Mathais 7

Kev Txiavtxim Rau Lwmtus

(Lukas 6:37-38, 41-42)

1“Tsis txhob txiavtxim rau lwmtus, kom Vajtswv thiaj yuav tsis txiavtxim rau nej. 2Rauqhov Vajtswv yuav txiavtxim rau nej ib yam nkaus li nej txiavtxim rau lwmtus, thiab nej muab lub luaj licas luj rau lwmtus, Vajtswv yuav muab lub luaj li ntawd luj rov rau nej. #Malak 4:24

3“Vim licas koj saib qhov nyuag hmoov ntoo uas nyob hauv koj tus kwvtij lub qhovmuag, tiamsis koj ho tsis quavntsej txog yav ntoo uas nyob hauv koj lub qhovmuag? 4Koj twb muaj ib yav ntoo nyob hauv koj lub qhovmuag, vim licas koj tseem muaj cuabkav mus hais rau koj tus kwvtij tias, ‘Cia kuv pab muab qhov nyuag hmoov ntoo uas nyob hauv koj lub qhovmuag rho tawm?’ 5Koj yog neeg ntsejmuag ncaj siabnkhaus! Koj yuavtsum xub muab yav ntoo uas nyob hauv koj lub qhovmuag rho tawm tso, koj thiaj yuav pomkev tseeb muab qhov nyuag hmoov ntoo uas nyob hauv koj tus kwvtij lub qhovmuag rho tawm.

6“Tsis txhob muab yam uas dawbhuv rau dev, nyobtsam dev tig los tom nej. Tsis txhob muab tej hlaws pov rau npua hauvntej, nyobtsam npua muab tsuj.

Thov, Nrhiav, Khob

(Lukas 11:9-13)

7“Nej thov, nej yuav tau; nej nrhiav, nej yuav ntsib; nej khob, lub qhovrooj yuav qhib rau nej. 8Rauqhov txhua tus uas thov yeej tau, txhua tus uas nrhiav yeej ntsib, thiab txhua tus uas khob, lub qhovrooj yeej qhib rau nws. 9Nej cov uas yog leejtxiv, yog nej tus menyuam thov ncuav, nej puas yuav muab ib lub pobzeb rau nws? 10Lossis yog tus menyuam thov ib tug ntses, nej puas yuav muab ib tug nab rau nws? 11Txawm nej yog neeg phem npaum licas los nej tseem paub muab yam uas zoo rau nej tej menyuam. Yogli ntawd, nej Leejtxiv uas nyob saum ntuj ceebtsheej, yimhuab yuav muab tej uas zoo dua tej ntawd rau txhua tus uas thov Nws!

12“Yog nej xav kom lwmtus ua licas rau nej, nej yuavtsum ua ib yam li ntawd rau lwmtus thiab. Qhov no thiaj yog lub ntsiablus hauv Mauxes txoj Kevcai thiab yog cov xibhwb cev Vajtswv lus tej lus qhia. #Lukas 6:31

Lub Qhovrooj Nqaim

(Lukas 13:24)

13“Nej yuavtsum mus ntawm lub qhovrooj nqaim mus, rauqhov lub qhovrooj loj thiab txojkev dav yog yuav coj mus ntsib kev puastsuaj thiab cov neeg uas taug txojkev ntawd muaj coob heev. 14Tiamsis lub qhovrooj uas coj mus tau txojsia mas nqaim thiab txojkev mus yeej nyuaj, cov neeg uas nrhiav tau txojkev ntawd muaj tsawg heev.

Tsob Ntoo Thiab Cov Txiv

(Lukas 6:43-44)

15“Nej yuavtsum ceevfaj txog cov xibhwb cevlus cuav; thaum lawv tuaj txog ntawm nej, saib sabnraud mas zoo cuag yaj, tiamsis sabhauv mas phem cuag hma. 16Thaum nej pom lawv tes haujlwm nej yuav paub. Tsob pos nqe hlau yeej tsis txi txivhmab, thiab tsob ntoo pos paj ntsha yeej tsis txitxiv ncuavpias. 17Ib yam nkaus li ntawd, tsob ntoo zoo yeej txi cov txiv zoo, tsob ntoo phem yeej txi cov txiv phem. 18Tsob ntoo zoo yeej tsis txi cov txiv phem, thiab tsob ntoo phem yeej tsis txi cov txiv zoo. 19Txhua tsob ntoo uas tsis txi cov txiv zoo, yeej raug muab ntov thiab muab pov rau hauv cub hluavtaws. #Math 3:10; Lukas 3:9 20Yogli ntawd, nej yeej yuav paub cov xibhwb cevlus cuav los ntawm tes haujlwm uas lawv ua. #Math 12:33

Kuv Yeej Tsis Paub Nej

(Lukas 13:25-27)

21“Tsis yog txhua tus uas hu Kuv hais tias, ‘Tus Tswv, Tus Tswv,’ ces yuav tau mus Vajtswv lub Ntuj Ceebtsheej, tiamsis tsuas yog tus uas ua rawsli Kuv Txiv uas nyob saum ntuj lub siab nyiam thiaj tau mus xwb. 22Thaum Hnub Txiavtxim los txog, yuav muaj ntau leej hais rau Kuv tias, ‘Tus Tswv, Tus Tswv, peb tau siv Koj lub npe qhia Vajtswv Txojlus, peb tau tuav Koj lub npe ntiab ntau tus dab tawm thiab ua ntau yam txujci tseemceeb!’ 23Thaum ntawd Kuv yuav hais rau lawv tias, ‘Kuv yeej tsis paub nej. Cov niag neeg siabphem, nej ciali khiav ntawm Kuv mus!’ #Nnkauj 6:8

Ob Tug Kws Ua Tsev

(Lukas 6:47-49)

24“Yogli ntawd, txhua tus uas hnov Kuv tej lus thiab ua rawsli tej lus ntawd, nws piv ib yam li tus uas muaj tswvyim tsa nws lub tsev rau saum pobzeb. 25Thaum los nagxob nagcua, dej nyab thiab cua ntsawj ntaus lub tsev, los lub tsev ntawd tsis vau, rauqhov yog nws tsa rau saum pobzeb lawm.

26“Tiamsis tus uas hnov Kuv tej lus thiab tsis ua rawsli tej lus ntawd, ces nws piv ib yam li tus uas tsis muaj tswvyim, nws ua nws lub tsev rau saum cov xuabzeb. 27Thaum los nagxob nagcua, dej nyab thiab cua ntsawj ntaus lub tsev, ces lub tsev ntawd txawm vau thiab puastsuaj tag huv tibsi lawm!”

Yexus Muaj Hwjchim

28Thaum Yexus qhia tej no tag lawm, cov neeg coob-coob uas tuaj mloog Yexus qhia ntawd xav tsis thoob li, 29Vim Nws qhia li ib tug uas muaj hwjchim heev, tsis thooj li cov xibhwb uas qhia Kevcai qhia. #Malak 1:22; Lukas 4:32

Currently Selected:

Mathais 7: MWW2022

Highlight

Copy