Teev Npe 22
22
Npalaj Tso Neeg Mus Hu Npala-as
1Cov Yixalayees taug kev mus ntxiv thiab mus tsuam yeej so rau hauv lub tiajnrag Mau-am ntawm tus Dej Yauladees sab hnubtuaj ncaj lub nroog Yelikaus sab tid.
2Thaum Xipaus tus tub Npalaj, uas yog cov Mau-am tus vajntxwv, hnov tej uas cov Yixalayees tau ua rau cov Amaules thiab paub tias cov Yixalayees muaj coob npaum licas, 3thiaj ua rau nws thiab tagnrho nws cov neeg ntshai heev.
4Cov Mau-am hais rau cov Midias tej thawjcoj tias, “Tsis ntev no ces pab neeg no yuav ua rau txhua yam uas nyob puagncig peb puastsuaj tag, ib yam li ib tug heev nyuj noj tej nyom hauv tshav zaub ntag.”
Yogli ntawd vajntxwv Npalaj 5thiaj tso neeg mus hais rau Npe-aus tus tub Npala-as hauv lub nroog Pethaus, uas nyob ze tus Dej Yufatis hauv tebchaws Amaus. Lawv coj Npalaj tej lus mus hais rau nws li no: “Kuv xav kom koj paub tias muaj ib haivneeg tau khiav tawm hauv tebchaws Iziv los, lawv faib mus nyob thoobplaws txhua qhov lawm, thiab npajsiab yuav txeeb peb lub tebchaws. #Teev 31:8; 2Pet 2:15-16; Yudas 11 6Lawv coob tshaj peb lawm, yogli ntawd, thov koj ciali tuaj pab kuv foom ib lolus phem rau lawv. Tejzaum peb yuav tua yeej lawv thiab raws tau lawv tawm hauv lub tebchaws no mus. Kuv paub tias thaum twg uas koj foom koobhmoov zoo, ces cov neeg yeej tau txais koobhmoov zoo, thiab thaum twg uas koj foom phem, ces lawv yeej ciali raug tej lus foom phem ntawd.”
7Yogli ntawd, cov Mau-am thiab cov Midias tej thawjcoj txawm muab nyiaj tuaj them tej lus foom phem ntawd. Lawv txawm mus cuag Npala-as thiab piav Npalaj tej lus rau Npala-as mloog. 8Npala-as hais tias, “Nej pw ib hmos ntawm no tso, tagkis kuv mamli qhia rau nej paub tej uas tus TSWV hais rau kuv.” Yogli ntawd, cov Mau-am tej thawjcoj thiaj nrog Npala-as nyob rau ntawd.
9Vajtswv los nug Npala-as hais tias, “Cov neeg uas tuaj so hauv koj tsev ntawd yog leejtwg?”
10Npala-as teb tias, “Vajntxwv Npalaj uas kav tebchaws Mau-am tso cov neeg no tuaj qhia rau kuv 11txog ib co neeg uas los hauv tebchaws Iziv los, thiab tau faib mus nyob thoobplaws txhua qhov hauv tebchaws no lawm. Mas nws xav kom kuv pab nws foom phem rau lawv, nws thiaj muaj peevxwm tua lawv thiab raws tau lawv khiav tawm mus.”
12Vajtswv hais rau Npala-as tias, “Tsis txhob nrog lawv mus, thiab tsis txhob foom ib lolus phem rau cov Yixalayees li, rauqhov lawv yog cov uas twb tau txais Kuv li koobhmoov lawm.”
13Hnub tomqab thaum sawvntxov Npala-as thiaj mus cuag cov neeg uas Npalaj txib tuaj thiab hais rau lawv tias, “Nej ciali rovqab mus tsev; rauqhov tus TSWV tsis pub kuv nrog nej mus.” 14Yogli ntawd, lawv txawm rov los cuag Npalaj thiab piav qhia rau nws hais tias, “Npala-as tsis kam nrog peb los.”
15Ces Npalaj txawm txib ntau tus thawjcoj uas muaj meejmom tshaj cov uas xub mus lawm rov mus dua. 16Lawv mus cuag Npala-as thiab muab Npalaj tej lushais rau Npala-as hais tias: “Thov tsis txhob cia ib yam dabtsi tav koj txoj haukev uas tuaj cuag kuv! 17Kuv yuav muab nqizog rau koj nplua-mias thiab yuav ua txhua yam rawsli koj hais. Thov koj ciali tuaj foom phem rau cov neeg ntawd pub rau kuv.”
18Tiamsis Npala-as teb tias, “Txawm yog vajntxwv Npalaj muab tagnrho tej nyiaj thiab kub hauv nws lub loog rau kuv los kuv yuav tsis muaj peevxwm hla tus TSWV uas yog kuv tus Vajtswv lolus xaaj hlo li. 19Nej so ntawm no ib hmos ib yam li pab uas tuaj cuag kuv thawjzaug, seb tus TSWV puas yuav muaj dua lwm lolus qhia rau kuv.”
20Hmo ntawd Vajtswv los hais rau Npala-as tias, “Yog cov neeg no thov kom koj nrog lawv mus, ces koj ciali npaj thiab nrog lawv mus; tiamsis koj tsuas ua rawsli tej uas Kuv hais rau koj xwb.” 21Yogli ntawd, tagkis sawvntxov Npala-as thiaj tunra thiab nog eeb rau tus neesluav thiab nrog cov Mau-am tej thawjcoj mus lawm.
