurape ikai.
Currently Selected:
KEYUM KERO 23: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
