Titus 2

Txoj Kev Ntseeg Tseeb

1Tiamsis Titus, koj yuavtsum qhia kom yog rawsli txoj kev ntseeg tseeb. 2Qhia cov txivneej uas laus lawm kom lawv ua neeg xyuamxim, paubcai, thiab paub tswj lawv tuskheej; kom lawv muab siab rau ntseeg, hlub lwmtus, thiab ua taus siabntev. 3Ib yam nkaus li ntawd, qhia kom cov pojniam uas laus lawm yuavtsum ua lawv lub neej kom dawbhuv. Tsis txhob ua neeg taugxaiv lossis quavcawv, tiamsis kom lawv yuavtsum qhia txog tej yam uas zoo, 4lawv thiaj yuav cobqhia tau cov pojniam hluas kom txawj hlub lawv tej txiv thiab tej menyuam, 5kom lawv paub tswj lawv tuskheej thiab ua neeg dawbhuv, kom lawv paub tu vaj tu tsev, muaj lub siabdawb siabzoo, thiab mloog lawv tej txiv lus, kom thiaj yuav tsis muaj leejtwg thuam tau Vajtswv Txojlus.

6Koj yuavtsum qhia cov tub hluas ib yam nkaus, kom lawv paub tswj lawv tuskheej. 7Txhua yam uas koj ua, koj yuavtsum ua ib tug qauv zoo rau lawv xyaum. Thaum koj qhia Vajtswv Txojlus koj yuavtsum qhia ncaj qhia ncees thiab ua tibzoo qhia tiag-tiag. 8Ua tibzoo hais koj tej lus, thiaj tsis muaj leejtwg thuam tau koj, kom cov neeg uas ntxub koj thiaj yuav tau kev txajmuag los ntawm qhov uas lawv tsis muaj ib lolus phem uas yuav hais tau peb.

9Qhia cov tubqhe kom lawv nyias mloog nyias tus tswv lus, thiab ua txhua yam kom haum tus tswv lub siab. Tsis txhob cav ncauj, 10thiab tsis txhob nyiag tej uas yog tus tswv li, tiamsis lawv yuavtsum ua lawv lub neej kom qhia tau hais tias lawv yog neeg zoo thiab ncajncees, kom txhua yam uas lawv ua thiaj yuav ua rau sawvdaws saib taus Vajtswv uas yog peb tus Cawmseej tej lus qhia.

11Rauqhov Vajtswv twb qhia Nws txoj hmoovhlub uas yog kev dim txim rau sawvdaws paub lawm. 12Vajtswv txoj hmoovhlub ntawd yog qhia kom peb tso lub neej uas ua li tibneeg tsis paub Vajtswv thiab kev ntshaw khoom ntiajteb tseg, kom peb paub ua lub neej uas txawj tswj peb tuskheej, ncajncees, thiab dawbhuv nyob rau hauv lub ntiajteb no, 13uas peb tseem tabtom tosntsoov hnub uas peb ciasiab rau, uas yog hnub peb tus Vajtswv uas muaj hwjchim thiab tus Cawmseej Yexus Khetos#2:13: peb tus Vajtswv uas muaj hwjchim thiab tus Cawmseej Yexus Khetos; lossis Vajtswv tus uas muaj hwjchim thiab peb tus Cawmseej Yexus Khetos. nrog tus tshwjchim uas ci ntsa-iab rovqab los. 14Yexus Khetos tau muab Nws tuskheej pub rau peb, cawm kom peb dim ntawm txhua yam kev phem, thiab ntxuav peb kom peb ua tau ib haivneeg uas dawbhuv los ua Nws tug, uas yog ib haivneeg uas kubsiab lug yuav ua yam zoo xwb. #Nnkauj 130:8; Khiav 19:5; 2Kev 4:20; 7:6; 14:2; 1Pet 2:9

15Tej no lau, yog tej uas tsimnyog koj yuavtsum tau muab qhia rau sawvdaws. Siv koj lub meejmom thiab lub hwjchim los txhawb thiab ntuas sawvdaws. Tsis txhob cia ib tug neeg twg saib tsis taus koj.

Currently Selected:

Titus 2: MWW2022

Highlight

Copy