Loos 3

1Puas yog cov Yudais tsimtxiaj dua Lwm Haivneeg? Lossis qhov uas ua kevcai txiav ntawd muajnqis dabtsi? 2Yeej muajnqis rau txhua yam! Thawj qhov, yog Vajtswv muab Nws txojlus rau cov Yudais tuav. 3Tiamsis yog lawv qeeleej tsis ncajncees, puas txhais tau hais tias Vajtswv yuav tsis ncajncees thiab? 4Tsis yog li ntawd! Txawm yog txhua tus dag los Vajtswv yeej tsis dag. Rawsli Vajtswv Txojlus tau hais tseg hais tias,

“Thaum Koj haislus sawvdaws yeej yuav paub tias Koj hais tseeb;

thaum luag taug Koj zaj, sawvdaws yeej yuav paub tias Koj tsis tau ua txhaum.” #Nnkauj 51:4

5Tiamsis yog peb tej kev phem ua rau sawvdaws pom Vajtswv txoj kev ncajncees meej dua qub ntxiv, peb ho yuav hais licas? Peb yuav hais tias thaum Vajtswv rautxim rau peb, Nws ua tsis ncaj lawm no lov? (Kuv hais li neeg hais.) 6Tsis yog li ntawd! Yog tias Vajtswv tsis ncaj, Nws yuav ua licas txiavtxim rau neeg ntiajteb?

7Tiamsis yog kuv txoj kev tsis ncajncees ua rau sawvdaws pom Vajtswv tus tshwjchim loj dua qub thiab tseem ua rau Nws txoj kev ncajncees meej dua qub ntxiv, ua licas kuv tseem raug txim ib yam li tus neeg txhaum thiab? 8Yogli ntawd, uacas ho tsis hais tias, “Cia peb mus ua qhov phem kom peb tau qhov zoo”? Muaj qeeleej txobthuam kuv thiab lawv liam hais tias kuv yog tus uas hais cov lus ntawd ntag! Qhov lawv raug txim li ntawd yeej tsimnyog lawm.

Tsis Muaj Ib tug Neeg Ncajncees Li

9Yogli ntawd, peb cov uas yog neeg Yudais, puas yog peb zoo dua Lwm Haivneeg? Tsis yog li ntawd!#3:9: zoo dua Lwm Haivneeg? Tsis yog li ntawd!; lossis phem dua Lwm Haivneeg? Kuj yuav tsis yog li ntawd. Kuv twb qhia lawm hais tias tagnrho cov neeg Yudais thiab Lwm Haivneeg puavleej nyob hauvqab txoj kev txhaum lub hwjchim. 10Rawsli Vajtswv tej Lus hais tias:

“Yeej tsis muaj ib tug neeg ncajncees hlo li, #Nnkauj 14:1-3 (LXX); Nnkauj 53:1-3 (LXX)

11tsis muaj ib tug totaub

lossis nrhiav Vajtswv li.

12Txhua tus tau tig tawm ntawm Vajtswv mus lawm;

lawv txhua tus dhau mus ua neeg phem huv tibsi;

yeej tsis muaj ib tug uas ua qhov zooli, txawm yog tibtug xwb los twb tsis muaj.

13Lawv lub qa zoo ib yam li lub qhovntxa uas qhib lug cia;

lawv tus nplaig hais tej lus dag;

lawv daim dincauj muaj taug ib yam li taug nab. #Nnkauj 5:9 (LXX); Nnkauj 140:3

14Lawv lub qhovncauj puvnpo tej lus foom thiab lus iab lus daw. #Nnkauj 10:7 (LXX)

15Lawv txhais kotaw maj nroog rau txoj kev uas ua kom lwmtus ntshav nrog; #Yaxaya 59:7-8

16lawv mus txog twg, kev txomnyem thiab kev puastsuaj mus txog ntawd.

