Mathais 21

Yexus Mus Hauv Yeluxalees Yam Muajyeej

(Malakaus 11:1-11; Lukas 19:28-40; Yauhas 12:12-19)

1Thaum Yexus thiab Nws cov thwjtim mus yuav txog lub nroog Yeluxalees, lawv mus txog lub zos Npefakhes uas nyob ntawm lub Roob Txiv Ntoo-Roj. Yexus txawm txib ob tug thwjtim uantej mus 2thiab qhia nkawd hais tias, “Neb mus rau hauv lub zos uas nyob tom neb hauvntej. Thaum neb mus txog hauv lawm, neb yuav pom ob niamtub neesluav khi rau ntawd. Neb muab daws thiab cab los rau Kuv. 3Yog muaj leejtwg hais dabtsi rau neb, ces neb teb tias, ‘Tus Tswv#21:3: Tus Tswv; lossis ob tug neesluav ntawd tus tswv. xav siv’; ces nws yuav cia neb cab ob niamtub nees los tamsim ntawd.”

4Muaj li no kom tiav rawsli tus xibhwb cev Vajtswv lus tau hais tseg lawm hais tias,

5“Ciali qhia rau cov neeg uas nyob hauv lub nroog Xi-oos hais tias,

Saib maj, nej tus vajntxwv tabtom los cuag nej!

Nws txo hwjchim thiab caij ib tug nees,

uas yog ib tug menyuam nees los.” #Xekhali 9:9

6Ob tug thwjtim txawm mus thiab ua rawsli Yexus tau qhia rau nkawd. 7Nkawd thiaj cab tau ob niamtub nees los, nkawd hle nkawd ob lub tsho ntev los pua tus menyuam nees nrobqaum rau Yexus caij. 8Cov neeg coob-coob uas nrog Yexus mus ntawd muaj ibtxhia hle lawv tej tsho los pua hauv txojkev, thiab ibtxhia txiav nplooj ntoos los pua hauv txojkev. 9Cov neeg coob-coob uas mus ua Yexus ntej thiab cov uas lawv Yexus qab qw nrov-nrov hais tias, “Hauxanas rau Daviv tus Tub! Thov Vajtswv foom koobhmoov rau tus uas los hauv Vajtswv lub npe los! Ciali qhuas Vajtswv!” #Nnkauj 118:25-26

10Thaum Yexus mus txog hauv lub nroog Yeluxalees lawm, cov neeg uas nyob hauv lub nroog ntawd ras zomzaws thiab sibnug hais tias, “Tus no yog leejtwg?”

11Cov neeg coob-coob ntawd teb tias, “Tus no yog Yexus, tus xibhwb cev Vajtswv lus uas tuaj pem lub nroog Naxalev hauv xeev Kalilais tuaj.”

Yexus Mus Rau Ntawm Lub Tuamtsev

(Malakaus 11:15-19; Lukas 19:45-48; Yauhas 2:13-22)

12Yexus mus rau hauv lub Tuamtsev thiab ntiab cov neeg uas tuaj yuav khoom thiab muag khoom kom ciali tawm mus. Nws muab cov neeg pauv nyiaj tej rooj thiab cov neeg muag nquab tej rooj zaum ntxeev huv tibsi. 13Nws hais rau lawv tias, “Vajtswv tej Lus sau cia hais tias, ‘Kuv lub Tuamtsev yog lub tsev thov Vajtswv.’ Tiamsis nej muab ua qhov chaw rau tubsab nkaum!” #Yaxaya 56:7; Yelemi 7:11

14Muaj neeg digmuag thiab cegtawv tuaj cuag Yexus hauv lub Tuamtsev, mas Yexus kho lawv txhua tus zoo huv tibsi. 15Cov thawj povthawj hlob thiab cov xibhwb uas qhia Kevcai chim heev thaum lawv pom tej txujci tseemceeb uas Yexus ua ntawd, thiab hnov cov menyuam yaus uas nyob hauv lub Tuamtsev qw hais tias, “Hauxanas rau Daviv tus Tub!” 16Lawv nug Yexus hais tias, “Koj puas hnov tej lus uas cov menyuam ntawd hais?”

