Mathais 23

Yexus Ceebtoom Txog Cov Xibhwb Uas Qhia Kevcai Thiab Cov Falixais

(Malakaus 12:38-39; Lukas 11:43, 46; 20:45-46)

1Thaum ntawd Yexus hais rau cov neeg coob-coob thiab Nws cov thwjtim hais tias, 2“Cov xibhwb uas qhia Kevcai thiab cov Falixais yog cov uas muaj cai txhais Mauxes txoj Kevcai. 3Yogli ntawd, nej yuavtsum mloog lawv lus thiab ua txhua yam rawsli tej uas lawv qhia. Tiamsis tsis txhob ua rawsli lawv ua, rauqhov lawv tsis ua rawsli lawv qhia. 4Lawv muab tej nra hnyav los nog rau saum sawvdaws tej xubpwg, tiamsis lawv twb tsis kam cev ib tug nyuag ntivtes mus pab thiab tej nra ntawd li.

5“Lawv ua yam twg lawv xav ua kom sawvdaws pom lawv xwb. Lawv xaws tej lub hnab loj-loj ntim Vajtswv Txojlus thiab muab pav rau ntawm lawv hauvpliaj thiab ntawm lawv tej cajnpab; thiab xaws tej ntxhoo ntev-ntev rau ntawm lawv tej qab tw tsho!#23:5: ntxhoo ntev-ntev rau ntawm lawv tej qab tw tsho: Hnav tej tsho li no yog ua lub cim qhia hais tias nws muab siab npuab Vajtswv npaum licas (saib Teev 15:37-41). #Math 6:1; 2Kev 6:8; Teev 15:38 6Thaum muaj rooj noj rooj haus, lawv nyiam mus zaum ntawm tej chaw samxeeb xwb; thiab thaum lawv mus rau hauv tej tsev sablaj, lawv nyiam mus zaum tej rooj uas tseemceeb xwb. 7Lawv nyiam kom sawvdaws hawm lawv tom tej kiab thiab hu lawv hais tias, ‘Xibhwb.’

8“Tiamsis nej tsis txhob cia leejtwg hu nej hais tias ‘Xibhwb,’ rauqhov nej sawvdaws puavleej sibtxig sibluag thiab nej tsuas muaj tibtug Xibhwb xwb. 9Thiab nej tsis txhob hu cov neeg uas nyob hauv ntiajteb no ib tug twg hais tias, ‘Txiv,’ rauqhov nej tsuas muaj tibleeg Txiv uas nyob saum ntuj ceebtsheej xwb. 10Thiab tsis txhob cia leejtwg hu nej hais tias, ‘Tus Tswv,’ rauqhov nej tsuas muaj tibtug Tswv uas yog tus Mexiyas xwb. 11Tus uas tseemceeb tshajplaws nyob rau hauv nej, tus ntawd yog nej tus tubtxib. #Math 20:26-27; Malak 9:35; 10:43-44; Lukas 22:26 12Tus uas tsa nws lub hwjchim, yuav raug muab txo kom qis, thiab tus uas txo nws lub hwjchim, yuav raug muab tsa kom siab. #Lukas 14:11; 18:14

Yexus Rautxim Rau Cov Neeg Ntsejmuag Ncaj Siabnkhaus

(Malakaus 12:40; Lukas 11:39-42, 44, 52; 20:47)

13“Cov xibhwb uas qhia Kevcai thiab cov Falixais uas ntsejmuag ncaj siabnkhaus, nej yuav raug kev puastsuaj lau! Nej kaw Vajtswv lub Ntuj Ceebtsheej li qhovrooj tsis pub leejtwg mus, txawm yog nej kiag los nej twb tsis mus rau hauv, thiab nej tseem txwv cov uas xav mus kom mus tsis tau rau hauv thiab. 14#23:14: Tej phau ntawv qub uas xuas tes sau ntxiv nqe 14 no ntxiv rau: Cov xibhwb uas qhia Kevcai thiab cov Falixais uas ntsejmuag ncaj siabnkhaus, nej yuav raug kev puastsuaj lau! Nej saib tsis taus cov pojntsuam thiab txhav lawv tej vajtse los ua nej tus, thiab uatxuj thov Vajtswv ntev-ntev kom sawvdaws qhuas nej! Vimli ntawd nej yuav raug txim hnyav tshajplaws! (saib Malak 12:40).