17Lawv yeej tsis paub txog txoj kev thajyeeb,

18lossis paub ntshai Vajtswv kiag li.” #Nnkauj 36:1

19Nimno peb paub tias txhua yam uas sau nyob rau hauv txoj Kevcai yog hais rau cov uas nyob hauvqab txoj Kevcai, kom txhua tus thiaj tsis muaj lus hais, thiab thiaj yuav coj tau tagnrho lub ntiajteb no los rau Vajtswv txoj kev txiavtxim. 20Rauqhov txhua tus uas ua rawsli txoj Kevcai qhia yeej tsis muaj ib tug ncajncees tabmeeg Vajtswv li; txoj kevcai ntawd tsuas qhia kom peb paub tias peb tau ua txhaum lawm no xwb. #Nnkauj 143:2; Kalat 2:16

Vajtswv Ua Rau Peb Ncajncees Tau Licas

21Tiamsis qhov uas nimno Vajtswv suav hais tias neeg ncajncees tabmeeg Vajtswv tsis yog vim txoj kevcai; Mauxes txoj Kevcai thiab cov xibhwb cev Vajtswv lus los kuj tau ua timkhawv hais txog zaj no. 22Vajtswv suav hais tias txhua tus uas los ntseeg Yexus Khetos yog neeg ncajncees. Vajtswv ua li ntawd rau txhua tus uas ntseeg Khetos, rauqhov yeej tsis muaj qhov sibtxawv: #Kalat 2:16 23vim txhua tus puavleej tau ua txhaum thiab ncav tsis cuag Vajtswv tus tshwjchim. 24Tiamsis los ntawm Vajtswv txoj hmoovhlub uas Nws tau muab pub dawb rau neeg, Nws thiaj suav hais tias txhua tus ncajncees vim Yexus Khetos tau los txhiv sawvdaws dim lawm.

25-26Vajtswv tau txib Yexus Khetos los tuag theej neeg lub txhoj, kom los ntawm Nws cov ntshav, neeg tej kev txhaum thiaj yuav raug zam vim lawv ntseeg Nws. Vajtswv ua li ntawd kom qhia tau hais tias Nws yog tus ncajncees. Yav tas los Nws ua siabntev thiab tsis rautxim rau cov neeg uas ua kev txhaum; tiamsis nimno Nws rautxim rau cov uas ua kev txhaum, kom qhia tau hais tias Nws yog tus ncajncees. Qhov no yog Vajtswv qhia hais tias Nws yog tus ncajncees thiab yog tus pab kom txhua tus uas ntseeg Yexus Khetos dhau tau los ua neeg ncajncees.

27Yogli ntawd, peb yuav muab dabtsi los khav tau? Yeej tsis muaj ib yam dabtsi li tiag! Yuav khav txog dabtsi? Khav hais tias peb coj tau rawsli txoj Kevcai no lov? Tsis yog li ntawd, peb tsuas khav txog qhov uas peb ntseeg Yexus Khetos nkaus xwb. 28Yogli ntawd peb pom tias tsuas yog los ntawm txoj kev ntseeg nkaus xwb, Vajtswv thiaj suav hais tias tus neeg ntawd ncajncees, tsis yog los ntawm qhov uas nws coj rawsli txoj Kevcai qhia.

29Vajtswv tsuas yog cov Yudais tus Vajtswv xwb lov? Nws tsis yog Lwm Haivneeg tus Vajtswv lov? Tseeb tiag, Nws yeej yog Lwm Haivneeg tus Vajtswv thiab. 30Tsuas muaj tibtug Vajtswv xwb, thiab Nws yeej suav hais tias txhua tus uas ntseeg Yexus Khetos, tsis hais cov Yudais lossis Lwm Haivneeg, puavleej yog cov uas ncajncees. #2Kev 6:4; Kalat 3:20 31Yogli ntawd, qhov uas peb ntseeg Yexus no, puas suav tau hais tias peb muab txoj Kevcai rhuav povtseg? Tsis yog li ntawd! Peb tseem yuav hajyam tuav txoj Kevcai ntawd kom ruaj ntxiv xwb.

Currently Selected:

Loos 3: MWW2022

Highlight

Copy