Mathais 22
22
Zaj Lus Pivtxwv Hais Txog Rooj Tshoob
(Lukas 14:15-24)
1Yexus rov hais dua ib zaj lus pivtxwv rau sawvdaws mloog hais tias, 2“Vajtswv lub Ntuj Ceebtsheej piv ib yam li ib tug vajntxwv uas npaj ib rooj tshoob rau nws tus tub. 3Vajntxwv tau txib nws cov tubtxib mus hu cov qhua uas nws twb caw lawm kom tuaj nrog nws noj tshoob, tiamsis lawv tsis kam tuaj li.
4“Nws thiaj txib dua lwmpab tubtxib mus hais rau cov uas raug caw lawm hais tias, ‘Kuv rooj tshoob twb npaj txhij lawm. Kuv tej sam nyuj thiab kuv tej menyuam nyuj rog-rog, kuv twb tua thiab ua siav tag lawm, nej ciali tuaj noj.’ 5Tiamsis cov uas raug caw ntawd tsis quavntsej li, nyias mus ua nyias haujlwm tag lawm: tus mus ua teb los muaj, tus mus ua luam los muaj, 6dua li tseem muaj cov uas muab cov tubtxib ntawd ntes, muab lawv ntaus thiab muab lawv tua.
7“Vajntxwv chim heev; nws txawm txhij nws cov tubrog kom mus muab cov neeg uas tua neeg ntawd, tua thiab muab lawv lub nroog hlawv povtseg. 8Ces vajntxwv thiaj hu nws cov tubtxib los thiab hais rau lawv tias, ‘Kuv rooj tshoob twb npaj txhij lawm, tiamsis cov neeg uas kuv caw ntawd, lawv tsis tsimnyog tuaj noj. 9Zaumno nej ciali mus rau tom tej kev loj uas sib tshuam, nej ntsib leejtwg los hu kom lawv ciali tuaj noj kuv rooj tshoob no.’ 10Ces cov tubtxib txawm tawm mus rau tom tej kev thiab coj txhua tus uas lawv ntsib, tsis hais tus zoo tus phem huv tibsi los; ua rau chav tsev uas noj tshoob ntawd puvnkaus.
11“Thaum vajntxwv los saib cov qhua uas tuaj ntawd, nws pom ib tug txivneej uas tsis hnav tsoostsho noj tshoob. 12Vajntxwv nug hais tias, ‘Phoojywg, koj twb tsis hnav cev ristsho noj tshoob, uacas koj ho tuaj tau rau hauv no?’ Tus txivneej ntawd yeej teb tsis taus ib los li. 13Vajntxwv txawm hais rau cov tubtxib hais tias, ‘Nej ciali muab nws pav tes pav taw thiab muab pov rau sabnraud uas tsausntuj nti. Nws yuav quaj qw tom hniav qees nyob rau qhov ntawd.’ ” #Math 8:12; 25:30; Lukas 13:28
14Yexus xaus lus hais tias, “Cov uas raug caw mas muaj coob, tiamsis cov uas raug xaiv muaj tsawg.”
Nug Txog Kev Them Se
(Malakaus 12:13-17; Lukas 20:20-26)
15Cov Falixais txawm tawm mus sablaj thiab tuav tswvyim seb puas ntes tau Yexus haislus yuamkev. 16Lawv txib lawv cov thwjtim qeeleej thiab Helauj cov qeeleej tuaj cuag Yexus. Lawv nug hais tias, “Xibhwb, peb paub tias Koj yog ib tug neeg ncaj, Koj tsuas qhia qhov tseeb txog Vajtswv txojkev rau neeg xwb, Koj tsis xaiv leejtwg ntsejmuag thiab tsis tuaj leejtwg tog. 17Koj qhia rau peb seb Koj xav licas? Yog peb them se rau Xixas puas txhaum peb txoj Kevcai los tsis txhaum?”
18Tiamsis Yexus twb paub txog lawv tej tswvyim phem ntawd lawm, Nws thiaj hais rau lawv tias, “Cov niag neeg ntsejmuag ncaj siabnkhaus! Nej tuaj sim Kuv ua dabtsi? 19Muab lub nyiaj uas yuav coj mus them se ntawd los rau Kuv saib seb!”
Lawv txawm muab ib lub nyiaj los rau Nws, 20ces Nws thiaj nug lawv hais tias, “Lub ntsejmuag thiab lub npe hauv lub nyiaj no yog leejtwg lub?”
21Lawv teb tias, “Yog Xixas lub.”
Yexus thiaj hais rau lawv tias, “Yam uas yog Xixas li, ciali muab rau Xixas thiab yam uas yog Vajtswv li, ciali muab rau Vajtswv.”
22Thaum lawv hnov li ntawd, lawv xav tsis thoob li; ces lawv txawm tso Yexus tseg thiab khiav lawm.