Yexus teb tias, “Kuv hnov. Nej tsis tau nyeem dua Vajtswv Txojlus uas hais tias, ‘Vajtswv twb cobqhia cov menyuam yaus thiab cov menyuam mos kom paub qhuas Vajtswv rau qhov uas tsimnyog kawg nkaus’ lov?” #Nnkauj 8:2 (LXX)

17Ces Yexus txawm ncaim lawv thiab tawm hauv lub nroog mus pw tom lub zos Npethanis lawm.

Yexus Foom Tsob Txiv Ncuavpias

(Malakaus 11:12-14, 20-24)

18Hnub tomqab thaum sawvntxov, Yexus taug kev rov mus rau tom lub nroog, Nws tshaib plab. 19Nws pom ib tsob txiv ncuavpias nyob ntawm ntug kev ces Nws txawm mus saib, tiamsis tsis pom muaj txiv li, tsuas muaj nplooj xwb. Yexus txawm hais rau tsob ntoo tias, “Txij no mus koj yuav tsis txitxiv ib zaug li lawm!” Tamsim ntawd tsob txiv ncuavpias txawm ciali qhuav kiag lawm.

20Thaum cov thwjtim pom li ntawd lawv xav tsis thoob li, lawv hais tias, “Uacas tsob txiv ncuavpias no yuav qhuav sai ualuaj li?”

21Yexus teb tias, “Kuv qhia tseeb rau nej hais tias, yog nej ntseeg tiag-tiag thiab tsis ua xyemxyav, nej yeej muaj peevxwm ua tau ib yam li Kuv ua rau tsob txiv ncuavpias no. Tsis tag li ntawd xwb, nej tseem yuav muaj peevxwm hais rau lub roob no hais tias, ‘Ciali txav mus rau hauv dej hiavtxwv,’ los lub roob yeej yuav ua rawsli nej hais. #Math 17:20; 1Klt 13:2 22Yog nej ntseeg tiag, nej thov yam twg, nej yuav tau yam ntawd.”

Leejtwg Tsocai Rau Yexus

(Malakaus 11:27-33; Lukas 20:1-8)

23Yexus rov mus rau hauv lub Tuamtsev; thaum Nws tabtom qhia, cov thawj povthawj hlob thiab cov txwjlaug txawm tuaj cuag Nws thiab nug Nws hais tias, “Koj tau cai qhovtwg los ua tej no? Leejtwg tsocai rau koj?”

24Yexus teb lawv hais tias, “Kuv yuav nug nej ib los, yog nej teb tau, Kuv mamli qhia rau nej hais tias leejtwg tsocai rau Kuv ua tej no. 25Leejtwg tsocai rau Yauhas muab neeg ua kevcai rausdej, Vajtswv lossis neeg?”

Lawv txawm sibtham hais tias, “Peb yuav teb licas? Yog peb teb tias, ‘Vajtswv tsocai rau Yauhas ua,’ Nws yuav hais rau peb tias, ‘Ua licas nej ho tsis ntseeg Yauhas?’ 26Tiamsis yog peb ho teb tias, ‘Neeg tsocai rau Yauhas ua,’ peb ntshai tsam cov pejxeem ho ua phem rau peb, rauqhov sawvdaws yeej paub tias Yauhas yog ib tug xibhwb cev Vajtswv lus.” 27Yogli ntawd, lawv thiaj teb Yexus hais tias, “Peb tsis paub.”

Yexus thiaj hais rau lawv tias, “Yogli ntawd, Kuv los yuav tsis qhia rau nej hais tias yog leejtwg tsocai rau Kuv ua tej no thiab.”

Zaj Lus Pivtxwv Hais Txog Ob Tug Tub

28“Nej xav licas? Muaj ib tug yawg muaj ob tug tub. Nws mus hais rau tus tub hlob tias, ‘Tub, hnubno koj mus tu lub vaj txivhmab.’ 29Tus tub hlob teb tias, ‘Kuv tsis mus,’ tiamsis tomqab ntawd nws txawm hloov siab thiab mus lawm. 30Leejtxiv kuj mus hais rau tus tub yau ib yam li ntawd thiab. Tus tub yau teb tias, ‘Txiv, kuv mamli mus,’ tiamsis nws ho tsis mus. 31Ob tug tub no, tus twg yog tus uas ua rawsli leejtxiv lub siab nyiam?”

Lawv teb tias, “Yog tus tub hlob.”

