Tshwmsim 20

1,000 Xyoo

1Tomqab ntawd kuv pom ib tug timtswv ceebtsheej los saum ntuj los, nws nqa tus yuamsij uas qhib lub qhov tob-tob thiab nqa ib txoj saw hlau uas hnyav heev. 2Nws ntes tau tus zaj uas yog tus nabtxwj nablaus uas hu ua dab ntxwgnyoog, lossis Xatas, thiab muab saw hlau khi kiag cia 1,000 xyoo. #Chiv 3:1 3Tus timtswv ntawd muab tus zaj pov kiag rau hauv lub qhov tob-tob. Nws muab ntsuasphoo xauv thiab nias homthawj rau, kom tus zaj tsis tau kev los ntxias txhua haivneeg mus txog 1,000 xyoo. Tomqab uas dhau 1,000 xyoo lawm, mamli tso nws tawm los ib nyuag ntu.

4Tomqab ntawd kuv pom ntau lub zwmtxwv, cov neeg uas zaum saum cov zwmtxwv ntawd twb tau lub hwjchim ua cov txiavtxim lawm. Thiab kuv pom cov neeg uas luag muab txiav cajdab tuag lawm cov ntsujplig. Lawv raug tua rauqhov lawv qhia tej lus tseeb uas Yexus qhia rau lawv thiab lawv qhia Vajtswv Txojlus. Lawv yeej tsis tau pe tus tsiaj nyaum thiab tus mlom uas muaj yamntxwv zooli tus tsiaj nyaum ntawd, thiab lawv yeej tsis muaj tus tsiaj nyaum ntawd lub cim nias rau ntawm lawv hauvpliaj lossis ntawm lawv txhais tes. Lawv rov muaj txojsia thiab nrog Khetos kav 1,000 xyoo. #Dani 7:9-22 5(Dua li lwmtus uas tuag lawm, lawv yuavtsum tos kom dhau 1,000 xyoo tso, lawv mamli rov muaj txojsia tau.) No yog thawj-thawj pab uas sawv hauv qhovtuag rovqab los.

6Thawj pab uas sawv hauv qhovtuag rov los no, yog cov uas tau nyob kajsiab lug. Txoj kev tuag zaum thib ob tsis muaj hwjchim yuam tau lawv lawm; lawv yuav ua Vajtswv thiab ua Khetos cov povthawj hlob thiab lawv yuav nrog Nws kav 1,000 xyoo.

Xatas Swb Lawm

7Tomqab uas dhau 1,000 xyoo lawm, Xatas yuav raug tso tawm hauv nws lub tsev lojcuj los. 8Nws yuav mus dag-ntxias txhua haivneeg uas nyob plaub cegkaum ntuj, uas yog Nkos thiab Mankos. Xatas yuav sau txhua tus huv tibsi mus uarog; cov neeg ntawd coob npaum nkaus li tej xuabzeb ntawm ntug hiavtxwv. #Exek 7:2; Exek 38:2, 9, 15 9Lawv yuav tuaj mus thoobplaws ntiajteb thiab puav Vajtswv cov neeg lub yeej thiab lub nroog uas Vajtswv hlub. Tiamsis ciali muaj hluavtaws poob saum ntuj los kub cov neeg ntawd tuag tag huv tibsi. 10Thaum ntawd tus dab ntxwgnyoog uas dag-ntxias cov neeg ntawd, thiajli raug muab pov rau hauv cov nplaimtaws leejfaj uas cig sib ntswg pesyos. Qhov chaw ntawd yog qhov chaw uas luag twb xub muab tus tsiaj nyaum thiab tus xibhwb cevlus cuav pov rau hauv lawm; lawv yuav raug kev tsimtxom tashnub tashmo mus ibtxhiab ibtxhis li.

Kev Txiavtxim Zaum Kawg

11Tomqab ntawd kuv pom ib lub zwmtxwv loj uas dawbpaug thiab pom tus uas nyob saum lub zwmtxwv ntawd. Lub ntiajteb thiab lub ntuj ciali ploj ntais ntawm nws lub xubntiag mus, thiab tsis muaj leejtwg yuav pom ib zaug ntxiv li lawm. #Dani 7:9-10 12Thiab kuv pom cov neeg uas tuag lawm, tsis hais tus hlob tus yau, sawvdaws sawv ntawm lub zwmtxwv hauvntej, thiab muaj ntau phau ntawv puavleej muab nthuav cia. Muaj dua ib phau kuj muab nthuav cia, phau ntawd yog phau ntawv uas muaj txojsia. Cov uas tuag lawm tau raug txiavtxim rawsli tej uas lawv tau ua los, uas twb muab sau cia rau hauv cov phau ntawv ntawd lawm. 13Dej hiavtxwv tau xa tej neeg uas tuag rau hauv hiavtxwv lawm rovqab los. Txoj kev tuag thiab tubtuag teb los kuj xa cov neeg tuag uas nyob hauv ob lub chaw ntawd rovqab los ib yam nkaus thiab. Txhua tus puavleej raug txiavtxim rawsli tej uas lawv tau ua los lawm. 14Thaum ntawd txoj kev tuag thiab tubtuag teb tau raug muab pov rau hauv ntujtawg. (Lub ntujtawg no yog txoj kev tuag zaum thib ob.) 15Leejtwg uas tsis muaj npe sau rau hauv phau ntawv uas muaj txojsia, ces tus ntawd raug muab pov rau hauv ntujtawg.

Currently Selected:

Tshwmsim 20: MWW2022

Highlight

Copy