TOMLÍKNAM 1

1Ayanam Theopil, ngokke kerangke kitabdelo, Jisuke inamkídí takamem delokke bíkke agér ilenlokke luyilnam takamem ilangala, 2bíme teyong amope langku mangadape ngo atto. Bím laasang kumang adape, Deena Aid pauarlok tomlíknam kídípe idope bíkke ullennam ami kídílo lugap líkto. 3Bíkke sirongem, so ami kídí so bí agísuem lengkansuto delokke bíkke turla dungkunam pormanem bojéko lengkanto. Bí looying appi kope bulum lengkansula delokke Shédíke yéta legangem pobito. 4Lekoteng, bíkke bulum apim dobo sudungem, bí sim ngiitom sim pobito; “Jirusalem em gínyo mapeka, idola ngokke ponamem noluke tatnam ngokke Yayike pébisunam amanem toya langka. 5Kapeila Joan bí asilok baptis ito, idakkom loonyi longumko doorongem nolum Deena Aidlok baptis iyé.”

Jisume Teyong Amope Laasang Kuname

6Dekepe iname edílo bulu duudum sutodí delo bulu bím íngkíto, “Ruutume, no supak Israel amongem mosing dakkunía?” 7Bí bulum poto, “Abuke agí ralnamlok iruunam idí tarígem kénnamde nolu kemang. 8Idokom Deena Aide nolukíng pííyém nolu pauarem paayé; delokrongem nolu Jirusalemlo, Judialo, Samarilo, delokke among kéényung kerelope ngokke hakiipe iyé.” 9Bíkke depe porongem, buluke amig keralok Jisume laasang bomkaku, delo doomuge bím bulu kaapa yimadope yéllum bomkaku.

10Jisuke enku namem kaala, bulu taleng danpe kaatí míndungem, menang asak midum annyiko yalunna ege galuk geneke buluke ampedelo dagato. 11Bulu pokai, “Galillokke ami kídía, nolu kapeila taleng telo kaatí dakla so dakdune? Nolu kelokke teyong amope laasang kunam, Jisu bí noluke bím teyong amope endakkuem kaanam kísa pakpe aalat yéku.”

Judaske Ayane

12Delokrongem bulu Olib Dííte lokke Jirusalempe gítoku. De taon lokke mail píímango nakope mooteto. 13Bulu doolung pííyé kudem, teyo danpe buluke dungko ruumlo aatoku. Delo duuna kídíde, Pitor, Joan, Jemslang Andria; Philiplang Thoma, Bartholoma lang Mati, Alphaike oo Jemslang, Jelot Simon, delokke Jemske oo Juda bulu. 14Bulu takame, mime ane kolang, Jisuke ane Marilang delokke bíkke bíro kídíe duudum sudola lekope kumyar bosudungai.

15Dekepe ido longe kídardelo Pitor bí míngkesuna kídí midum língko kolang íying annyi kebang gooradelo dakrepla pokai, 16“Bíro kídía Jisume umna kídíem gílíkna Judaske legangem Dabidke nappalok kerango pekai Deena Aidke pobinam dooying kitab agome apíínape ikai. 17Judas bí ngoluke aralok akoníai delokke ngoluke sikena agér tarongem paabo supe nakuai.”

18(Bíkke atímana agér irelok, Judas bí aríkko reto; delo bí opet sukai; bíkke akiie bukkéla bíkke akii ayin takame lenkai. 19Jirusalemlo duuna miyonge dem tayyinto, dekepe ila bulu dem amodem buluke agompe Akeldama emto, depe emnamde Iyyi Arík.)

20Pitor bí poto, legadem Mirilunggu kitablo attung:

“Bíkke amode rongngam daklangka;

sékote bíkke dungko delo duuma daklangka,#Miri 69:25; 109:8

delokke bíkke agérem akone iyan daklangka.

21“Delok legape ngoluke gooralok Ruutum Jisuke gíko mipílo ngolukíng yémín ayar mínna ami akonko ulkupe aido. 22Bí baptis ina Joanke yédu delokke ila Jisume ngolu kelokke laasang dokulope lekope ngolukíng yémín gena amipe ipe aido. Kapeila sok amikídí sok akone bíkke gerep kunamem ngolum hakii bibo supena akonpe ipe aido.”

23Dekepe iname bulu Barsabba emnam Joseph (Justu emlangkom mandungai) delokke Mattia bínyike amínem mínkanto. 24Delokrongem bulu sikepe kumlíkto, “Ruutume, no mipilke aapí ainangem kéndung. Sok annyi sokke sékom no ullentodí dem ngolum lengkan toyika. 25Bí Judaske agí yétalo gínyonam tomlíknam agérsim iyé.” 26Delokrongem bulu luturi soname, delo Mattiake amíne lento; dekepe ila bí midum íying kolang atel delo aatemkai.

Currently Selected:

TOMLÍKNAM 1: adiBSI

Highlight

Copy