Filipis 4

Tej Lus Qhia

1Yogli ntawd, cov kwvtij uas kuv hlub thiab nco, nej ua rau kuv zoosiab thiab ua rau kuv tau ntsejmuag kawg li! Cov kwvtij uas kuv hlub 'e, nej yuavtsum sawv khovkho rau hauv tus Tswv.

2Yu-audias thiab Xeetikhes, kuv thov kom neb muaj lub siab xav ib yam nkaus li neb yog ob vivncaus nyob rau hauv tus Tswv. 3Kuv thov koj, tus uas koomsiab koomntsws nrog kuv ua haujlwm, kom koj pab ob tug pojniam no, vim nkawd tau muab siab rau pab kuv qhia Txoj Moo Zoo, nrog rau Klhemees thiab tagnrho lwmtus uas nrog kuv ua haujlwm. Lawv yog cov uas muaj npe sau rau hauv Vajtswv phau ntawv uas sau cov neeg muaj txojsia li npe.

4Ciali zoosiab hauv tus Tswv txhua lub sijhawm. Kuv rov hais dua ib zaug ntxiv tias: Ciali zoosiab!

5Cia kom txhua tus pom nej lub siabmos siabmuag. Tus Tswv twb yuav los sai-sai no. 6Tsis txhob nyuajsiab rau ib yam dabtsi li, tiamsis thaum nej thov Vajtswv, nej ciali qhia txhua yam uas nej xav yuav rau Nws, thiab ncontsoov thov los ntawm lub siab uas paub ua Nws tsaug. 7Vajtswv txoj kev nyabxeeb, uas tseem tob tshaj qhov neeg muaj cuabkav totaub tau, yuav tsomkwm nej lub siab thiab nej tej kev xav kom ruaj-khov nyob rau hauv Yexus Khetos.

8Thaum xaus no, cov kwvtij sawvdaws, yam twg uas tseeb, yam twg uas tsimnyog hwm, yam twg uas ncajncees, yam twg uas dawbhuv, yam twg uas ntxim hlub, thiab yam twg uas tsimnyog qhuas, nej ciali khaws tej ntawd cia rau hauv nej txoj kev xav. 9Tej uas nej tau kawm lossis tau txais lossis tau hnov ntawm kuv los lawm, ciali xyaum coj ua rawsli tej ntawd. Vajtswv tus uas ua rau peb muaj kev kajsiab, thiaj yuav nrognraim nej nyob.

Paulus Ua Cov Ntseeg Tsaug

10Kuv zoosiab kawg li nyob rau hauv tus Tswv vim twb dhau los ntev lawm tiamsis thaum kawg no nej rov ras txog thiab tseem txhawjxeeb txog kuv. Kuv hais li no tsis yog txhais hais tias nej tsis hlub kuv lawm, tiamsis tsuas yog nej tsis tau muaj sijhawm qhia rau kuv paub xwb. 11Kuv hais li no tsis yog kuv yws hais tias kuv muaj kev tuncua, rauqhov txawm kuv muaj licas los kuv yeej txaussiab rau tej uas kuv muaj ntawd. 12Kuv paub tias thaum muaj kev tuncua zoo licas thiab thaum muaj nplua-mias ho zoo licas. Kuv twb kawm paub txog txoj kev txaussiab no lawm hais tias txawm kuv nyob qhovtwg thiab lub sijhawm twg, txawm yuav tshaib yuav tsau, txawm yuav muaj ntau muaj tsawg los kuv yeej tsis txhawj. 13Kuv muaj cuabkav ua tau txhua yam los ntawm Khetos tus uas txhawb kuv lub zog.

14Txawm yogli ntawd los qhov uas nej pab kuv thaum kuv raug kev txomnyem ntawd yog ib yam uas zoo kawg nkaus. 15Nej cov uas yog neeg Filipis, nej yeej paub zoo hais tias thaum ntxov uas kuv tawm hauv lub xeev Makedaunias mus qhia Txoj Moo Zoo, yeej tsis muaj ib pawg ntseeg twg uas pab nyiaj pab txiaj rau kuv li, tsuas yog nej nkaus xwb thiajli pab kuv. #2Klt 11:9 16Thaum kuv nyob hauv lub nroog Thexalaunikes, kuv muaj kev tuncua, los nej yeej xa nyiajtxiag tuaj pab kuv tshaj li uas ib zaug. #Teshl 17:1 17Tsis yog tias kuv xav tau nej tej kev pab xwb, tiamsis kuv xav kom tau pajlaum rov los rau hauv nej tej ntaub ntawv. 18Kuv tau txais tej nqizog puvntoob thiab tseem tau txais tshaj ntawd lawm thiab; tej uas nej muab rau Epafauditus nqa tuaj rau kuv; nej muab ntau kawg siv tsis tag li! Tej ntawd zoo ib yam li tej tshuaj tswqab uas muab fij rau Vajtswv thiab yog ib yam uas Vajtswv txaussiab txais yuav. #Khiav 29:18 19Kuv tus Vajtswv yuav pub txhua yam uas nej xav tau rau nej los ntawm Nws txoj kev npluanuj uas muaj nyob rau hauv Yexus Khetos. 20Thov kom Vajtswv tus uas yog peb Leejtxiv tau koobmeej mus ibtxhis li! Amees.

Lus Xa Xov Thaum Xaus

21Kuv thov xa kev nojqab nyobzoo rau nej txhua tus ntseeg uas nyob hauv Yexus Khetos. Cov kwvtij ntseeg uas nrog kuv nyob ntawm no, lawv kuj xa kev nojqab nyobzoo rau nej txhua tus ib yam nkaus thiab. 22Cov ntseeg Vajtswv txhua tus uas nyob ntawm no, lawv puavleej hais nojqab nyobzoo tuaj rau nej sawvdaws, tshwjxeeb yog cov uas nyob hauv Huabtais lub loog.

23Thov tus Tswv Yexus Khetos txoj hmoovhlub nrog nej txhua tus nyob.

Currently Selected:

Filipis 4: MWW2022

Highlight

Copy