Nug Txog Kev Sawv Hauv Qhovtuag Rovqab Los
(Malakaus 12:18-27; Lukas 20:27-40)
23Tibhnub ntawd muaj qeeleej Xadukais tuaj cuag Yexus. Lawv yog cov uas qhia hais tias neeg yeej sawv tsis tau hauv qhovtuag rovqab los. #Teshl 23:8 24Lawv nug Yexus hais tias, “Xibhwb, Mauxes hais tias yog ib tug txivneej twg tuag thaum nws tus pojniam tseem tsis tau muaj menyuam, nws tus kwv yuavtsum yuav tus niamtij thiab muaj tubki rau tus tijlaug. #2Kev 25:5 25Zaumno, nyob hauv peb no muaj xya leej kwvtij. Tus tijlaug hlob yuav pojniam tiamsis tseem tsis tau muaj menyuam ces nws txawm tuag lawm, thiaj tso tus pojniam rau tus kwv yuav. 26Thaum tseem tsis tau muaj menyuam ces tus kwv thib ob txawm tuag lawm thiab. Tus kwv thib peb mus txog tus kwv thib xya los kuj ua tibyam nkaus li ntawd. 27Thaum kawg tus pojniam ntawd kuj tuag lawm thiab. 28Yogli ntawd, thaum txog hnub uas cov neeg tuag sawv rovqab los, tus pojniam ntawd yuav yog leejtwg tus pojniam? Rauqhov lawv xya leej puavleej tau yuav nws huv tibsi lawm.”
29Yexus teb tias, “Nej yuamkev lawm, rauqhov nej tsis paub Vajtswv tej Lus lossis Vajtswv lub hwjchim. 30Thaum cov neeg uas tuag lawm sawv rovqab los, lawv yuav zoo ib yam li cov timtswv uas nyob saum ntuj ceebtsheej, lawv yuav tsis sibyuav lawm. 31Hais txog qhov uas cov neeg tuag sawv rovqab los, nej tsis tau nyeem zaj uas Vajtswv hais rau nej lov? Nws tau hais tias, 32‘Kuv yog Anplahas tus Vajtswv, yog Ixaj tus Vajtswv, thiab yog Yakhauj tus Vajtswv.’ Vajtswv tsis yog cov neeg tuag tus Vajtswv, tiamsis yog cov neeg ciaj tus Vajtswv.” #Khiav 3:6
33Thaum cov neeg coob-coob hnov tej uas Yexus qhia ntawd, lawv xav tsis thoob li.
Nqe Kevcai Uas Tseemceeb Heev
(Malakaus 12:28-34; Lukas 10:25-28)
34Thaum cov Falixais hnov tias cov Xadukais teb tsis taus Yexus ib los li, lawv txawm tuaj sibsau uake. 35Muaj ib tug xibhwb qhia Kevcai uas nyob hauv lawv pab ntawd, txawm thom Yexus hais tias, 36“Xibhwb, hauv Vajtswv cov Kevcai nqe twg yog nqe uas tseemceeb dua ntais huv tibsi?”
37Yexus teb tias, “ ‘Koj yuavtsum hlub tus Tswv uas yog koj tus Vajtswv, kom kawg siab kawg ntsws, kawg plab kawg plawv, thiab kawg lajlim tswvyim.’ #2Kev 6:5 38Nqe kevcai no yog thawj nqe uas tseemceeb dua ntais. 39Nqe thib ob yog hais li no: ‘Koj yuavtsum hlub koj tus kwvtij zejzog ib yam li koj hlub koj tuskheej.’ #Levi 19:18 40Mauxes txoj Kevcai thiab cov xibhwb cev Vajtswv lus tej lus qhia puavleej nyob tagnrho rau hauv ob nqe no.” #Lukas 10:25-28
Nug Txog Tus Mexiyas
(Malakaus 12:35-37; Lukas 20:41-44)
41Thaum cov Falixais tseem tuaj sibsau uake ntawd, Yexus nug lawv hais tias, 42“Nej xav licas txog tus Mexiyas? Nws yog leejtwg li cajces?”
Lawv teb tias, “Nws yog Daviv li cajces.”
43Yexus rov nug lawv hais tias, “Uacas Vaj Ntsujplig thiaj tshoov Daviv siab, kom Daviv hu nws hais tias, ‘Tus Tswv’? Daviv tau hais tias,
44“ ‘Tus Tswv hais rau kuv tus Tswv tias:
Los zaum ntawm Kuv sab xis
mus txog thaum Kuv muab Koj cov yeebncuab los tso hauv Koj qab xibtaws.’ #Nnkauj 110:1
45Yog thaum ntawd Daviv twb hu Nws hais tias, ‘Tus Tswv,’ yuav ua licas hais tau tias tus Mexiyas yog Daviv li cajces?”
46Tsis muaj leejtwg teb taus Yexus ib los li. Txij hnub ntawd los, tsis muaj leejtwg muaj cuabkav nug Nws ntxiv li lawm.
Currently Selected:
Mathais 22: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
