Mathais 6

Qhia Txog Kev Pab Lwmtus

1“Nej yuavtsum ceevfaj, tsis txhob ua ncajncees kom luag qhuas nej xwb. Yog nej ua li ntawd, nej Leejtxiv uas nyob saum ntuj ceebtsheej yuav tsis muab nqizog rau nej. #Math 23:5

2“Yogli ntawd, thaum nej muab ib yam dabtsi rau tej neeg txomnyem, nej tsis txhob ibke muab ibke tshuab raj, zooli cov neeg ntsejmuag ncaj siabnkhaus ua nyob rau hauv tej tsev sablaj thiab tom tej kev tshuam kom luag qhuas. Kuv qhia rau nej hais tias, lawv twb tau lawv tej nqizog txaus nkaus lawm. 3Tiamsis thaum nej muab ib yam dabtsi rau tej neeg txomnyem, nej tsis txhob pub nej sab tes laug paub tias nej sab tes xis ua dabtsi, 4kom qhov uas nej ua ntawd thiaj tsis muaj leejtwg paub. Nej Leejtxiv tus uas pom tej nej ua twjywm ntawd, Nws yuav muab nqizog rau nej.

Qhia Txog Kev Thov Vajtswv

(Lukas 11:2-4)

5“Thaum nej thov Vajtswv, nej tsis txhob ua li cov neeg ntsejmuag ncaj siabnkhaus ua! Lawv nyiam mus sawv thov Vajtswv hauv tej tsev sablaj thiab ntawm tej kev tshuam kom txhua tus thiaj yuav pom lawv. Kuv qhia rau nej hais tias, lawv twb tau lawv tej nqizog txaus nkaus lawm. #Lukas 18:10-14 6Tiamsis thaum nej thov Vajtswv, ciali mus rau hauv nej chav tsev thiab kaw qhovrooj tso, nej mamli thov nej Leejtxiv tus uas nej qhovmuag tsis pom. Nej Leejtxiv tus uas pom tej nej ua twjywm ntawd, Nws yuav muab nqizog rau nej.

7“Thaum nej thov Vajtswv, tsis txhob hais mus hais los tej uas tsis muaj qabhau ib yam li cov neeg tsis paub Vajtswv hais; lawv xav tias yog lawv hais ntau-ntau lo, mas lawv cov nyuag vajtswv thiaj yuav hnov. 8Nej tsis txhob ua li lawv, vim nej Leejtxiv twb paub uantej txog tej uas nej xav yuav ntawd lawm. 9Nej yuavtsum thov li no hais tias,

“ ‘Peb Leejtxiv uas nyob saum ntuj ceebtsheej,

thov kom sawvdaws hwm Koj lub npe;

10thov kom Koj lub tebchaws los;

thov kom peb ua tau rawsli Koj lub siab nyiam ib yam li cov uas nyob saum ntuj.

11Thov Koj pub kom peb muaj noj muaj haus txhua hnub.#6:11: txhua hnub; lossis rau hnubno, lossis rau tagkis.

12Thov Koj zamtxim rau peb

ib yam li peb twb zamtxim rau cov uas tau ua txhaum rau peb lawm.

13Thov Koj tsis txhob coj peb mus raug kev simsiab,

tiamsis thov Koj pab kom peb dim ntawm dab ntxwgnyoog.’#6:13: Tej phau ntawv qub uas xuas tes sau, ntxiv Rauqhov lub tebchaws, lub hwjchim, thiab tus tshwjchim puavleej yog Koj li mus ibtxhis. Amees.

14“Yog nej zamtxim rau tus uas ua txhaum rau nej lawm, nej Leejtxiv uas nyob saum ntuj ceebtsheej yuav zam nej lub txim thiab. #Malak 11:25-26 15Tiamsis yog nej tsis zamtxim rau lwmtus, nej Leejtxiv yuav tsis zam nej lub txim thiab.

Qhia Txog Kevcai Yoo Mov

16“Thaum nej ua kevcai yoo mov, nej tsis txhob ua ntsejmuag mluasmlob zooli cov neeg ntsejmuag ncaj siabnkhaus ua. Lawv uatxuj tsis ntxuav muag li, kom sawvdaws paub tias yog lawv yoo mov. Kuv qhia rau nej hais tias, lawv twb tau lawv tej nqizog txaus nkaus lawm. 17Tiamsis thaum nej ua kevcai yoo mov, nej ciali ntxuav muag thiab ntsis plaubhau, 18kom lwmtus thiaj tsis paub tias yog nej yoo mov. Tsuas yog nej Leejtxiv tus uas nej qhovmuag tsis pom tibleeg thiaj paub xwb. Nej Leejtxiv tus uas pom tej nej ua twjywm ntawd, Nws yuav muab nqizog rau nej.

