Mathais 25

Zaj Lus Pivtxwv Hais Txog Kaum Tus Hluasnkauj

1“Lub sijhawm ntawd Vajtswv lub Ntuj Ceebtsheej yuav piv ib yam li kaum tus hluasnkauj uas taws teeb mus tos tus nraugvauv. #Lukas 12:35 2Tsib tug ruam thiab tsib tug ntse. 3Cov uas ruam, lawv nqa teeb tiamsis tsis nqa roj txhab nrog lawv mus. 4Cov uas ntse, lawv nqa teeb thiab ib leeg nqa ib hwj roj txhab nrog lawv mus. 5Twb lig-lig lawm tus nraugvauv pheej tsis txawj tuaj, ces lawv txawm tsaugzog ncaws nrujnris.

6“Thaum txog ib taghmo txawm muaj ib lub suab hu nrov-nrov hais tias, ‘Tus nraugvauv tuaj lawm lau! Ciali tawm tuaj tos Nws!’ 7Kaum tus hluasnkauj txawm sawv thiab nyias kho nyias lub teeb kom cig. 8Ces tsib tug ruam hais rau tsib tug ntse tias, ‘Thov muab nej cov roj faib mentsis rau peb thiab, rauqhov peb cov teeb twb yuav tuag.’ 9Tsib tug uas ntse teb tias, ‘Tsis tau, cov roj tsis txaus rau peb thiab nej. Nej ciali mus tom kiab thiab yuav ntxiv rau nej.’ 10Tiamsis thaum tsib tug ruam tabtom mus yuav roj lawm; tus nraugvauv txawm tuaj txog. Tsib tug uas yeej npaj txhij lawm, thiaj nrog tus nraugvauv mus noj tshoob hauv tsev thiab lub qhovrooj kuj kaw nkaus rau lawm.

11“Tomqab ntawd tsib tug hluasnkauj uas ruam rov los txog. Lawv txawm hu hais tias, ‘Tus tswv! Tus tswv! Thov qhib qhovrooj rau peb!’ #Lukas 13:25 12Tus nraugvauv teb tias, ‘Kuv qhia tseeb rau nej hais tias, Kuv tsis paub nej!’ ”

13Yexus xaus lus hais tias, “Nej yuavtsum ceevfaj, rauqhov nej tsis paub hnub twg thiab lub sijhawm twg yuav muaj li ntawd.

Zaj Lus Pivtxwv Hais Txog Peb Tug Tubtxib

(Lukas 19:11-27)

14“Lub sijhawm ntawd Vajtswv lub Ntuj Ceebtsheej yuav piv ib yam li ib tug txivneej uas yuav mus rau txawv tebchaws; nws hu nws cov tubtxib los thiab kom lawv saib nws tej vajtse thiab tej qhov txhia chaw. 15Nws muab 5 taslas#25:15: 1 taslas yog raug nqi li ntawm 6,000 denalis. 1 denalis yog raug nqi li ib tug neeg mus khwv ib hnub. nyiaj rau ib tug, muab 2 taslas rau ib tug, thiab muab 1 taslas rau ib tug; lawv nyias tau txais rawsli nyias lub peevxwm. Ces nws txawm mus lawm. 16Tus tubtxib uas tau 5 taslas txawm coj mus ua luam tamsim, thiab nws tsam 5 taslas ntxiv. 17Tus tubtxib uas tau 2 taslas kuj coj mus ua luam tsam 2 taslas ntxiv. 18Tiamsis tus tubtxib uas tau 1 taslas txawm muab nws tus tswv cov nyiaj coj mus khawb qhov thiab faus av cia.

19“Tomqab ntawd ntev loo, tus tswv rovqab los nrog lawv txheeb tej ntaub ntawv saib seb lawv muab cov nyiaj ntawd mus ua licas lawm. 20Tus tubtxib uas tau 5 taslas txawm nqa 5 taslas uas nws tsam los thiab hais tias, ‘Tus Tswv, koj muab 5 taslas rau kuv, koj saib seb, kuv tsam 5 taslas thiab.’

21“Tus tswv hais tias, ‘Zoo heev, koj yog tus tubtxib uas zoo thiab ncajncees! Koj ncajncees rau tej yam uas me-me, yogli ntawd, kuv yuav tsa koj ua tus saib yam uas loj. Koj ciali los thiab koom nrog kuv txoj kev zoosiab!’

22“Tus tubtxib uas tau 2 taslas txawm los hais tias, ‘Tus tswv, koj muab 2 taslas rau kuv, koj saib seb, kuv tsam 2 taslas thiab.’ 23Tus tswv hais tias, ‘Zoo heev, koj yog tus tubtxib uas zoo thiab ncajncees! Koj ncajncees rau tej yam uas me-me, yogli ntawd, kuv yuav tsa koj ua tus saib yam uas loj. Koj ciali los thiab koom nrog kuv txoj kev zoosiab!’

24“Tus tubtxib uas tau 1 taslas txawm los hais rau tus tswv hais tias, ‘Tus Tswv, kuv paub tias koj yog ib tug neeg nruj heev; koj hlais tej qoobloo uas twb tsis yog koj cog, thiab sau tej qoobloo uas twb tsis yog koj tseb. 25Kuv ntshai, kuv thiaj coj koj taslas nyiaj mus faus av tseg. Koj saib seb, koj cov nyiaj nyob ntawm no.’