Npala-as Thiab Nws Tus Neesluav
22Thaum uas Npala-as sawvkev mus ntawd Vajtswv chim heev, ces thaum Npala-as tabtom caij nws tus neesluav nrog rau nws ob tug tubtxib lawv taug kev mus, tus TSWV ib tug timtswv txawm los sawv hauv plawvkev thaiv Npala-as kev. 23Thaum tus neesluav pom tus timtswv sawv nres nrees hauv plawvkev thiab tuav rawv ib rab ntaj, tus neesluav txawm lem loo thiab khiav mus rau nram liaj. Npala-as txawm nplawm tus neesluav kom rov los rau saum txojkev. 24Ces tus timtswv txawm mus sawv hauv txojkev nqaim-nqaim uas nyob nruabnrab ob lub vaj txivhmab uas muaj ob daim ntsa zeb thaiv ob sab ntug kev. 25Thaum tus neesluav pom tus timtswv, tus neesluav phoom yos mus tsoo tim daim ntsa zeb, ces txawm muab Npala-as txhais kotaw nias kiag rau ntawm daim ntsa zeb. Npala-as thiaj rov nplawm tus neesluav ib zaug ntxiv.
26Tus timtswv txawm mus kiag rau tom hauvntej thiab mus sawv kiag ntawm ntu kev uas ti heev, yeej tsis muaj kev lug mus rau sab twg li lawm. 27Zaumno, thaum tus neesluav pom tus timtswv, tus neesluav ciali pw nthi rau hauv av. Npala-as npautaws heev nws thiaj muab nws tus pas nrig nplawm tus neesluav. 28Ces Tus TSWV thiaj ua rau tus neesluav txawj haislus; tus neesluav thiaj hais rau Npala-as tias, “Kuv tau ua licas rau koj, es koj thiaj muab kuv ntaus peb zaug li no?”
29Npala-as teb tias, “Rauqhov koj txhobtxwm ua limhiam rau kuv! Yog kuv muaj ntaj nyob ntawm tes, ces kuv twb muab koj tua povtseg lawm.”
30Tus neesluav teb tias, “Kuv tsis yog tus neesluav uas koj ibtxwm caij los lawm lov? Yav tag los kuv puas tau ua li no rau koj?”
Npala-as teb tias, “Koj yeej tsis tau ua li!”
31Tamsim ntawd tus TSWV ua rau Npala-as pom tus timtswv tuav rawv ib rab ntaj sawv ntawd; Npala-as txawm khoov ntshis pe ti nkaus hauv av. 32Tus timtswv nug hais tias, “Vim licas koj thiaj ntaus koj tus neesluav peb zaug li no? Kuv los nov yog los thaiv koj kev ntag, rauqhov koj tsis tsimnyog yuav taug txojkev no.#22:32: Nqe no sau hais tias koj tsis tsimnyog … txojkev no; paub tsis meej tias lolus Henplais yog txhais licas tiag txog qhov no. 33Tiamsis tus neesluav pom kuv thiab nws lem lug kev peb zaug. Yog nws tsis ua li ntawd, kuv twb muab koj tua thiab tso tus neesluav mus lawm.”
34Npala-as teb tias, “Kuv ua txhaum lawm. Kuv tsis paub tias koj sawv hauv txojkev thiab thaiv tsis pub kuv mus; tiamsis yog koj xav tias kuv tsis txhob mus yuav zoo dua, ces kuv yuav rovqab mus tsev.”
35Tus timtswv hais rau Npala-as tias, “Koj ciali nrog cov neeg no mus, tiamsis koj yuavtsum hais tej lus uas kuv kom koj hais xwb.” Yogli ntawd, Npala-as thiaj nrog lawv mus lawm.
Npalaj Tuaj Tos Npala-as
36Thaum Npalaj hnov tias Npala-as tuaj lawm, Npalaj thiaj mus tos Npala-as pem lub nroog As uas nyob ntawm ntug Dej Anoos ntawm ciamteb Mau-am. 37Npalaj nug Npala-as hais tias, “Uacas thawjzaug uas kuv tso neeg tuaj hu koj, koj ho tsis kam tuaj? Koj xav tias nyobtsam kuv tsis muaj cuabkav muab tau nqizog rau koj no lov?”
38Npala-as teb tias, “Kuv twb tuaj txog lawm ne. Tiamsis tamsim no, kuv muaj hwjchim ua tau dabtsi? Kuv tsuas hais tau li Vajtswv kom kuv hais xwb.”
39Npala-as nrog Npalaj mus tom lub moos Kili-as Huxaus, 40Npalaj muab nyuj muab yaj los tua thiab muab ib co nqaij rau Npala-as thiab cov nomtswv uas nrog nws nyob uake ntawd. 41Tagkis sawvntxov Npalaj coj Npala-as nce mus rau pem Npamaus Npa-as. Thaum nkawd mus txog ped, Npala-as pom cov Yixalayees ibtxhia.
Currently Selected:
Teev Npe 22: MWW2022
Highlight
Share
Compare
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