Kev Npluanuj Saum Ntuj Ceebtsheej

(Lukas 12:33-34)

19“Tsis txhob khaws nyiajtxiag thiab txhua yam muajnqis cia rau nej hauv lub ntiajteb no vim tias yuav muaj ntsaum kabrwg thiab xeb noj, thiab muaj tubsab tuaj nyiag tau. #Yakau 5:2-3 20Tiamsis nej ciali khaws nyiajtxiag thiab txhua yam uas muajnqis cia saum ntuj ceebtsheej, qhov ntawd tsis muaj ntsaum kabrwg thiab xeb noj, thiab tsis muaj tubsab tuaj tsoo nkag rau hauv tsev thiab nyiag tau. 21Rauqhov nej tej nyiajtxiag nyob qhovtwg, nej lub siab yeej yuav nyob qhov ntawd.

Lub Teeb Uas Ci Rau Lub Cev

(Lukas 11:34-36)

22“Lub qhovmuag yog lub teeb uas ci rau lub cev pomkev. Yog nej lub qhovmuag tseem zoo, tagnrho nej lub cev yuav pomkev kajnrig; 23tiamsis yog nej lub qhovmuag tsis zoo lawm, ces tagnrho nej lub cev yuav tsausntuj nti. Yog tias qhov kaj uas nyob rau hauv nej tsaus lawm, qhov tsaus ntawd yuav tsaus npaum licas ntxiv!

Vajtswv Thiab Nyiajtxiag

(Lukas 16:13; 12:22-31)

24“Tsis muaj leejtwg yuav ua tau haujlwm rau ob tug tswv. Nws yeej yuav ntxub ib tug thiab nyiam ib tug; nws yeej yuav hwm ib tug thiab saib tsis taus ib tug. Yog nej yuav muab Vajtswv thiab nyiajtxiag saib hlob ib yam nkaus yeej tsis tau kiag li.

25“Vimli no Kuv thiaj qhia kom nej tsis txhob txhawj txog nej lub neej hais tias nej yuav noj yuav haus dabtsi, lossis txhawj txog nej lub cev hais tias nej yuav hnav dabtsi. Puas yog txojsia tseemceeb dua tej zaub-mov, thiab lub cev tseemceeb dua tej ristsho? 26Nej ua tibzoo saib tej me nas me noog: lawv tsis cog qoobloo, tsis sau los ntim rau hauv txhab; tiamsis nej Leejtxiv uas nyob saum ntuj ceebtsheej tseem yug lawv! Nej tseem muajnqis tsis npaum tej nas-noog ntawd thiab lov? 27Nej tej kev txhawj puas yuav ua rau nej muaj sia nyob ntev zog ntxiv?#6:27: nyob ntev zog ntxiv; lossis siab zog tuaj.

28“Thiab ua licas nej yuav txhawj tias nej yuav muab dabtsi hnav? Nej saib tej pajntoos tom tiajnrag tawg licas: lawv twb tsis ua haujlwm lossis tsis ntos ntaub ntos xov. 29Tiamsis Kuv qhia rau nej hais tias, txawm yog vajntxwv Xalumoos npluanuj npaum ntawd los nws twb tsis tau hnav ib cev ristsho zoo npaum li tej pajntoos ntawd ib lub li. #1Vaj 10:4-7; 2Xwm 9:3-6 30Tej nyuag nrojtsuag uas muaj nyob hnubno, tagkis xwb luag twb yuav muab pov hlawv rau hauv qhovcub, los Vajtswv tseem pub rau nws tawgpaj zoonkauj kawg li. Nej xav tias Vajtswv yuav tsis pub rau nej muaj hnav zoo dua tej nrojtsuag ntawd no lov? Uacas nej kev ntseeg yuav me ualuaj li!

31“Yogli ntawd, nej tsis txhob txhawj tias, ‘Peb yuav noj dabtsi? lossis yuav haus dabtsi? lossis yuav hnav dabtsi?’ 32(Cov neeg uas tsis paub Vajtswv, lawv niajhnub txhawj txog tej no.) Nej Leejtxiv uas nyob saum ntuj ceebtsheej yeej paub tias nej cheemtsum muaj tej no. 33Tiamsis nej yuavtsum xub nrhiav Vajtswv lub Tebchaws thiab Nws txoj kev ncajncees tso, Vajtswv mamli muab tagnrho tej no rau nej. 34Yogli ntawd, nej tsis txhob txhawj rau tagkis, rauqhov tagkis yeej muaj kev txhawj txaus rau tagkis lawm. Kev nyuajsiab hnub twg yeej muaj txaus rau hnub ntawd, tsis txhob mus nrhiav kev nyuajsiab los tsav ntxiv.

Currently Selected:

Mathais 6: MWW2022

Highlight

Copy