Teev Npe 35
35
Tej Nroog Uas Muab Rau Cov Levis
1Thaum tseem nyob hauv lub tiaj Mau-am ntawm ntug Dej Yauladees uas nyob ncaj lub nroog Yelikaus sab tid, tus TSWV hais rau Mauxes tias, #Yaus 21:1-41 2“Koj hais rau cov Yixalayees, kom lawv muab tej av uas lawv tau los ua lawv tug lawm qee lub nroog thiab tej tshav zaub uas nyob ibncig ntawm tej nroog ntawd rau cov Levis. 3Tej nroog ntawd yuav ua cov Levis tug, thiab lawv yuav nyob rau qhov chaw ntawd. Tej tshav zaub yog yuav ua tshav rau lawv tej nyuj thiab lwmyam tsiaj huv tibsi. 4Lub tshav zaub ntawd pib ntawm tus ntsayeej mus, ib sab twg yog 450 mev. 5Yogli ntawd, nej ntsuas kom dav xwmfab xwmmeem, ib fab twg kom muaj 900 mev, thiab ua lub moos rau hauv plawv.
6“Nej yuavtsum muab rau lub moos rau cov Levis cia rau cov neeg uas yuamkev tua lwmtus tau khiav mus nkaum cawmsiav. Dhau ntawd, nej yuavtsum muab plaubcaug-ob lub nroog ntxiv rau lawv thiab, 7tagnrho kom muaj plaubcaug-yim lub moos, nrog rau lawv tej tshav tsiaj huv tibsi. 8Cov moos uas cov Yixalayees muab ua cov Levis tug, tej xeem coob muab ntau lub nroog rau, tej xeem tsawg muab tsawg lub moos rau.”
Cov Nroog Cawmsiav
(2 Kevcai 19:1-13; Yausuas 20:1-9)
9Tus TSWV kom Mauxes #2Kev 19:2-4; Yaus 20:1-9 10hais rau cov Yixalayees tias, “Thaum nej hla tus Dej Yauladees mus txog rau hauv tebchaws Kana-as lawm, 11nej yuavtsum xaiv ib co moos cia rau cov neeg uas yuamkev tua lwmtus tau khiav mus nkaum cawmsiav. 12Qhov no yuav ua ib qhov chaw tsosiab rau tus neeg ntawd thaum tus tuag tej kwvtij nrhiav nws tua povtseg pauj kev chim, kom tus uas raug liam tua neeg ntawd thiaj tsis raug tua tuag uantej uas luag coj nws mus cuag cov tu plaubntug txiavtxim.
13“Xaiv rau lub moos, 14peb lub rau tim tus Dej Yauladees sab hnubtuaj thiab peb lub rau hauv tebchaws Kana-as. 15Cov moos no yuav cia ua ib co moos cawmsiav rau cov Yixalayees thiab cov neeg txhawv tebchaws uas nrog nej nyob ib ntus lossis nyob mus li, kom thaum muaj leejtwg yuamkev tua ib tug twg tuag, tus ntawd thiaj tau chaw khiav mus nkaum rau hauv cov nroog ntawd ib lub.
16-18“Tiamsis, yog leejtwg siv tej cuabyeej uas yog hlau lossis pobzeb lossis ntoo tua ib tug neeg tuag, nws yog ib tug uas muaj txim tua neeg thiab yuavtsum muab nws tua kom tuag. 19Tus tuag ntawd cov kwvtij uas txheeb-txheeb nws, muaj cai muab tus uas tua neeg ntawd tua kom tuag. Yog nrhiav tau thaum twg, tus kwvtij ntawd muaj cai muab tus uas tua neeg ntawd tua kom tuag.
20“Yog leejtwg ntxub luag es ciali muab luag thawb kom ntog lossis muab ib yam dabtsi cuam mus raug luag ua rau luag tuag, 21lossis ciali xuas nrig ntaus luag, ces nws yog tus muaj txim tua neeg, thiab yuavtsum muab nws tua kom tuag. Tus tuag ntawd cov kwvtij uas txheeb-txheeb nws, muaj cai muab tus uas tua neeg ntawd tua kom tuag. Yog nrhiav tau thaum twg, muaj cai tua kiag thaum ntawd kom tuag.
22“Tiamsis yog leejtwg ciali muab ib tug neeg twg uas yeej tsis yog nws li yeebncuab, thawb ntog lossis cuam ib yam dabtsi mus raug luag ua rau luag tuag. 23Lossis yog nws tsis ua tibzoo saib, es nws ciali cuam ib lub pobzeb mus raug ib tug neeg twg tuag, uas tsis yog nws tus yeebncuab thiab tsis yog nws txhobtxwm txawb. 24Yog muaj tej zooli hais no, cov pejxeem yuav tau txiavtxim rawsli tej kevcai no rau tus uas tua neeg tuag ntawd thiab tus neeg tuag ntawd cov kwvtij txheebze uas xav ua pauj. 25Cov pejxeem uas tuaj tu plaub yuavtsum pab tus neeg uas tua neeg ntawd kom dim ntawm tus tuag cov kwvtij uas yuav muab nws tua pauj, thiab lawv yuavtsum muab nws tso rovqab mus tom lub nroog cawmsiav kom nws khiav mus nkaum. Nws yuavtsum nyob tod txog thaum tus Tuam Povthawj Hlob uas luag tau muab roj pleev thiab txhawb meejthawj rau nws lawm tuag tso.
26“Tiamsis yog tus txivneej uas tua neeg ntawd ciali tawm hauv lub nroog cawmsiav ntawd, 27thiab yog tus tuag ntawd cov kwvtij pom nws thiab muab nws tua tuag lawm, ces qhov uas ua pauj li ntawd tsis yog txim tua neeg. 28Tus txivneej uas tua neeg ntawd yuavtsum nyob twjywm hauv lub nroog cawmsiav mus txog thaum tus Tuam Povthawj Hlob tuag lawm, tomqab ntawd nws mamli rov los tsev tau. 29Tej kevcai tswjhwm no muab cob rau nej thiab nej cajces, txawm nej yuav mus nyob rau qhovtwg los xij.
30“Yog leejtwg tua neeg, yuavtsum muab tus ntawd tua kom tuag yog tias muaj ob leeg lossis coob tshaj ntawd ua timkhawv. Yog muaj ib tug ua timkhawv xwb, tej lus timkhawv ntawd yuav txheem tsis tau kom muab tus neeg ntawd tua povtseg. #2Kev 17:6; 19:15 31Leejtwg tua neeg, yuavtsum muab nws tua kom tuag. Muab nyiaj txhiv nws lub txim tua neeg ntawd tsis tau. 32Yog tus neeg ntawd khiav mus nkaum rau hauv lub nroog cawmsiav lawm, tsis txhob cia nws them nyiaj txhiv nws rov los tsev uantej uas tus Tuam Povthawj Hlob tuag. 33Yog nej ua li no, ces nej yuav ua rau lub tebchaws uas nej nyob ntawd tsis huv. Kev tua neeg yog kev ua rau lub tebchaws tsis huv, thiab tsis muaj ib yam dabtsi yuav ntxuav tau kom lub tebchaws huv, tsuas yog muab tus neeg uas tua neeg ntawd tua nkaus xwb. 34Nej tsis txhob ua rau lub tebchaws uas nej nyob tsis huv, rauqhov Kuv yog tus TSWV, thiab Kuv nrognraim haivneeg Yixalayees nyob.”
Currently Selected:
Teev Npe 35: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
