Teev Npe 29
29
Khoom Fij Thaum Ua Kevcai Xyoo Tshiab
(Levis Kevcai 23:23-25)
1“Hnub xiab ib ntawm lub xya hli ntuj, nej yuavtsum tuaj sibsau pehawm Vajtswv, thiab tsis txhob ua ib yam haujlwm dabtsi li. Hnub ntawd yog hnub uas nej yuavtsum tshuab rajxyu. 2Muab ib tug ntsuag nyuj, ib tug laug yaj, thiab xya tus thav yaj, hnubnyoog ib xyoos uas tsis muaj ib qho phem li tuaj tua hlawv fij rau tus TSWV, thiab ua kom tej ntawd tswqab ntxiag ua rau tus TSWV txaussiab. 3Muab hmoov nplej ntse xyaw roj txivntoo coj mus fij: ib tug nyuj twg muab 3 kilus hmoov nplej fij nrog, ib tug laug yaj twg muab 2 kilus hmoov nplej fij nrog, 4thiab ib tug thav yaj twg muab 1 kilus hmoov nplej mus fij nrog. 5Thiab muab dua ib tug laug tshis mus tua fij daws txim, uas yog ua kevcai ntxuav rau cov pejxeem. 6Cov khoom no coj mus fij ntxiv rau cov khoom uas niajhnub fij thaum hnub xiab ib nrog lawv tej qoobloo thiab cov cawv txivhmab uas coj mus hlawv fij. Muab tej khoom noj no hlawv fij kom tswqab ntxiag ua rau tus TSWV txaussiab.
Khoom Fij Thaum Ua Kevcai Theej Txhoj
(Levis Kevcai 23:26-32)
7“Lub xya hli ntuj hnub xiab kaum, nej yuavtsum tuaj sibsau pehawm Vajtswv; tsis txhob noj zaub-mov thiab tsis txhob ua ib yam haujlwm dabtsi li. #Levi 16:29-34 8Muab ib tug ntsuag nyuj, ib tug laug yaj, thiab xya tus thav yaj, hnubnyoog ib xyoos uas tsis muaj ib qho phem li tuaj tua hlawv fij rau tus TSWV, thiab ua kom tej ntawd tswqab ntxiag ua rau tus TSWV txaussiab. 9Muab hmoov nplej ntse xyaw roj txivntoo coj mus fij: ib tug nyuj twg muab 3 kilus hmoov nplej fij nrog, ib tug laug yaj twg muab 2 kilus hmoov nplej fij nrog, 10thiab ib tug thav yaj twg muab 1 kilus hmoov nplej mus fij nrog. 11Thiab muab dua ib tug laug tshis mus tua fij daws txim, ntxiv rau tus tshis uas tua fij ua kevcai ntxuav rau cov pejxeem, thiab tej khoom fij uas niajhnub hlawv fij nrog tej qoobloo thiab tej cawv txivhmab uas coj mus fij.
Khoom Fij Thaum Ua Kevcai Nyob Tsev Pheebsuab
(Levis Kevcai 23:33-44)
12“Lub xya hli ntuj hnub kaum-tsib nej yuavtsum tuaj sibsau pehawm Vajtswv. Ua kevcai qhuas tus TSWV kom txwm xya hnub thiab tsis txhob ua ib yam haujlwm dabtsi li. #Levi 23:34; 2Kev 16:13-15 13Thawj hnub ntawd, muab kaum-peb tug ntsuag nyuj, ob tug laug yaj, thiab kaum-plaub tug thav yaj, hnubnyoog ib xyoos uas tsis muaj ib qho phem li tuaj tua hlawv fij rau tus TSWV, thiab ua kom tej ntawd tswqab ntxiag ua rau tus TSWV txaussiab. 14Muab hmoov nplej ntse xyaw roj txivntoo coj mus fij: ib tug nyuj twg muab 3 kilus hmoov nplej fij nrog, ib tug laug yaj twg muab 2 kilus hmoov nplej fij nrog, 15thiab ib tug thav yaj twg muab 1 kilus hmoov nplej fij nrog, thiab muab cov cawv txivhmab mus fij nrog. 16Thiab muab dua ib tug laug tshis mus tua fij daws txim, ntxiv rau tej khoom fij uas niajhnub coj mus hlawv fij nrog tej qoobloo thiab tej cawv txivhmab uas coj mus fij.
17“Hnub thib ob, fij kaum-ob tug ntsuag nyuj, ob tug laug yaj, thiab kaum-plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. 18-19Muab cov khoom no nrog rau txhua yam uas yuavtsum tau muab fij rau hnub thib ib fij uake.
20“Hnub thib peb, fij kaum-ib tug ntsuag nyuj, ob tug laug yaj, thiab kaum-plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. 21-22Muab cov khoom no nrog rau txhua yam uas yuavtsum tau muab fij rau hnub thib ib fij uake.
23“Hnub thib plaub, fij kaum tus ntsuag nyuj, ob tug laug yaj, thiab kaum-plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. 24-25Muab cov khoom no nrog rau txhua yam uas yuavtsum tau muab fij rau hnub thib ib fij uake.
26“Hnub thib tsib, fij cuaj tug ntsuag nyuj, ob tug laug yaj, thiab kaum-plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. 27-28Muab cov khoom no nrog rau txhua yam uas yuavtsum tau muab fij rau hnub thib ib fij uake.
29“Hnub thib rau, fij yim tus ntsuag nyuj, ob tug laug yaj, thiab kaum-plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. 30-31Muab cov khoom no nrog rau txhua yam uas yuavtsum tau muab fij rau hnub thib ib fij uake.
32“Hnub thib xya, fij xya tus ntsuag nyuj, ob tug laug yaj, thiab kaum-plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. 33-34Muab cov khoom no nrog rau txhua yam uas yuavtsum tau muab fij rau hnub thib ib fij uake.
35“Hnub thib yim, ciali rov tuaj sibsau uake pehawm Vajtswv, thiab tsis txhob ua ib yam haujlwm dabtsi li. 36Muab tej khoom noj coj mus hlawv fij rau tus TSWV, ua kom tswqab ntxiag txaus Nws siab: muab ib tug ntsuag nyuj, ib tug laug yaj, thiab xya tus thav yaj hnubnyoog ib xyoos uas tsis muaj ib qho phem li. 37-38Muab cov khoom no nrog rau txhua yam uas yuavtsum tau muab fij rau hnub thib ib fij uake.
39“Nov yog tej kevcai uas hais txog tej khoom uas muab hlawv fij, tej qoobloo, tej cawv txivhmab, thiab fij tej khoom ua kev sib raugzoo rau tus TSWV rawsli lub sijhawm uas nej teem tseg rau thaum ua koobtsheej. Tej khoom no yog muab fij ntxiv rau nej tej khoom fij uas nej tau coglus tseg lawm lossis tej khoom uas nej txaussiab fij.”
40Yogli Ntawd, Mauxes thiaj qhia txhua yam uas tus TSWV tau xaaj rau nws lawm rau cov Yixalayees.
Currently Selected:
Teev Npe 29: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
