KEYUM KERO 20

Abraham Lang Abimelek

1Delokrongem Kadesh kelang Shur pénsamlo duuna Negeb moole danpe Abraham enla duupoto; delokke Gerarpe byaktoku. 2Delo Abraham bíkke mime Sarahme, “Bí ngokke bírme,” emto. Dem tatla Gerar lokke roja Abimelek, Sarahme bík mimepe langaato. 3Idola delo yoh delo, Shédíbí Abimelekme immalo pokanto, “No mime sim laanam legape siyé, kapeila bí akon amike ménge.”

4Delo Abimelek mimerupe iyamangada, depeila bí poto, “E Ruutum, atí kénmana amiem no petyénía? 5Bí agíe, ‘Ngok bírme,’ emmanía? Mime site agíe, ‘Ngokke bíroe,’ emsuto. Ngo agér sim aapíe deedola imemmape idung.”

6Delo immalo Shédíbí poto, “Aroe, no agér sim aapíe deedola idung. Ngok keralo nom paab imomadope, ngomin gagbom tone; depeila, ngo nom bíme ukkí momang. 7Supak ami sokke mimepe imolangkuka, kapeila bí kaaluna amiko, bí nok legape kumbimílo no turyé. Idola no mimepe imokumamílo, no lang nok erang tabunge siyinyé.”

8Abimelek rokompe darepla legang tabungem, bík ami kídíem popaala, bulu peso alooto. 9Delo Abrahamme Abimelek tomala poto, “Ngolum kape no sikepe ikan? Ngokke among so lang ngok teyoso sikena ankí kenoe aadope ngo nok keralo ingko paab koda iton? No ngok teyolo iperumanam agérko ito.” 10Abimelek Abrahamme potoku, “No ingkoko míílada sipe iton?”

11Abraham poyansuto, “So amoso Shédíme pesona kamang. Iname, ngok mime legape ngom mokapelo míílamin ngo sikepe itone. 12Delok teyolo, aropekom bí ngok bírme. Kapeila, bí ngok abu lokke ome, idola ngom ona ane lokkemang, depeila bí ngokkepe ikai.” 13“Edílo Shédíbí ngom magoo dope emla tomlentodí, delo ngo mime sim sipe pobo suto, ‘Ingkona amolo gígoyédí delo ngom ayasula ngok bíroe emla no pobilangka.’ ”

14Delo Abimelek, Abrahamme gooru, sobén, mér emlang mime milope abíl lok bila mimedem bitoku. 15Depe irongem Abimelek poto, “Kaju kaatola, ngok amosim nom taaya bidung, nok mííba sukolo duulangka.” 16Sarahme bí poto, “Ngo nok bíroem nokdi abalem éjarko bito; nokke yéjinamem takame kaadope.”

17Delo Abraham Shédíme kumsuto. Depeila Shédíbí Abimelek melang bíkke mimem delokke abíl mime kídíem, koo gedope ipíttoku. 18Kapeila Abrahamke mime Sarahke legape, Ruutum bí Abimelekke ekumlo duuna mime tabungke akiieme koo gemadope itumtuai.

Currently Selected:

KEYUM KERO 20: adiBSI

Highlight

Copy