Tshwmsim 1

1Phau ntawv no yog hais txog tej uas Vajtswv muab rau Yexus Khetos qhia rau Nws cov tubtxib paub txog tej uas tshuav tsis ntev tomntej no yuav muaj tshwm los. Khetos thiaj txib Nws ib tug timtswv los qhia tej no rau Yauhas tus uas yog Nws ib tug tubtxib, 2thiab Yauhas tau ua povthawj txog txhua yam uas nws pom huv tibsi. Tej no yog Yauhas qhia txog Vajtswv tej lus thiab qhov tseeb uas Yexus Khetos ua tus qhib rau Yauhas pom. 3Tus neeg uas nyeem phau ntawv no yuav muaj kev kajsiab lug, thiab cov neeg uas mloog tej lus uas qhiatshwm no thiab ua rawsli cov lus uas sau tseg rau hauv phau ntawv no yuav muaj kev kajsiab lug! Rauqhov twb ze-ze lub sijhawm uas txhua yam no yuav muaj tshwm los lawm.

Xa Xov Rau Xya Pawg Ntseeg

4Los ntawm Yauhas mus rau xya pawg ntseeg uas nyob hauv lub xeev Exias:

Thov kom nej tau txais txoj hmoovhlub thiab kev thajyeeb los ntawm Vajtswv tus uas muaj nyob nimno, tus uas nyob thaum ub los lawm, thiab tseem yuav los tomntej no, thiab los ntawm xya tus ntsujplig uas nyob ntawm Vajtswv lub zwmtxwv, #Khiav 3:14; Tshwm 4:5 5thiab los ntawm Yexus Khetos, tus uas ua timkhawv ncajncees, yog thawj tus uas sawv hauv qhovtuag rovqab los, thiab yog tus uas kav tagnrho tej vajntxwv hauv ntiajteb no.

Nws hlub peb thiab Nws tau tso peb dim ntawm peb tej kev txhaum los ntawm Nws cov ntshav, #Yaxaya 55:4; Nnkauj 89:27 6Nws tau tsa peb ua ib haiv neeg, ua cov povthawj hlob uas ua Nws tus Vajtswv thiab Leejtxiv tes haujlwm. Thov kom Yexus Khetos tau tus tshwjchim uas ci ntsa-iab thiab lub hwjchim uas nyob mus ibtxhiab ibtxhis li! Amees. #Khiav 19:6; Tshwm 5:10

7Nej saib seb, Nws tabtom nrog huab nrog cua los! Txhua lub qhovmuag yuav pom Nws, txawm yog cov neeg uas muab hmuv nkaug Nws los yuav pom Nws huv tibsi thiab. Txhua haivneeg uas nyob hauv qabntuj no yuav quaj-nyiav ntsoogqees vim Nws. Yeej yuav muaj li ntawd tiag! Amees. #Dani 7:13; Math 24:30; Malak 13:26; Lukas 21:27; 1Thex 4:17; Xekhali 12:10; Yauh 19:34, 37; Xekhali 12:10; Math 24:30

8Tus Tswv uas yog Vajtswv tus uas muaj Hwjchim Loj Kawg Nkaus, tus uas muaj nyob nimno, tus uas nyob thaum ub los lawm, thiab tseem yuav los tomntej no, hais tias, “Kuv yog Alafas thiab Aumenkas.” #Tshwm 22:13; Khiav 3:14

Yauhas Ua Yogtoog Pom Khetos

9Kuv yog Yauhas, yog nej ib tug kwvtij uas nrog nej koom txoj kev txomnyem, koom teb koom chaw, thiab ua siabntev tiv nyob rau hauv Yexus ib yam li nej. Kuv raug muab tso rau ntawm lub povtxwv Pamaus vim kuv tau qhia txog Vajtswv Txojlus thiab tej lus timkhawv txog Yexus. 10Hnub uas yog tus Tswv hnub, Vaj Ntsujplig tau los kav tagnrho kuv, kuv txawm hnov ib lub suab uas nrov ib yam li lub suab rajxyu nrov tom kuv qab tuaj. 11Lub suab ntawd hais tias, “Koj ciali sau tej uas koj pom rau hauv thooj ntawv kauv, thiab muab xa mus rau xya pawg ntseeg, xwsli: Efexaus, Xamawnas, Penkamus, Thiyatilas, Xasdis, Filadeefias, thiab Laudikeyas.”

12Kuv tig hlo mus ntsia seb yog leejtwg hais rau kuv, kuv txawm pom xya tus ncej kub txawb teeb, 13thiab nyob hauv nruabnrab xya tus ncej kub ntawd, muaj ib tug zooli neeg sawv hauv, Nws hnav ib lub tsho ntev suab zi rau nram Nws kotaw, thiab Nws sia ib txoj siv kub puagncig Nws lub hauvsiab. #Dani 7:13; Dani 10:5 14Nws cov plaubhau dawb ib yam li xov paj lossis ib yam li cov daus, thiab Nws lub qhovmuag ci ib yam li nplaimtaws; #Dani 7:9 15Nws txhais kotaw ci ib yam li tej toojdag uas luag twb muab nchuav thiab txhuam tau ci-ci lawm, thiab Nws lub suab nrov ib yam li dej tsaws tsag. #Dani 10:6 #Exek 1:24; 43:2 16Nws txhais tes xis tuav rawv xya lub hnubqub, thiab muaj ib rab ntaj ob sab ntse uas ntse kawg li, tawm hauv Nws qhovncauj los. Nws lub ntsejmuag ci ib yam li lub hnub ci thaum tavsu.

17Thaum kuv pom dheev Nws, kuv ciali qhau cev hlo rau ntawm Nws kotaw zoo li tus neeg uas tuag lawm. Nws txawm cev hlo Nws txhais tes xis los tuav nkaus kuv, thiab hais tias, “Tsis txhob ntshai! Kuv yog lub hauvpaus thiab yog lub ntsis. #Yaxaya 44:6; 48:12; Tshwm 2:8; 22:13 18Kuv yog tus uas muaj sia nyob! Kuv twb tuag lawm, tiamsis koj saib maj, nimno Kuv muaj sia nyob mus ibtxhis li. Kuv yog tus uas tuav cov yuamsij rau txoj kev tuag thiab tubtuag teb. 19Yogli ntawd, koj ciali sau tej uas koj pom, tsis hais tej uas tamsim no koj pom thiab tej uas tseem yuav tshwm muaj los rau yav tomntej. 20No yog lub ntsiablus tob-tob ntawm xya lub hnubqub uas koj pom nyob hauv Kuv txhais tes xis, thiab xya tus ncej kub txawb teeb: xya lub hnubqub no yog xya tus timtswv uas saib xya pawg ntseeg, thiab xya tus ncej txawb teeb yog xya pawg ntseeg.

Currently Selected:

Tshwmsim 1: MWW2022

Highlight

Copy