Yexus hais rau lawv tias, “Kuv qhia tseeb rau nej hais tias, cov neeg sau se thiab cov niamntiav yuav xub ua nej ntej mus rau hauv Vajtswv lub Tebchaws. 32Rauqhov Yauhas tus uas muab neeg ua kevcai rausdej twb los qhia txoj kev ncajncees rau nej, tiamsis nej tsis kam ntseeg nws, tsuas yog cov neeg sau se thiab cov niamntiav thiaj ntseeg xwb. Txawm yog nej twb pom li ntawd los nej yeej tsis kam tso nej tej kev txhaum tseg thiab los ntseeg nws tej lus.” #Lukas 3:12; 7:29-30

Zaj Lus Pivtxwv Hais Txog Cov Neeg Uas Tu Lub Vaj Txivhmab

(Malakaus 12:1-12; Lukas 20:9-19)

33Yexus hais tias, “Nej rov mloog dua ib zaj lus pivtxwv. Muaj ib tug tswv vaj, nws cog ib cov txivhmab thiab xov vaj puagncig rau, nws khawb ib lub qhov tsuam txivhmab thiab ua ib lub chaw tsomfaj zov. Nws muab cov txivhmab ntawd xauj rau ib co neeg tu, ces nws txawm mus rau lwm tebchaws lawm. #Yaxaya 5:1-2 34Thaum txog lub caij de txivhmab, nws txawm txib nws cov tubqhe mus sau tej txivhmab uas yog nws feem los rau nws.

35“Cov neeg uas tu lub vaj txawm muab tus tswv cov tubqhe ntawd ntes, muab ib tug ntaus, muab ib tug tua, thiab muab pobzeb ntaus ib tug. 36Tus tswv rov txib dua ib cov tubqhe uas coob dua thawjzaug mus, tiamsis cov neeg uas tu lub vaj kuj ua phem rau lawv ib yam nkaus li ntawd thiab. 37Thaum kawg tus tswv vaj thiaj txib kiag nws tus tub mus cuag lawv. Nws xav tias, ‘Uacas los lawv yeej yuav hwm kuv tus tub xwb.’

38“Tiamsis thaum cov neeg uas tu lub vaj pom tus tub ntawd, lawv txawm sibtham hais tias, ‘Tus no ntag lau, yog tus tswv vaj tus tub. Peb ciali muab nws tua povtseg, peb thiajli tau nws tej teejtug!’ 39Lawv txawm ntes kiag nws, muab nws thawb rau sab ntug vaj nraud thiab muab nws tua lawm.”

40Yexus nug hais tias, “Thaum tus tswv vaj rovqab los, nws yuav ua licas rau cov neeg uas tu lub vaj ntawd?”

41Lawv teb tias, “Nws yuav muab cov neeg siabphem ntawd tua kom tuag, thiab muab lub vaj txivhmab ntawd xauj rau lwm cov tu. Thaum txog lub caij faib txivhmab, lawv yuav faib cov uas yog nws feem rau nws.”

42Yexus hais rau lawv tias, “Nej tsis tau nyeem Vajtswv tej Lus seb hais licas lov?

“ ‘Lub pobzeb uas cov neeg ua tsev muab povtseg lawm,

lub ntawd twb dhau los ua lub uas tseemceeb dua ntais lawm.

Qhov no yog tus Tswv ua;

yog yam zoo kawg nkaus rau peb pom!’ ” #Nnkauj 118:22-23

43Yexus hais ntxiv tias, “Kuv qhia rau nej hais tias Vajtswv yuav muab Nws lub Tebchaws tshem tawm ntawm nej mus rau ib haivneeg uas yuav txitxiv zoo.” 44#21:44: Tej phau ntawv qub uas xuas tes sau ntxiv nqe 44 no ntxiv rau: Yog leejtwg ntog tsoo lub pobzeb ntawd, tus ntawd yuav tawg tag, thiab yog lub pobzeb ntawd poob los raug leejtwg, tus ntawd yuav ntsoog tag huv tibsi (saib Lukas 20:18).

45Thaum cov thawj povthawj hlob thiab cov Falixais hnov tej lus pivtxwv uas Yexus qhia ntawd, lawv paub tias yog Yexus hais txog lawv, 46yogli ntawd, lawv thiaj npajsiab yuav ntes Yexus, tiamsis lawv kuj ntshai cov neeg coob-coob ntawd, rauqhov sawvdaws yeej paub tias Yexus yog ib tug xibhwb cev Vajtswv lus.

Currently Selected:

Mathais 21: MWW2022

Highlight

Copy