KEYUM KERO 13
13
Abram Kelang Lotke Ruutum Rarung Ingusuname
1Ijipt delok Abram lang bíkke mime delokke bíkke bomnam ato-siro tabung delang Lot bulu Negeb amongpe gítoku. 2Abrambí gooru-sobén, arem tadok delokke uun em bojéko bomla miremtuai. 3Negeb delok bí gílangkula Ai kelang Bethel pénsamlo, kerape bíkke tombu hoko moolop delo píítoku. 4Delo kerangke píko runggu delo Ruutum me kumsuto. 5Delo Abram kíng gímín gena Lotkom sobéne lang mére bojéko kato. 6Depeila bínyi lekope duubosudope among yétade pííram bito, kapeila bínyike simon-silide bojé along bosuto. 7Delok teyolo Abramke gooru sobénem kaabomnelang Lotke gooru sobénem kaabomna kídíete lutímínsuto. Delo longe kídí delo Kanaan amielang Perijjit ami kídíe amongdem duubomto. 8Depeila Abrambí Lotme pobosuto, “Ngonyike pénsam lolang ngonyike simon siliem kaabomna kídí pénsamlo lumín kabosupe aimang, kapeila ngonyi erang atele. 9Nok keraso among tabusi kamanía? Ngonyi yépan bosulape. Nok mííbanamem topongtoka. No lakkédanem toyémílo ngo lakbígem delokke no lakbígem toyémílo ngo lakkém toyé.” 10Lot kanggo sudola kaatoname Jordan asi toktíng tabude Joar loope asi kala Ijipt among kísape ido, delokke Ruutum ke etor torgonam among kísape ido. Sim Sodom emlang Gomorrah em Ruutum ke nyokmo mangadape ibosuto. 11Depeila Lotbí Jordan asi toktíng tabudem toto, delokke Lot sanggodanpe byakla bínyi yépan bosuto. 12Abram bí Kanaan amolo duuto, delokke Lotbí yiibe among delokke doolung luune kídílo dungala bíkke tombu ekumem Sodom doolung loope muato. 13Sodom lokke ami kídíe atírumana, paab agérlo gértína amipe Ruutum ke keralo yéto. 14Lotke duupansurongem, Abramme Ruutum bí poto, “Nokke dungko delok no línggí-sokko, sanggo-anggoem kanggo sutola; 15Nok kaanam among tabusim, ngo nomlang nok otíng-oyinem yénam takam legape bisuyé. 16Ngo nokke otíng oyinem among sokke demul kísape imoyé. Among demul sim saplanade nok otíng-oyin emkom saplayé. 17No darepla among sime, ape pelang adoope magootoka, kapeila sim nom ngo biyé.” 18Delokrodem Abrambí bíkke tombuem taala, Hibron ayir lokke Mamrelo duuna Kumsuko esing kako delo dungadola, Ruutum kelo rungguko píto.
Currently Selected:
KEYUM KERO 13: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
