Malakaus 3

Tus Txivneej Qhuavtes

(Mathais 12:9-14; Lukas 6:6-11)

1Yexus txawm rovqab mus rau hauv lub tsev sablaj, muaj ib tug txivneej qhuavtes nyob ntawd. 2Cov neeg uas nyob ntawd muaj qeeleej xav komtxim rau Yexus, lawv txawm soj seb hnub Xanpataus Yexus puas yuav kho tus txivneej ntawd txhais tes. 3Yexus hais rau tus txivneej ntawd tias, “Koj sawv los pem hauvntej no.” 4Yexus txawm nug sawvdaws hais tias, “Hnub Xanpataus peb txoj kevcai tsocai rau peb ua tau dabtsi? Ua zoo lossis ua phem? Cawm txojsia lossis txov txojsia?”

Tiamsis sawvdaws nyob ntsiagto xwb. 5Yexus saib cov neeg uas nyob ntawd, Nws chim rau lawv kawg tiamsis Nws kuj hlub tshua txog lawv, rauqhov lawv lub siab tawv heev. Yexus hais rau tus txivneej ntawd tias, “Ciali xyab koj txhais tes.” Nws txawm xyab hlo tes, uaciav txawm zooli qub lawm. 6Tamsim ntawd cov Falixais thiaj tawm hauv tsev sablaj mus nrog kiag Helauj cov neeg sablaj seb yuav ua licas lawv thiaj tua tau Yexus.

Neeg Coob-coob Nyob Nram Ntug Hiavtxwv

7Yexus thiab Nws cov thwjtim mus rau nram ntug Hiavtxwv Kalilais, kuj muaj neeg coob-coob lawv Nws qab mus thiab. Cov neeg ntawd yog tuaj hauv xeev Kalilais tuaj, tuaj nram xeev Yudas tuaj, 8tuaj nram nroog Yeluxalees tuaj, tuaj nram cheebtsam Idumias tuaj, tuaj sab hnubtuaj ntawm tus dej Yauladees tuaj, thiab tuaj pem tej zos uas nyob ze lub nroog Thailes thiab lub nroog Xidoos tuaj. Tagnrho cov neeg ntawd tuaj cuag Yexus, rauqhov lawv hnov txog tej haujlwm uas Nws tau ua los.

9Vim muaj neeg coob heev, Yexus thiaj hais kom Nws cov thwjtim npaj ib lub nkoj tos Nws, kom cov neeg coob-coob ntawd thiaj yuav tsis txiv Nws. 10Vim Yexus tau kho ntau leej zoo mob lawm, mas tej neeg uas muaj mob thiaj pheej sib txiv los kom ze kom lawv thiaj kov tau Nws. #Math 4:1; Lukas 5:1-3 11Txhua zaug uas cov neeg uas muaj cov ntsujplig phem ntawd pom Yexus, lawv yeej qhau cev hlo ntawm Yexus kotaw thiab qw nrov-nrov hais tias, “Koj yog Vajtswv tus Tub!”

12Yexus txwv tunrho tsis pub cov ntsujplig phem ntawd qhia hais tias Nws yog leejtwg.

Yexus Xaiv Kaum-Ob Tug Timthawj

(Mathais 10:1-4; Lukas 6:12-16)

13Dhau ntawd, Yexus txawm nce mus rau pem ib lub roob. Nws hu cov uas Nws xav tau los cuag Nws, ces lawv txawm los cuag Nws. 14Nws xaiv tau kaum-ob leeg, Nws muab lawv hu ua cov timthawj. Nws hais rau lawv hais tias, “Kuv xaiv nej los nrog Kuv thiab Kuv yuav xa nej mus qhia Txoj Moo Zoo, 15thiab nej yuav muaj hwjchim ntiab tau dab tawm.”

16Cov no yog kaum-ob leeg uas Nws xaiv tau: Ximoos (tus uas Yexus tis dua ib lub npe hu ua Petus). 17Xenpedais ob tug tub uas yog Yakaunpaus thiab nws tus kwv Yauhas (Yexus tis npe rau nkawd ob kwvtij no hu ua Npau-anekes, uas txhais tias “Xob Nroo li Tub”); 18Asnrus, Filiv, Npataulaumais, Mathais, Thaumas, Yakaunpaus uas yog Alafais tus tub, Thade-us, Ximoos tus uas hlub nws haivneeg, 19thiab Yudas Ixakali-aus, tus uas ntxeevsiab rau Yexus.

