Malakaus 13

Yexus Hais Txog Lub Tuamtsev Yuav Puastsuaj

(Mathais 24:1-2; Lukas 21:5-6)

1Thaum Yexus tabtom tawm hauv lub Tuamtsev mus, Yexus ib tug thwjtim hais rau Nws hais tias, “Xibhwb, Koj saib tej txhibzeb thiab tej tsev no seb, zoonkauj kawg li!”

2Yexus teb tias, “Koj puas pom tej tsev uas loj-loj no? Tej txhibzeb uas luag muab tib ib lub tshooj ib lub ntawd, txhua lub yuav pluam nyias nyob nyias tas huv tibsi.”

Kev Txomnyem Thiab Kev Tsimtxom

(Mathais 24:3-14; Lukas 21:7-19)

3Thaum Yexus nyob pem lub Roob Txiv Ntoo-Roj uas nyob ncaj lub Tuamtsev sab tid, Petus, Yakaunpaus, Yauhas, thiab Asnrus los nug Yexus twjywm. 4Lawv hais tias, “Koj qhia rau peb seb thaum twg mamli muaj tej no? Thiab yuav muaj dabtsi tshwm los qhia rau peb paub tias twb txog lub sijhawm uas muaj tej ntawd lawm?”

5Yexus hais rau lawv tias, “Nej yuavtsum ceevfaj, tsis txhob cia leejtwg ntxias tau nej yuamkev. 6Yuav muaj ntau leej tuaj ntawm Kuv lub npe tuaj hais rau nej tias, ‘Kuv yog Nws!’ Thiab lawv yuav ntxias ntau leej yuamkev. 7Thaum nej hnov kev tsov kev rog nyob ze nej thiab hnov moo txog tej tebchaws uas nyob deb uatsov uarog, nej tsis txhob poobsiab. Yeej yuav muaj tej ntawd, tiamsis tsis tau txhais hais tias twb txog lub sijhawm kawg lawm. 8Ib lub tebchaws yuav sawv tawmtsam ib lub tebchaws, thiab ib haivneeg yuav sawv tawmtsam ib haivneeg. Yuav muaj av qeeg nyob rau txhua qhov, thiab yuav muaj kev tshaib kev nqhis. Tej no zoo ib yam li tus pojniam uas nyuamqhuav pib mob plab yuav yug menyuam xwb.

9“Nej yuavtsum ceevfaj. Yuav muaj neeg ntes nej thiab coj mus rau hauv tsev tu plaub, lawv yuav muab nej ntaus hauv tej tsev sablaj. Nej yuav raug mus sawv tabmeeg tej nomtswv thiab tej vajntxwv ntawm Kuv lub npe ua timkhawv rau lawv txog Txoj Moo Zoo. #Math 10:17-20; Lukas 12:11-12 10Tiamsis uantej lub sijhawm kawg, Txoj Moo Zoo yuavtsum raug muab qhia rau txhua haivneeg tso. 11Thaum luag ntes nej coj mus rau hauv tej tsev hais plaub, nej tsis txhob txhawj tias nej yuav hais licas; thaum txog lub sijhawm ntawd lawm, ciali hais rawsli Vajtswv qhia kom nej hais, rauqhov tej lus uas nej yuav hais ntawd tsis yog nej li lus tiamsis yog Vaj Ntsujplig tus Dawbhuv li lus.

12“Tej kwvtij ib tug yuav muab ib tug rau luag tua. Cov uas yog leejtxiv yuav ua ib yam li ntawd rau lawv tej menyuam thiab. Tej menyuam yuav tawmtsam niamtxiv thiab coj mus rau luag tua. 13Txhua tus yuav ntxub nej vim nej yog cov uas ntseeg Kuv, tiamsis tus uas ua siabntev tiv taus mus txog thaum kawg, tus ntawd yuav dim. #Math 10:22

Yam Phem Kawg Nkaus

(Mathais 24:15-28; Lukas 21:20-24)

14“Nej yuav pom ‘Yam phem kawg nkaus’ sawv hauv qhov chaw uas tsis tsimnyog nws sawv.” (Tus uas nyeem qhov no, nws yuavtsum totaub hais tias lub ntsiablus no yog txhais licas!) “Thaum ntawd cov neeg uas nyob hauv xeev Yudas yuavtsum khiav mus rau pem tej roob. #Dani 9:27; 11:31; 12:11 15Tus uas nyob saum rutsev, txheej tsev lastshav, tsis txhob nkim sijhawm nqis mus nqa ib yam dabtsi hauv tsev tawm. 16Tus uas nyob tom teb, tsis txhob rov los nqa nws lub tsho ntev hauv tsev. 17Lub sijhawm ntawd tej pojniam uas suab menyuam thiab tej pojniam uas muaj menyuam mos noj mis yuav txomnyem kawg nkaus li. 18Thov Vajtswv pab kom tej no tsis txhob tshwmsim rau thaum lub caij ntuj no! 19Rauqhov txij thaum Vajtswv tsim lub ntiajteb los txog niajhnub no, yeej tsis tau muaj kev txomnyem uas yuav heev npaum li zaum no, thiab yav tomntej los yuav tsis muaj li zaum no lawm. 20Tiamsis tus Tswv twb txiav hnubnyoog ntawm lub sijhawm ntawd kom luv lawm. Yog Nws tsis ua li ntawd, yeej yuav tsis muaj leejtwg dim li. Qhov uas Vajtswv txiav hnubnyoog kom luv ntawd, twb yog vim Nws hlub Nws haivneeg uas Nws tau xaiv cia lawm.