26“Tus tswv hais tias, ‘Tus niag tubtxib uas phem thiab tubnkeeg! Koj twb paub lawm puas yog, hais tias kuv hlais tej qoobloo uas tsis yog kuv cog, thiab sau tej qoobloo uas tsis yog kuv tseb? 27Yogli ntawd, twb tsimnyog koj muab kuv cov nyiaj coj mus tso rau hauv txhab nyiaj, kom thaum kuv rov los, kuv thiaj tau tagnrho kuv cov nyiaj rovqab los thiab tau paj ntxiv. 28Nej ciali muab cov nyiaj ntawm nws coj mus ntxiv rau tus uas muaj 10 taslas. 29Rauqhov txhua tus uas muaj lawm, tseem yuav muab tsub ntxiv rau nws, kom nws muaj nplua-mias; tiamsis tus uas tsis muaj dabtsi li, txawm yog yam nyuag me-me uas nws muaj xwb los tseem yuav muab rho tawm ntawm nws mus. #Math 13:12; Malak 4:25; Lukas 8:18 30Ciali muab tus tubtxib uas tsis muajnqis no pov rau sabnraud uas tsausntuj nti, nws yuav quaj qw tom hniav qees qhov ntawd.’ #Math 8:12; 22:13; Lukas 13:28 #Lukas 19:11-27

Kev Txiavtxim Thaum Kawg

31“Thaum Neeg Leejtub los li tus Vajntxwv, thiab tagnrho cov timtswv ceebtsheej nrog Nws los, Nws yuav los zaum saum Nws lub zwmtxwv uas ci ntsa-iab. #Math 16:27; Math 19:28 32Txhua haivneeg hauv qabntuj yuav los sau zog uake rau ntawm Nws xubntiag. Thaum ntawd Nws yuav muab sawvdaws cais ua ob pab, ib yam li tus tswv yug yaj muab pab yaj cais tawm ntawm pab tshis. 33Nws yuav kom cov neeg ncajncees los nyob ntawm Nws sab xis, thiab kom cov neeg uas tsis ncajncees los nyob ntawm Nws sab laug.

34“Thaum ntawd Vajntxwv yuav hais rau cov uas nyob ntawm Nws sab xis hais tias, ‘Nej cov uas Kuv Txiv tau foom koobhmoov rau lawm, nej ciali los ntawm no! Ciali los txais lub tebchaws uas twb yeej npaj rau nej txij thaum tsim ntiajteb los lawm. 35Rauqhov thaum Kuv tshaib plab, nej pub rau Kuv noj; thaum Kuv nqhis dej, nej pub rau Kuv haus; thaum Kuv tuaj ua qhua, nej txais Kuv los hauv nej tsev; 36thaum Kuv tsis muaj ristsho hnav, nej muab rau Kuv hnav; thaum Kuv muaj mob, nej pab tu Kuv; thaum Kuv raug kaw hauv tsev lojcuj, nej tuaj saib Kuv!’

37“Thaum ntawd cov neeg ncajncees yuav teb tias, ‘Tus Tswv, thaum twg peb pom Koj tshaib plab es peb muab mov rau Koj noj lossis pom Koj nqhis dej es peb muab dej rau koj haus? 38Thaum twg Koj tuaj ua qhua es peb txais Koj los hauv peb tsev lossis pom Koj tsis muaj ristsho hnav es peb muab rau Koj hnav? 39Thaum twg peb pom Koj muaj mob lossis raug kaw hauv tsev lojcuj es peb tuaj saib Koj?’ 40Vajntxwv yuav teb tias, ‘Kuv qhia tseeb rau nej hais tias, thaum nej tau ua ib yam dabtsi rau Kuv ib tug kwvtij uas tsis tseemceeb tshajplaws no, ces yog nej pab Kuv lawm ntag!’

41“Thiab Nws hais rau cov uas nyob ntawm Nws sab laug hais tias, ‘Nej cov uas raug Vajtswv foom phem, nej ciali khiav ntawm Kuv mus! Ciali mus rau hauv lub cubtawg uas cig mus ibtxhis uas npaj tseg cia rau dab ntxwgnyoog thiab nws cov tubqhe lawm! 42Thaum Kuv tshaib plab, nej tsis pub mov rau Kuv noj; thaum Kuv nqhis dej, nej tsis pub dej rau Kuv haus; 43thaum Kuv tuaj ua qhua, nej tsis txais Kuv los hauv nej tsev; thaum Kuv tsis muaj ristsho hnav, nej tsis muab rau Kuv hnav; thaum Kuv muaj mob thiab raug kaw rau hauv tsev lojcuj, nej tsis tuaj tu thiab saib Kuv.’

44“Lawv yuav teb nws hais tias, ‘Tus Tswv, thaum twg peb pom Koj tshaib plab lossis nqhis dej lossis tuaj ua qhua lossis tsis muaj ristsho hnav lossis muaj mob lossis raug kaw rau hauv tsev lojcuj, es peb tsis pab Koj?’ 45Tus Vajntxwv yuav teb lawv hais tias, ‘Kuv qhia tseeb rau nej hais tias, thaum uas nej tsis kam pab ib tug uas tsis tseemceeb tshajplaws no, ces yog nej tsis pab Kuv ntag.’ 46Thaum ntawd, cov neeg ntawd yuav raug txim mus ibtxhis li, tiamsis cov neeg ncajncees yuav tau txojsia ntev dhawv mus ibtxhis.” #Dani 12:2

Currently Selected:

Mathais 25: MWW2022

Highlight

Copy