Teev Npe 28
28
Tej Khoom Fij Txhua Hnub
(Khiav Dim 29:38-46)
1Tus TSWV hais rau Mauxes tias, 2“Koj qhia rau cov Yixalayees hais tias, lawv yuavtsum coj tej khoom noj uas Kuv txaussiab tuaj hlawv fij kom tswqab ntxiag rau Kuv rawsli tau teem tseg lawm.
3“Thiab hais rau lawv tias, Nov yog tej khoom noj uas coj tuaj hlawv fij rau tus TSWV uas yog muab hlawv fij txhua hnub: ob tug thav yaj hnubnyoog ib xyoos uas tsis muaj ib qho phem li. 4Muab ib tug fij rau thaum sawvntxov thiab muab ib tug fij rau thaum yuav tsausntuj, 51 tus thav yaj twg muab 1 kilus hmoov nplej ntse xyaw 1 liv roj txivntoo uas zoo tshajplaws mus fij nrog. 6Nov yog txoj kevcai uas niajhnub muab khoom noj hlawv fij kom tswqab ntxiag ua rau tus TSWV txaussiab, rawsli tau chiv ua tom roob Xinais los lawm. 7Cov cawv txivhmab uas coj mus fij nrog tus menyuam yaj, mas muab 1 liv hliv rau hauv chav pehawm tus TSWV. 8Tus thav yaj uas fij thaum yuav tsausntuj los muab cov cawv txivhmab fij nrog ib yam li tus uas fij thaum sawvntxov thiab. Tej no yog tej khoom noj uas muab hlawv fij tswqab ntxiag ua rau tus TSWV txaussiab.
Khoom Fij Hnub Xanpataus
9“Hnub Xanpataus, muab ob tug thav yaj hnubnyoog ib xyoos uas tsis muaj ib qho phem li, 2 kilus hmoov nplej ntse xyaw roj txivntoo coj mus ua zaub-mov fij, thiab muab cawv txivhmab mus fij nrog. 10Nov yog cov khoom uas yuavtsum coj mus hlawv fij txhua hnub Xanpataus thiab ntxiv rau cov khoom fij uas niajhnub hlawv fij nrog cov cawv txivhmab.
Khoom Fij Txhua Lub Hlis Hnub Xiab Ib
11“Txhua lub hlis hnub xiab ib, hlawv khoom fij rau tus TSWV li no: ob tug ntsuag nyuj, ib tug laug yaj, xya tus thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. 12Tej qoobloo uas coj mus ua khoom fij, muab tej hmoov nplej ntse xyaw roj txivntoo coj mus fij li no: ib tug nyuj twg muab 3 kilus hmoov nplej fij nrog; ib tug laug yaj twg muab 2 kilus hmoov nplej fij nrog; 13thiab ib tug thav yaj twg muab 1 kilus hmoov nplej mus fij nrog. Tej khoom noj no yog coj mus hlawv fij kom tswqab ntxiag ua rau tus TSWV txaussiab.
14“Ib tug nyuj twg muab 2 liv cawv txivhmab fij nrog; ib tug laug yaj muab 1 liv nrab cawv txivhmab fij nrog, thiab ib tug thav yaj twg muab 1 liv cawv txivhmab mus fij nrog. Tej no yog txoj kevcai uas hlawv khoom fij rau hnub xiab ib ntawm txhua lub hlis mus kom tag xyoo. 15Thiab muab ib tug laug tshis tua fij daws txim ntxiv rau tej khoom uas niajhnub coj mus hlawv fij nrog tej cawv txivhmab uas coj mus fij ntawd.
Khoom Fij Thaum Ua Kevcai Hla Dhau
(Levis Kevcai 23:5-14)
16“Ua Kevcai Hla Dhau qhuas tus TSWV yog ua rau thaum lub ib hlis ntuj hnub kaum-plaub. #Khiav 12:1-13; 2Kev 16:1-2 17Hnub thib kaum-tsib yog hnub pib ua lub koobtsheej Kevcai Hla Dhau, uas yog ua kom txwm xya hnub; thaum lub sijhawm ntawd, mas noj cov ncuav tsis xyaw keeb nkaus xwb. #Khiav 12:14-20; 23:15; 34:18; Khiav 16:3-8 18Thawj hnub uas pib ua kevcai yog hnub nej tuaj sibsau pehawm Vajtswv, thiab tsis txhob ua ib yam haujlwm dabtsi li. 19Muab khoom noj hlawv fij rau tus TSWV rawsli no: ob tug ntsuag nyuj, ib tug laug yaj, thiab xya tus thav yaj uas hnubnyoog ib xyoos; txhua tus tsiaj no yog cov uas tsis muaj ib qho phem li.
20“Muab tej hmoov nplej ntse xyaw roj txivntoo li no coj mus ua khoom fij: ib tug nyuj twg muab 3 kilus hmoov nplej fij nrog, ib tug laug yaj twg muab 2 kilus hmoov nplej fij nrog, 21thiab ib tug thav yaj twg muab 1 kilus hmoov nplej mus fij nrog. 22Thiab muab dua ib tug laug tshis mus tua fij daws txim, uas yog ua kevcai ntxuav rau cov pejxeem. 23Tej khoom fij no yog muab ntxiv rau tej uas nej niaj tagkis coj mus hlawv fij rau tus TSWV. 24Ib yam nkaus li ntawd, xya hnub uas nej muab tej zaub-mov ntawd hlawv fij rau tus TSWV, yog ua kom tswqab ntxiag rau tus TSWV. Tej khoom no yog fij ntxiv rau tej khoom uas nej niajhnub hlawv fij thiab tej cawv txivhmab uas yog khoom fij. 25Hnub thib xya nej yuavtsum rov tuaj sibsau pehawm Vajtswv thiab tsis txhob ua ib yam haujlwm dabtsi li.
Khoom Fij Thaum Ua Kevcai Sau Qoobloo
(Levis Kevcai 23:15-22)
26“Thawj hnub uas ua Kevcai Sau Qoobloo, thaum nej coj tej qoob tshiab tuaj fij rau tus TSWV, nej yuavtsum tuaj sibsau pehawm Vajtswv, thiab tsis txhob ua ib yam haujlwm dabtsi li. #Khiav 23:16; 34:22; 2Kev 16:9-12 27Muab khoom mus hlawv fij kom tswqab ntxiag rau tus TSWV li no: ob tug ntsuag nyuj, ib tug laug yaj, thiab xya tus thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. 28Muab cov hmoov nplej ntse xyaw roj txivntoo coj mus fij: ib tug txiv nyuj twg muab 3 kilus hmoov nplej fij nrog, ib tug laug yaj muab 2 kilus hmoov nplej fij nrog, 29thiab ib tug thav yaj twg muab 1 kilus hmoov nplej fij nrog. 30Thiab muab dua ib tug laug tshis mus tua fij daws txim, uas yog ua kevcai ntxuav rau cov pejxeem. 31Fij tej khoom thiab tej cawv txivhmab ntxiv rau tej khoom uas niajhnub hlawv fij, thiab tej qoobloo uas yog khoom fij. Tiamsis tej tsiaj uas muab fij ntawd yuavtsum yog cov uas tsis muaj ib qho phem li.
Currently Selected:
Teev Npe 28: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