15“Cov xibhwb uas qhia Kevcai thiab cov Falixais uas ntsejmuag ncaj siabnkhaus, nej yuav raug kev puastsuaj lau! Nej mus nruabnqhuab nruabdeg thoob tebchaws, mus coj kom tau ib tug los coj nej txoj kevcai; tiamsis thaum nej nrhiav tau los lawm, nej ua rau nws hajyam ntxim poob rau hauv ntujtawg tshaj nej ob npaug!

16“Cov neeg digmuag uas coj kev, nej yuav raug kev puastsuaj lau! Nej qhia hais tias, ‘Yog leejtwg tuav txog lub Tuamtsev coglus, txawm nws tsis ua rawsli nws tej lus cogtseg ntawd los tau; tiamsis yog nws tuav txog tej nyiaj kub uas nyob hauv lub Tuamtsev coglus, nws yuavtsum tau ua rawsli nws coglus tseg lawm.’ 17Cov neeg digmuag uas ruam! Yam twg tseemceeb dua, tej kub lossis lub Tuamtsev uas ua rau tej kub ntawd muajnqis? 18Thiab nej tseem qhia hais tias, ‘Yog leejtwg tuav txog tej thaj fij khoom coglus, txawm nws tsis ua rawsli nws tej lus cogtseg ntawd los tau. Tiamsis yog nws tuav txog tej khoom fij uas nyob saum lub thaj coglus, nws yuavtsum tau ua rawsli nws coglus tseg lawm.’ 19Uacas nej yuav digmuag ualuaj! Yam twg tseemceeb dua? Tej khoom fij uas nyob saum lub thaj, lossis lub thaj uas ua rau tej khoom ntawd muajnqis? 20Yogli ntawd, thaum leejtwg tuav txog lub thaj coglus, yog nws tuav txog lub thaj thiab cov khoom fij uas nyob saum lub thaj huv tibsi; 21thiab thaum leejtwg tuav txog lub Tuamtsev coglus, ces kuj yog nws tuav txog lub Tuamtsev thiab tus Vajtswv uas nyob hauv lub Tuamtsev ntawd huv tibsi; 22thiab thaum leejtwg tuav txog lub ntuj coglus, ces yog nws tuav txog Vajtswv lub zwmtxwv thiab tus uas nyob saum lub zwmtxwv ntawd huv tibsi. #Yaxaya 66:1; Math 5:34

23“Cov xibhwb uas qhia Kevcai thiab cov Falixais uas ntsejmuag ncaj siabnkhaus, nej yuav raug kev puastsuaj lau! Nej muab ib feem kaum ntawm nej tej txujlom, xwsli pumhub, zaubtxhwb thiab xyabtxob rau Vajtswv, tiamsis nej tsis ua rawsli tej lus tseemceeb uas txoj Kevcai qhia, xwsli kev coj ncaj, kev tabncuab, thiab kev ncajncees. Tej no yog tej uas tsimnyog nej yuavtsum tau ua, tiamsis ho tsis txhob muab lwm nqe tsotseg thiab. #Levi 27:30 24Cov neeg digmuag uas coj kev! Nej lim tus yoov me-me tawm hauv cov dej uas nej yuav haus, tiamsis nej ho nqos tej tus ntxhuav!

25“Cov xibhwb uas qhia Kevcai thiab cov Falixais uas ntsejmuag ncaj siabnkhaus, nej yuav raug kev puastsuaj lau! Nej ntxuav nej lub khob thiab lub phaj sabnraud xwb, tiamsis sabhauv mas nej puvnkaus tej kev uanruj uatsiv thiab siabhlob. 26Cov Falixais uas digmuag! Yog nej xub ntxuav sabhauv tej khob thiab tej phaj uantej lawm, ces sabnraud yeej yuav huv thiab!

