Tshwmsim 18

Lub Nroog Npanpiloos Puas

1Tomqab ntawd kuv pom dua ib tug timtswv ceebtsheej los saum ntuj los. Nws muaj hwjchim thiab ci ntsa-iab rau lub ntiajteb. 2Nws qw nrov-nrov hais tias, “Vau lawm lau! Lub Tuamceeb nroog Npanpiloos vau lawm lau! Nimno lub nroog ntawd tau dhau mus ua lub chaw rau tej dab thiab tej ntsujplig phem los nyob rau hauv lawm; txhua yam noog uas phem thiab qias kuj los nyob hauv lawm thiab. #Yaxaya 21:9; Yelemi 51:8; Tshwm 14:8; Yaxaya 13:21; Yelemi 50:39 3Rauqhov txhua lub tebchaws twb tau haus nws cov cawv txivhmab qaug tag lawm. Cov cawv txivhmab uas qab-qab ntawd yog nws tej kev nkauj kev nraug. Tej vajntxwv uas nyob hauv ntiajteb no puavleej nrog nws ua nkauj ua nraug, thiab tej tublag tubluam uas nyob hauv ntiajteb npluanuj tag, twb yog los ntawm tej kev phem kev qias uas lub nroog ntawd ua tsis paub dhuav li!” #Yaxaya 23:17; Yelemi 51:7

4Tomqab ntawd kuv rov hnov dua ib lub suab hais saum ntuj tuaj hais tias,

“Kuv haivneeg, nej ciali tawm ntawm nws mus,

nej thiaj tsis nrog nws koom nws tej kev txhaum;

nej thiaj tsis nrog nws raug txim! #Yaxaya 48:20; Yelemi 50:8; 51:6, 45

5Rauqhov nws tej kev txhaum twb tib mus nto ntuj lawm,

thiab Vajtswv yeej ncontsoov nws tej kev phem kev qias. #Chiv 18:20-21; Yelemi 51:9

6Nws muab licas rau nej lawm, nej ciali muab li ntawd rov rau nws.

Nws ua licas rau nej lawm, nej ciali ua ob npaug rov rau nws.

Nws do cawv txivhmab rau nej lawm,

nej ciali siv nws lub khob do kom ntsim ob npaug rov rau nws. #Nnkauj 137:8; Yelemi 50:29

7Nws khav thiab npluanuj npaum licas,

nej ciali ua kom nws tau kev quajntsuag thiab raug kev tsimtxom npaum li ntawd.

Rauqhov nws pheej khav hais tias,

‘Kuv nyob no, zoo ib yam li tus pojniam vajntxwv lawm!

Kuv tsis yog pojntsuam,

kuv yuav tsis quajntsuag ib zaug li!’ #Yaxaya 47:7-9

8Yogli ntawd, tibhnub xwb tej subtawg subntsha yuav los raug nws,

tsis hais kev mob kev nkeeg, kev ntxhovsiab thiab kev tshaib kev nqhis.

Hluavtaws yuav kub nws tag huv tibsi,

rauqhov tus Tswv uas yog Vajtswv tus uas muaj hwjchim, yog tus txiavtxim rau nws.”

9Thaum tej vajntxwv hauv ntiajteb uas tau nrog lub nroog ntawd ua kev nkauj kev nraug thiab ua kev phem kev qias pom lub nroog kubhnyiab pataws ncho auv niab, lawv yuav quaj-nyiav ntsoogqees. #Exek 26:16-17 10Lawv sawv deb-deb ntsia xwb, vim lawv ntshai koom nrog lub nroog ntawd txoj kev tsimtxom. Lawv seev hais tias, “Puastsuaj lau! Puastsuaj lau! Lub Tuamceeb nroog Npanpiloos uas loj thiab khov! Nyuamqhuav tib txoosteev xwb koj txawm ciali raug txim lawm!”

11Tej tublag tubluam uas nyob hauv ntiajteb no los quaj thiab nyiav ntsoogqees rau lub nroog ntawd, vim tsis muaj leejtwg yuav lawv tej khoom lawm; #Exek 27:31, 36 12tsis muaj leejtwg yuav lawv tej nyiaj tej kub, tej qe zeb ci-ci uas muajnqis, tej hlaws; tej ntaub mag zoo-zoo, ntaub tsamxem, ntaub tshwbkab thiab ntaub liab; txhua yam ntoo uas muajnqis, thiab txhua yam uas muab kaus ntxhw ua, muab tej ntoo uas kim-kim ua, muab tej toojdag ua, muab hlau ua, thiab muab hlaws txaij ua; #Exek 27:12-13, 22 13tej roj ntoos tswqab, tej hwjtxob, tej hmoov tshuaj tswqab, tej roj tswqab maules, tej tshuaj tswqab, tej cawv txivhmab, tej roj, tej hmoov nplej, tej hmoov pobkws, tej nyuj, tej yaj, tej nees, tej tsheb nees, tej tubqhe, thiab tej neeg kiag los tsis muaj leejtwg xav yuav.

