Teev Npe 36
36
Xelaufehas Tej Qubtxeeg Qubteg
1Cov thawjcoj ntawm Nkile-as cuab kwvtij uas yog Makhaws tus tub thiab yog Yauxej tus tub Manaxes tus xeebntxwv thiaj mus cuag Mauxes thiab lwmtus thawjcoj. 2Lawv hais tias, “Tus TSWV tau xaaj kom nej muab lub tebchaws no rho ntawv faib rau cov Yixalayees nyob. Nws kuj tau xaaj kom nej muab peb tus kwvtij Xelaufehas tej qubtxeeg qubteg rau nws cov ntxhais. #Teev 27:7 3Tiamsis nej yuavtsum ncontsoov tias yog lawv mus yuav txiv rau lwm xeem lawm, ces lawv tej qubtxeeg qubteg yuav yog xeem ntawd tug, thiab tej uas yog peb ntiagtug yuav tsawg zujzus lawm. 4Thaum txog Xyoo Thim uas thim tej qubtxeeg qubteg uas muab muag lawm rovqab los rau tus qub tswv, yuav tau muab Xelaufehas tej qubtxeeg qubteg ntxiv rau xeem uas nws cov ntxhais mus yuav ntawd, thiab peb xeem yuav tsis tau tej ntawd li lawm.”
5Yogli ntawd, Mauxes thiaj hais rau cov Yixalayees rawsli tus TSWV tej lus xaaj uas hais tias, “Tej lus uas xeem Manaxes hais ntawd yeej yog lawm, 6thiab tus TSWV tau hais tias Xelaufehas cov ntxhais muaj cai yuav tau txiv rawsli lawv siab nyiam, tiamsis yuavtsum yuav cov uas yog lawv xeem xwb. 7Ua li ntawd kom txhua xeem Yixalayees tej qubtxeeg qubteg thiaj yog nws xeem mus li. 8Txhua tus pojniam uas muaj qubtxeeg qubteg nyob hauv haivneeg Yixalayees xeem twg lawm, nws yuavtsum yuav tus txiv uas yog xeem ntawd xwb. Ua li no txhua tus Yixalayees thiajli yuav tau lawv cov yawgkoob tej qubtxeeg qubteg, 9thiab tej qubtxeeg qubteg ntawd thiaj tsis poob ntawm xeem ntawd mus ua lwm xeem tug. Txhua xeem hauv cov Yixalayees nyias yuavtsum muaj nyias teejtug mus li xwb.”
10-11Yogli ntawd, Malas, Tilexas, Haunkelas, Milekas, thiab Nau-as uas yog Xelaufehas cov ntxhais, thiaj ua rawsli tus TSWV tau xaaj rau Mauxes lawm, lawv thiaj mus yuav lawv cov nus kwvtij xwb. 12Lawv mus yuav Yauxej cov xeebntxwv uas yog xeem Manaxes cuab kwvtij, thiab lawv tej qubtxeeg qubteg thiaj tseem nyob rau hauv lawv txiv xeem ntiagtug.
13Tej no yog kev tswjhwm thiab kevcai uas tus TSWV tau xaaj rau Mauxes kom qhia rau cov Yixalayees, thaum lawv tseem nyob hauv tiajnrag Mau-am ntawm ntug Dej Yauladees uas nyob ncaj lub nroog Yelikaus sab tid.
Currently Selected:
Teev Npe 36: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
