Mathais 8

Yexus Kho Tus Txivneej Mob Ruas

(Malakaus 1:40-45; Lukas 5:12-16)

1Thaum Yexus nqis pem roob los, muaj neeg coob-coob lawv Yexus qab. 2Muaj ib tug txivneej mob ruas#8:2: mob ruas: lus Kilis siv lolus no rau ntau yam kab mob uas yog mob phem-phem rau ntawm daim tawv nqaij, kuj yuav tsis yog kiag mob ruas thiab. los txhoscaug ntua ntawm Nws xubntiag thiab thov hais tias, “Tus Tswv, yog Koj txaussiab tiag, Koj yeej muaj cuabkav kho tau kom kuv zoo.”#8:2: kho tau kom kuv zoo: Yam mob no lawv suav tias yog ib yam uas ua rau neeg tsis huv rawsli lawv tej kevcai.

3Yexus thiaj cev tes mus tuav nkaus tus txivneej ntawd thiab hais tias, “Kuv txaussiab pab koj, koj tej ruas ciali zoo hlo!” Tamsim ntawd nws tej ruas txawm zoo tas huv tibsi lawm. 4Yexus hais rau nws tias, “Koj tsis txhob mus qhia zaj no rau leejtwg li, tiamsis koj ciali ncajnraim mus cuag tus povthawj hlob thiab kom nws tshuaj saib koj lub cev; thiab koj nqa khoom mus hlawv fij rau Vajtswv rawsli Mauxes tau qhia tseg, thiaj ua tau timkhawv rau sawvdaws paub tias koj twb zoo lawm.” #Levi 14:1-32

Yexus Kho Tus Thawj Tubrog Loos Tus Tubtxib

(Lukas 7:1-10)

5Thaum Yexus mus txog hauv lub nroog Kapena-us, haiv neeg Loos ib tug thawj tubrog pawg pua tau tuaj cuag Yexus thiab thov kom Yexus pab nws. Nws thov hais tias, 6“Tus Tswv, kuv tus tubtxib mob hnyav thiab pw tom tsev, nws tuagtes tuagtaw, mas nws txomnyem kawg li.”

7Yexus hais tias, “Kuv yuav mus kho nws kom zoo.”

8Tus thawj tubrog teb tias, “Tus Tswv, Koj tsis txhob mus. Kuv yog ib tug uas tsis tsimnyog yuav txais Koj mus rau hauv kuv lub tsev. Thov Koj hais ib los xwb ces kuv tus tubtxib yeej yuav zoo. 9Kuv kuj yog ib tug neeg uas nyob hauvqab kev tswjhwm ntawm lwmtus thawjcoj, tiamsis kuj muaj ib cov tubrog uas nyob hauvqab kev tswjhwm ntawm kuv thiab. Yog kuv hais rau tus no tias, ‘Mus!’ ces nws yeej mus. Yog kuv hais rau tus tod tias, ‘Los!’ ces nws yeej los. Thiab yog kuv hais rau kuv tus tubqhe tias, ‘Ua li no!’ ces nws yeej ua li ntawd.”

10Thaum Yexus hnov li ntawd, Nws xav tsis thoob li, Nws thiaj tig mus hais rau cov neeg uas raws Nws qab hais tias, “Kuv qhia tseeb rau nej hais tias, Kuv tsis tau pom dua ib tug neeg hauv cov Yixalayees uas muaj kev ntseeg loj npaum li no. 11Kuv qhia rau nej hais tias, yuav muaj neeg coob-coob tuaj sab hnubtuaj thiab sab hnubpoob tuaj. Lawv yuav nrog Anplahas, Ixaj, thiab Yakhauj zaum nojhaus uake hauv Vajtswv lub Ntuj Ceebtsheej. #Lukas 13:29 12Tiamsis cov neeg uas twb tsimnyog tau mus nyob hauv Vajtswv lub Ntuj Ceebtsheej, yuav raug pov rau hauv qhov uas tsausntuj nti. Lawv yuav quaj qw tom hniav qees nyob rau qhov ntawd.” #Math 22:13; 25:30; Lukas 13:28 13Yexus thiaj hais rau tus thawj tubrog ntawd tias, “Koj ciali rovqab mus tsev, koj ntseeg licas koj yeej yuav tau txais li ntawd.” Ces tamsim ntawd tus thawj tubrog tus tubtxib txawm ciali zoo hlo lawm.

Yexus Kho Ntau Leej

(Malakaus 1:29-34; Lukas 4:38-41)

14Thaum Yexus mus rau hauv Petus tsev, Nws pom Petus niamtais uanpaws thiab pw saum txaj. 15Yexus tuav nws txhais tes ces nws txawm zoo thiab nws sawv los tiam Yexus.