27“Cov xibhwb uas qhia Kevcai thiab cov Falixais uas ntsejmuag ncaj siabnkhaus, nej yuav raug kev puastsuaj lau! Nej zoo ib yam li tej ntxa uas muab hmoovsib pleev rau sabnraud dawbpaug ua rau zoonkauj heev, tiamsis sabhauv mas puvnkaus pobtxha neeg tuag thiab txhua yam uas lwj ntsuav xwb. #Teshl 23:3 28Ib yam nkaus li ntawd, sabnraud mas sawvdaws xav tias nej yog neeg zoo, tiamsis sabhauv mas nej puvnkaus txoj kev ua neeg ntsejmuag ncaj siabnkhaus thiab kev txhaum.

Yexus Qhia Txog Tej Uas Lawv Yuav Raug Txim

(Lukas 11:47-51)

29“Cov xibhwb uas qhia Kevcai thiab cov Falixais uas ntsejmuag ncaj siabnkhaus, nej yuav raug kev puastsuaj lau! Nej txhim cov xibhwb cev Vajtswv lus tej ntxa kom zoonkauj, thiab ua tej pejthuam zoo-zoo rau cov neeg ncajncees thaum ub. 30Thiab nej hais tias, ‘Yog peb nyob tiam uas peb cov yawgkoob nyob, mas peb yuav tsis koomtes nrog lawv tua cov xibhwb cev Vajtswv lus.’ 31Nej hais li ntawd, yog nej lees hais tias nej yog cov uas tua cov xibhwb cev Vajtswv lus ntawd li cajces ntag! 32Yeejmeem ua tej uas nej cov yawgkoob tau chiv ua lawm kom tiav!

33“Cov niag nab thiab cov niag noob nab siabphem! Nej xav tias nej yuav tsis raug txiavtxim thiab yuav tsis poob mus rau hauv ntujtawg no lov? #Math 3:7; 12:34; Lukas 3:7 34Vimli no Kuv qhia tseeb rau nej hais tias, Kuv yuav txib cov xibhwb cev Vajtswv lus, thiab cov neeg txawjntse, thiab ib cov xibhwb tuaj qhia nej; nej yuav muab lawv qeeleej tua, muab qeeleej ntsia rau saum ntoo khaublig, muab qeeleej nplawm hauv tej tsev sablaj thiab ntiab lawv khiav ib lub nroog mus rau ib lub nroog. 35Vimli ntawd, txhua tus neeg uas ncajncees cov ntshav yuav poob los raug nej, suav txij thaum Anpees tus uas ncajncees cov ntshav los txog rau thaum Npelekhiyas tus tub Xekhaliyas cov ntshav uas nej muab tua ntawm nruabnrab lub Tuamtsev thiab lub thaj. #Chiv 4:8; 2Xwm 24:20-21 36Kuv qhia tseeb rau nej hais tias, txhua tus uas tau tua neeg no lub txim yuav poob los raug rau cov neeg tiam no!”

Yexus Txoj Kev Hlub Rau Cov Neeg Hauv Yeluxalees

(Lukas 13:34-35)

37“Yeluxalees, Yeluxalees! Koj muab cov xibhwb cev Vajtswv lus tua thiab muab pobzeb ntaus cov tubtxib uas Vajtswv txib los qhia koj! Muaj ntau zaus Kuv twb yuav muab koj cov menyuam los puag ib yam li tus pojqaib cuab nws cov menyuam los puag rau hauvqab nws ob phab tis, tiamsis koj ho tsis kam Kuv ua li ntawd! 38Saib maj, koj lub Tuamtsev yuav raug muab tsotseg thiab nyob nqha lug cia. #Yelemi 22:5 39Kuv qhia rau koj hais tias, koj yuav tsis pom Kuv ntxiv mus txog hnub uas koj hais tias, ‘Thov Vajtswv foom koobhmoov rau tus uas los hauv Vajtswv lub npe los.’ ” #Nnkauj 118:26

Currently Selected:

Mathais 23: MWW2022

Highlight

Copy