14Tej tublag tubluam hais rau lub nroog ntawd hais tias, “Txhua tsavyam zoo uas koj ntshaw twb ploj tag lawm, txhua yam kev npluanuj thiab tej uas ci ntsa-iab los puavleej ploj tag. Koj yuav nrhiav tsis ntsib ib zaug ntxiv li lawm!” 15Tej tublag tubluam npluanuj vim muag tej khoom los ntawm lub nroog ntawd, lawv yuav sawv deb-deb ntsia lawm xwb, vim lawv ntshai koom nrog lub nroog ntawd txoj kev tsimtxom. Lawv yuav quaj-nyiav ntsoogqees #Exek 27:31, 36 16thiab seev zomzaws hais tias, “Puastsuaj lau! Lub Tuamceeb nroog puastsuaj lawm lau! Lub nroog uas yeej ibtxwm hnav tej tsoostsho ntaub mag zoo-zoo, ntaub tsamxem, thiab ntaub liab, thiab coj saw nyiaj saw kub, coj tej qe zeb ci-ci uas muajnqis, thiab coj hlaws thoobplaws ib ce! 17Ua licas tib txoosteev xwb, nws tej kev npluanuj txawm ciali ploj ntais mus lawm!”

Txhua tus thawj uas saib tej nkoj loj thiab tej neeg caij nkoj, tej neeg ua haujlwm hauv tej nkoj thiab tej neeg uas nrhiav noj hauv hiavtxwv, puavleej tuaj deb-deb ntsia. #Yaxaya 23:14; Exek 27:26-30 18Thaum lawv pom lub nroog ntawd kubhnyiab pa ncho auv niab, lawv qw nrov-nrov hais tias, “Puas tau muaj ib lub nroog twg uas yuav zoo npaum li lub tuamceeb nroog no?” #Exek 27:32 19Lawv w hmoov av rau saum lawv taubhau, lawv quaj-nyiav ntsoogqees hais tias, “Puastsuaj lawm lau! Lub Tuamceeb nroog puastsuaj lawm lau! Lub nroog no yog lub uas ua rau cov neeg uas muaj nkoj khiav mus khiav los hauv hiavtxwv npluanuj tag! Ua licas tib txoosteev xwb, txhua tsavyam uas nyob hauv lub nroog no txawmsiv ploj tag huv tibsi lawm!” #Exek 27:30-34

20Lub ntuj, ciali zoosiab, rauqhov lub nroog no twb puastsuaj tag lawm! Vajtswv cov neeg, cov timthawj, thiab cov xibhwb cev Vajtswv lus, ciali zoosiab! Rauqhov Vajtswv twb rautxim rau lub nroog ntawd ib yam li lub nroog ntawd tau ua rau nej los lawm! #2Kev 32:43; Yelemi 51:48

21Ces ib tug timtswv ceebtsheej uas muaj hwjchim txawm tsaws hlo ib lub pobzeb uas luaj li ib txhibzeb povrhees rau hauv hiavtxwv, thiab nws hais tias, “Lub Tuamceeb nroog Npanpiloos yuav raug muab povtseg muajceem npaum li no ntag, thiab yuav tsis rov pom lub nroog no ib zaug ntxiv li lawm. #Yelemi 51:63-64; Exek 26:21 22Yuav tsis hnov tej suab nogncas thiab neeg lub suab hunkauj, suab raj thiab suab rajxyu nrov ntawm koj ib zaug ntxiv li lawm. Yuav tsis muaj tej kws uas txawj ua qhov txhia chaw nyob rau hauv koj ntxiv li lawm; thiab yuav tsis hnov lub suab zomzeb tuav cos nrov ntxiv li lawm! #Exek 26:13; Yaxaya 24:8 23Yuav tsis muaj tus duab teeb cig nyob rau hauv koj ib zaug ntxiv li lawm; thiab yuav tsis muaj nkaujnyab nraugvauv lub suab nyob rau hauv koj li lawm. Koj tej tublag tubluam puavleej txeev yog cov uas muaj hwjchim loj dua ntais hauv ntiajteb no, thiab tej khawvkoob dag uas koj ua ntawd, koj ntxias tau txhua haivneeg hauv ntiajteb no!” #Yelemi 7:34; 25:10

24Lub nroog Npanpiloos raug txim vim muaj cov xibhwb cev Vajtswv lus thiab Vajtswv cov neeg cov ntshav nyob rau hauv lawm; yog lau, cov ntshav ntawd yog txhua tus uas raug tua nyob rau hauv ntiajteb no cov ntshav. #Yelemi 51:49

Currently Selected:

Tshwmsim 18: MWW2022

Highlight

Copy