16Thaum yuav tsausntuj muaj neeg coj cov neeg uas raug dab coob leej tuaj cuag Yexus. Yexus hais tiblos xwb ntiab tau cov ntsujplig phem ntawd tawm, thiab Nws kho tej neeg uas muaj mob txhua tus zoo huv tibsi. 17Yexus ua li no kom tiav rawsli Yaxayas, uas yog tus xibhwb cev Vajtswv lus tau qhia tseg lawm hais tias, “Nws tau tshem peb tej kev tsaugmuag thiab ris peb tej kab mob huv tibsi mus.” #Yaxaya 53:4

Tus Uas Xav Nrog Yexus Mus

(Lukas 9:57-62)

18Thaum Yexus pom cov neeg coob-coob tuaj nyob puagncig Nws, Yexus txawm hais rau Nws cov thwjtim kom lawv hla hiavtxwv mus rau sab tim ub. 19Muaj ib tug xibhwb uas qhia Kevcai tuaj cuag Yexus thiab hais tias, “Xibhwb, txawm yog Koj mus qhovtwg los kuv yuav nrog Koj mus qhov ntawd.”

20Yexus teb nws hais tias, “Hma tseem muaj qhov nkaum thiab noog tseem muaj zes nyob, tiamsis Neeg Leejtub tsis muaj lub chaw rau ncoo.”

21Muaj dua ib tug thwjtim hais tias, “Tus Tswv, thov cia kuv xub rovqab mus faus kuv txiv tso.”

22Yexus teb tias, “Koj ciali nrog Kuv mus, cia cov neeg tuag faus lawv tus tuag.”

Yexus Txwv Cua

(Malakaus 4:35-41; Lukas 8:22-25)

23Tomqab ntawd Yexus txawm nce mus rau hauv nkoj thiab Nws cov thwjtim nrog Nws mus. 24Tamsim ntawd txawm muaj cuadaj cuadub hlob heev ntsawj lub nkoj thiab dej nphau los rau hauv lub nkoj. Tiamsis Yexus tseem pw tsaugzog. 25Cov thwjtim txawm mus tsa Yexus thiab hais tias, “Tus Tswv, thov Koj pab peb, peb yuav tuag tiag-tiag li lau!”

26Yexus teb tias, “Uacas nej yuav ntshai ualuaj? Uacas nej kev ntseeg yuav me ualuaj li!” Ces Yexus txawm sawvtsees los txwv cua thiab dej, ua rau cua txawm tu thiab dej tsis ntas lawm.

27Cov thwjtim xav tsis thoob li, lawv sibnug zomzaws hais tias, “Tus neeg no yog leejtwg? Txawm yog cua thiab dej los tseem mloog Nws lus thiab!”

Yexus Kho Ob Tug Neeg Raug Dab

(Malakaus 5:1-20; Lukas 8:26-39)

28Thaum Yexus hla hiavtxwv mus txog sab tim ub uas yog cheebtsam Nkadalas, Yexus txawm ntsib ob tug txivneej uas raug dab tawm tom roob tojntxas los. Nkawd nyaum heev, ua rau tsis muaj leejtwg taug tau txojkev ntawd li. 29Tamsim ntawd nkawd txawm qw nrov-nrov hais tias, “Vajtswv tus Tub, Koj tuaj thab wb ua dabtsi? Twb tsis tau txog lub sijhawm, Koj txawmsiv tuaj rautxim rau wb lawm lov?”

30Nyob tsis deb ntawd, muaj ib pab npua coob-coob tabtom nrhiav noj. 31Cov dab txawm thov Yexus hais tias, “Yog Koj yuav ntiab peb tawm, thov cia peb nkag mus nyob rau hauv pab npua ntawd.”

32Yexus hais rau cov dab ntawd tias, “Ciali mus!” Yogli, cov dab ntawd thiajli tawm thiab mus nkag rau hauv pab npua, ces tagnrho pab npua ntawd txawm khiav mus poob tsag tsua rau hauv hiavtxwv thiab tuag tag huv tibsi.

33Cov neeg uas zov npua ntawd thiaj khiav mus rau hauv nroog, qhia tej xwmtxheej ntawd thiab qhia txog ob tug txivneej uas raug dab rau sawvdaws mloog. 34Yogli ntawd, tagnrho cov neeg uas nyob hauv nroog txawm tawm tuaj saib Yexus; thaum lawv pom Yexus, lawv txawm thov kom Nws tawm hauv lawv cheebtsam ntawd mus rau lwmqhov.

Currently Selected:

Mathais 8: MWW2022

Highlight

Copy