Titus 1

1Kuv yog Paulus, uas yog Vajtswv ib tug tubtxib thiab yog Yexus Khetos ib tug timthawj.

Vajtswv tau xaiv kuv thiab txib kuv mus pab cov neeg uas Vajtswv tau xaiv cia lawm kom lawv txoj kev ntseeg lojhlob thiab kom lawv paub qhov tseeb uas yuav coj lawv kom muaj lub neej dawbhuv, 2lawv thiaj yuav ciasiab tau hais tias lawv yuav muaj txojsia ntev dhawv mus ibtxhis. Thaum uas twb tsis tau tsim lub ntiajteb, Vajtswv tau coglus tseg lawm hais tias nws yuav pub txojsia ntawd rau peb, nws hais li ntawd, nws yeej tsis dag li. 3Thaum txog lub sijhawm uas Vajtswv teem cia lawm, Vajtswv tau muab zaj no los nthuav tawm rau sawvdaws. Vajtswv uas yog peb tus Cawmseej, nws tau muab zaj no rau kuv thiab kom kuv coj mus qhia rau sawvdaws.

4Titus, kuv sau tsab ntawv no tuaj rau koj, vim koj zooli kuv tus tub hauv txoj kev ntseeg uas wb muaj uake.

Thov Vajtswv uas yog peb Leejtxiv thiab Yexus Khetos uas yog peb tus Cawmseej pub txoj hmoovhlub thiab kev nyabxeeb rau nej. #2Klt 8:23; Kalat 2:3; 2Tim 4:10

Titus Tes Haujlwm Hauv Khetes

5Kuv cia koj nyob rau hauv lub povtxwv Khetes, kom koj thiaj yuav kho tau tej haujlwm uas tseem ua tsis tau tiav ntawd kom zoo tuaj, thiab tsa kom tau ib co txwjlaug nyob rau hauv txhua lub nroog. Ncontsoov tej lus uas kuv twb qhia rau koj lawm: 6tus txwjlaug yuavtsum yog ib tug uas tsis muaj leejtwg thuam tau; nws muaj tibtug pojniam xwb,#1:6: muaj tibtug pojniam xwb; lossis tsuas yuav pojniam tibzaug xwb. nws cov menyuam yuavtsum yog ib co uas ntseeg Vajtswv thiab tsis raug leejtwg thuam tau hais tias yog neeg lojleeb lossis tawv ncauj. #1Tim 3:2-7 7Vim tus thawjcoj hauv pawg ntseeg yog tus uas saib Vajtswv tes haujlwm, nws yuavtsum yog ib tug uas tsis muaj leejtwg thuam tau. Nws yuavtsum tsis txhob khavtheeb, tsis txhob npautaws sai, tsis txhob quavcawv, tsis txhob muaj lub siab nrujtsiv, tsis txhob ua tsis ncaj txog phab nyiajtxiag. 8Nws yuavtsum yog ib tug uas nyiam tostxais qhua thiab nyiam qhov zoo. Nws yuavtsum tswj tau nws tuskheej, ncajncees, dawbhuv, thiab tswj tau nws lub siab. 9Nws yuavtsum muab siab npuab Vajtswv tej lus uas yog lus tseeb thiab yog rawsli txoj kev ntseeg tiag. Yog nws ua li ntawd, nws thiaj yuav muaj cuabkav muab tau tej lus tseeb ntawd los txhawb tau lwmtus thiab thiaj yuav qhia tau qhov uas tsis yog lawm rau cov uas tawmtsam Txojlus tseeb ntawd.

10Rauqhov muaj coob leej yog neeg ntxeevsiab thiab hais tej lus uas tsis muaj qabhau ntxias lwmtus kom yuamkev, tshwjxeeb yog cov neeg Yudais uas tau los ntseeg Vajtswv lawm. 11Tsimnyog koj yuavtsum kom lawv kaw qhovncauj, rauqhov lawv ua rau tagnrho txhua tsev neeg muaj kev kubntxhov vim lawv muab tej uas twb tsis tsimnyog kiag li los qhia ua kev nrhiav nyiaj los ntawm txoj kev tsis ncajncees. 12Muaj ib tug xibhwb uas yog lawv cov neeg Khetes ntag, nws hais tias, “Cov neeg Khetes yeej ibtxwm yog neeg dag, phem npaum nkaus li tej tsiaj, thiab yog neeg tubnkeeg uas ntxias noj ntxias haus.”

13Tej lus uas hais ntawd yeej muaj tseeb tiag. Yogli ntawd, koj yuavtsum ntuas lawv kom hnyav, kom lawv txoj kev ntseeg thiajli yuav ruaj-khov, 14thiab lawv thiaj yuav tsis quavntsej txog tej dabneeg uas cov Yudais ibtxwm hais, thiab tsis mus mloog neeg tej kevcai qhia uas tsis yog qhov tseeb. 15Txhua yam yeej dawbhuv rau cov neeg uas dawbhuv; tiamsis yeej tsis muaj ib yam uas yuav dawbhuv rau cov neeg uas siabphem thiab tsis ntseeg Vajtswv li, rauqhov lawv lub siab thiab lawv tej kev xav puavleej phem tag huv tibsi. 16Lawv khav hais tias lawv paub Vajtswv kawg, tiamsis lawv tes haujlwm qhia tau tias lawv yeej tsis muaj Vajtswv. Lawv yog ib co neeg uas ntxim ntxub kawg li rau Vajtswv. Lawv tsis mloog Vajtswv lus, thiab yeej tsis tsimnyog tau ua ib yam dabtsi uas zoo hlo li.

Currently Selected:

Titus 1: MWW2022

Highlight

Copy