Tshwmsim 6

Cov Homthawj

1Ces kuv txawm pom tus Menyuam Yaj muab thawj-thawj lub homthawj ntawm xya lub ntawd tev. Kuv hnov ib tug ntawm plaub tug uas ciajsia hais nrov-nrov ib yam li xob nroo hais tias, “Ciali los!” 2Kuv saib, uaciav txawm muaj ib tug txivnees dawb tawm los! Tus uas caij tus txivnees dawb ntawd nqa ib rab hneevnti thiab nws ntoo ib lub mom kub. Nws caij tus nees ntawd tawm mus li tus uas muajyeej, thiab tseem yuav mus muajyeej ntxiv. #Xekhali 1:8; 6:3, 6

3Ces tus Menyuam Yaj txawm muab lub homthawj thib ob tev. Kuv hnov tus uas ciajsia thib ob hais tias, “Ciali los!” 4Ces txawm muaj ib tug txivnees liab tawm los! Tus uas caij tus txivnees ntawd tau txais ib rab ntaj loj-loj thiab tau txais lub hwjchim uas muab txoj kev thajyeeb hauv lub ntiajteb rho mus, kom neeg sibntaus sibtua. #Xekhali 1:8; 6:2

5Ces tus Menyuam Yaj txawm muab lub homthawj thib peb tev. Kuv hnov tus uas ciajsia thib peb hais tias, “Ciali los!” Kuv saib, uaciav txawm muaj ib tug txivnees dub tawm los! Tus uas caij tus txivnees dub ntawd tuav rawv ib rab teev ntawm nws txhais tes. #Xekhali 6:2-6 6Kuv hnov yam li ib lub suab hais ntawm lawv plaub tug uas ciajsia ntawd tuaj hais tias, “Nqizog rau ib hnub twg yog ib taig txhuv, thiab ib hnub twg yog peb taig pias; tiamsis tsis txhob ua rau cov roj txivntoo thiab cov cawv txivhmab puastsuaj!”

7Ces tus Menyuam Yaj txawm muab lub homthawj thib plaub tev. Kuv hnov tus uas ciajsia thib plaub hais tias, “Ciali los!” 8Kuv saib, uaciav txawm muaj ib tug txivnees txheeb tawm los! Tus uas caij tus txivnees txheeb ntawd lub npe hu ua Kev Tuag; ces Tubtuag teb#6:8: Tubtuag teb: Qhov chaw uas cov neeg tuag nyob (saib 1:18). txawm raws kiag nws qab los. Nkawd tau txais lub hwjchim uas kav lub ntiajteb txog ib feem plaub; nkawd yuav tua cov neeg uas nyob hauv ntiajteb los ntawm hniav ntaj hniav riam, kev tshaib kev nqhis, kev mob kis, thiab tej tsiaj nyaum. #Exek 14:21

9Ces tus Menyuam Yaj txawm muab lub homthawj thib tsib tev. Kuv pom ib co ntsujplig nyob hauvqab lub thaj uas muab tej khoom fij rau Vajtswv. Cov ntsujplig ntawd yog cov neeg uas raug muab tua tuag vim lawv qhia Vajtswv Txojlus thiab ua timkhawv ncajncees. 10Lawv txawm qw nrov-nrov hais tias, “Tus Tswv uas muaj Hwjchim Loj Kawg Nkaus, tus dawbhuv thiab tus tseeb! Yuav tavtwg Koj mamli txiavtxim thiab pauj rovqab rau neeg ntiajteb thiab rautxim rau lawv vim qhov uas lawv muab peb tua?” 11Lawv ib leeg tau ib lub tsho dawb ntev-ntev, thiab lawv yuavtsum tau so mentsis mus txog thaum cov uas ua Vajtswv haujlwm thiab cov ntseeg uas tseem yuav raug tua tuag ib yam li lawv muaj txwm tso.

12Ces kuv txawm pom tus Menyuam Yaj muab lub homthawj thib rau tev. Thaum ntawd av qeeg loj heev. Lub hnub txawm tsaus nti dubnciab ib yam li tej ntaub tsaj dub, thiab lub hli txawm ciali liabploog ib yam li ntshav. #Tshwm 11:13; 16:18; Yaxaya 13:10; Yau 2:10, 31; 3:15; Math 24:29; Malak 13:24-25; Lukas 21:25 13Tej hnubqub txawm poob zomzaws saum ntuj los rau hauv ntiajteb, ib yam li tej txiv ncuavpias uas tsis tau siav tiamsis raug cua hlob-hlob ntsawj es poob los. #Yaxaya 34:4 14Lub ntuj txawm ploj zujzus mus ib yam li dov thooj ntawv rau saud; txhua lub roob thiab txhua lub povtxwv ciali txav tsis nyob qhov qub chaw lawm. #Tshwm 16:20

15Thaum ntawd tej vajntxwv uas kav ntiajteb, tej nomtswv, tej thawj tubrog, tej neeg npluanuj, tej neeg uas muaj hwjchim, cov uas ua qhev thiab cov uas tsis ua qhev, sawvdaws puavleej khiav mus nkaum rau hauv tej qhovtsua thiab hauv tej qabzeb qabtsua rau saum tej roob. #Yaxaya 2:19, 21 16Lawv qw rau tej hauv roob thiab tej pobzeb pobtsuas hais tias, “Ciali nphau los txhub peb thiab muab peb zais kom dhau ntawm tus uas nyob saum lub zwmtxwv lub ntsejmuag, thiab dhau ntawm tus Menyuam Yaj txoj kev chim rau peb! #Hauxe 10:8; Lukas 23:30 17Rauqhov hnub uas txoj kev chim loj kawg nkaus twb los txog lawm, leejtwg thiaj yuav sawv tiv tau?” #Yau 2:11; Mlakis 3:2

Currently Selected:

Tshwmsim 6: MWW2022

Highlight

Copy