21“Thaum ntawd, yog leejtwg hais rau nej hais tias, ‘Nej saib seb, tus Mexiyas nyob ntawm no!’ Lossis hais tias, ‘Nws nyob tod!’ Nej tsis txhob ntseeg tej ntawd. 22Rauqhov yuav muaj tej Mexiyas cuav thiab tej xibhwb cevlus cuav uas tshwm tuaj. Lawv yuav los ua tej txujci tseemceeb ntxias Vajtswv haivneeg uas Nws twb xaiv lawm, seb lawv puas yuamkev tau. 23Nej yuavtsum ceevfaj, rauqhov Kuv twb qhia txhua yam rau nej paub uantej lawm.

Neeg Leejtub Yuav Los

(Mathais 24:29-31; Lukas 21:25-28)

24“Thaum tej kev txomnyem ntawd dhau lawm, lub hnub yuav tsaus, lub hli yuav tsis ci, #Yaxaya 13:10; Yau 2:10, 31; 3:15; Tshwm 6:12; Khiav 13:10; Exek 32:7 25tej hnubqub yuav poob saum ntuj los, thiab tej uas muaj hwjchim nyob saum nruabntug yuav uazog koog huv tibsi. #Yaxaya 34:4; Tshwm 6:13; Yau 2:10 26Thaum ntawd sawvdaws yuav pom Neeg Leejtub tshwm saum cov huab los, nrog Nws lub hwjchim thiab tus tshwjchim ci ntsa-iab. #Teshl 7:13; Tshwm 1:7 27Nws yuav txib Nws cov timtswv mus txhuanrho plaub cegkaum ntuj, qaws cov neeg uas Vajtswv twb xaiv cia lawm, tagnrho qabntuj kawg mus txog rau hauvntuj kawg, los nyob uake.

Kawm Txog Tsob Txiv Ncuavpias

(Mathais 24:32-35; Lukas 21:29-33)

28“Nej ciali kawm los ntawm tsob txiv ncuavpias. Thaum nws tej ceg rov nthaw kaus ntsuab thiab pib hlav nplooj mosnyoos tuaj, nej paub tias twb yuav txog lub caij ntuj kub. 29Ib yam nkaus li ntawd, thaum nej pom tej ntawd tshwmsim, nej yuav paub tias lub sijhawm twb los yuav txog, twb nyob ntawm qhovrooj lawm.#13:29: Lub sijhawm twb los yuav txog, twb nyob ntawm qhovrooj lawm; lossis Nws twb pib yuav los sai-sai no lawm. 30Ncontsoov tias txhua yam no yuav tshwmsim los uantej cov neeg tiam no tuag tas. 31Lub ntuj thiab lub ntiajteb yuav ploj mus, tiamsis Kuv tej lus qhia yuav tsis ploj kiag li.

Tsis Muaj Leejtwg Paub Hnub Thiab Sijhawm

(Mathais 24:36-44)

32“Tsis muaj leejtwg paub tias yog hnub ntawd lossis lub sijhawm ntawd, txawm yog cov timtswv ceebtsheej thiab Leejtub los yeej tsis paub; tsuas yog Leejtxiv tibleeg thiaj paub xwb. #Math 24:36 33Nej yuavtsum ceevfaj thiab zov tos, rauqhov nej tsis paub tias thaum twg lub sijhawm ntawd yuav los txog. 34Yuav zooli ib tug txivneej uas tawm hauv nws lub tsev mus rau lwmqhov, tseg nws cov tubtxib zov tsev thiab saib haujlwm, lawv nyias muaj nyias ib tes haujlwm ua. Thiab nws hais kom tus zov qhovrooj, zov zoo-zoo. #Lukas 12:36-38 35Yogli ntawd, nej yuavtsum zov zoo-zoo, rauqhov nej tsis paub tias thaum twg tus tswvtsev ntawd yuav rov los. Tejzaum nws yuav los thaum tsausntuj lossis thaum ib taghmo lossis thaum qaib qua lossis thaum kajntug. 36Yog nws ciali los tshwm plaws tamsim, txhob cia nws tseem pom nej pw tsaugzog. 37Tej lus uas Kuv qhia rau nej, Kuv hais rau sawvdaws ib yam nkaus tias: Ceevfaj zov tos!”

Currently Selected:

Malakaus 13: MWW2022

Highlight

Copy