Yexus Thiab Npexenpus

(Mathais 12:22-32; Lukas 11:14-23; 12:10)

20Yexus mus txog hauv ib lub tsev, muaj dua ib cov neeg coob-coob tuaj, ua rau Yexus thiab Nws cov thwjtim tsis khoom noj mov li. 21Thaum Yexus tsev neeg hnov li ntawd, lawv txawm mus nrhiav Yexus thiab coj Nws los tsev, rauqhov muaj neeg hais tias, “Yexus tsis meejpem lawm!”

22Cov xibhwb uas qhia Kevcai qeeleej uas tuaj nram Yeluxalees tuaj hais tias, “Nws muaj Npexenpus nyob rau hauv Nws! Twb yog ntxwgnyoog uas yog cov dab tus thawj pub hwjchim rau Nws ntiab cov dab ntawd tawm!” #Math 9:34; 10:25

23Yexus txawm hu cov neeg coob-coob ntawd los cuag Nws, thiab ua lus pivtxwv qhia rau lawv hais tias: “Xatas yuav ua licas ntiab tau Xatas? 24Yog ib lub tebchaws twg uas faib ua pab ua pawg thiab muaj kev sib tawmtsam, ces lub tebchaws ntawd yeej yuav puastsuaj mus. 25Yog ib tsev neeg twg faib ua pab ua pawg thiab muaj kev sib tawmtsam, ces tsev neeg ntawd yeej yuav tawg tas mus. 26Yog Xatas lub tebchaws raug muab faib ua ntau pab, lawv yeej yuav nyob tsis tau uake, tsuas muaj yuav puastsuaj mus thiab tas li ntawd lawm xwb.

27“Tsis muaj leejtwg uas yuav nkag tau mus rau hauv tus txivneej uas muajzog lub tsev thiab huab nws tej khoom tawm mus, yuavtsum yog nws xub muab tus uas muajzog ntawd khi tso, mas thiaj yuav huab tau tej khoom hauv nws tsev.

28“Kuv qhia tseeb rau nej hais tias, Vajtswv zam tau txhua yam kev txhaum uas neeg ua thiab txhua lolus phem uas neeg hais.#3:28: txhua lolus phem uas neeg hais; lossis tej lus phem uas lawv hais tawmtsam Vajtswv. 29Tiamsis tus uas thuam Vaj Ntsujplig tus Dawbhuv, Vajtswv yeej yuav tsis zamtxim rau nws kiag li, rauqhov nws tau ua yam kev txhaum uas nyob mus ibtxhis.” #Lukas 12:10 ( 30Yexus hais li ntawd, rauqhov muaj qeeleej hais tias, “Yexus muaj dab phem nkag rau hauv Nws.”)

Yexus Niam Thiab Yexus Cov Kwv

(Mathais 12:46-50; Lukas 8:19-21)

31Thaum ntawd Yexus niam thiab Nws cov kwv txawm tuaj txog. Lawv sawv nraumzoov thiab txib neeg mus hu Nws los. 32Muaj neeg coob-coob nyob puagncig Yexus, lawv thiaj hais rau Nws tias, “Koj niam thiab Koj cov kwv thiab Koj cov muam#3:32: Tej phau qub tsis muaj thiab Koj cov muam. lawv nyob sabnraud, lawv nrhiav-nrhiav Koj.”

33Yexus teb tias, “Leejtwg yog Kuv niam? Leejtwg yog Kuv cov kwv?” 34Yexus txawm saib cov neeg uas nyob puagncig Nws thiab hais tias, “Cov no lau, yog Kuv niam thiab Kuv cov kwv! 35Tus uas ua rawsli Vajtswv lub siab nyiam, tus ntawd yog Kuv kwv, Kuv muam, thiab yog Kuv niam.”

Currently Selected:

Malakaus 3: MWW2022

Highlight

Copy