Mathais 20

Cov Tubzog Hauv Lub Vaj Txivhmab

1“Vajtswv lub Ntuj Ceebtsheej piv ib yam li ib tug tswv vaj uas sawvntxov mus ntiav neeg tuaj tu nws lub vaj txivhmab. 2Nws nrog lawv hais haum hais tias ib hnub nws yuav them li ibtxwm them uas yog ib lub txiaj denalis, ces nws txawm kom cov tubzog ntawd mus tu nws lub vaj lawm.

3“Thaum cuaj teev, nws rov mus tom kiab, nws pom ib cov neeg sawv ncig nquj nquas tsis muaj haujlwm ua. 4Nws txawm hais rau lawv tias, ‘Nej kuj mus tu kuv lub vaj txivhmab thiab, kuv yuav muab nqizog kom ncajncees rau nej.’ 5Ces lawv txawm mus rawsli nws hais. Thaum kaum-ob teev thiab thaum peb teev, nws kuj rov mus ua ib yam nkaus li ntawd thiab.

6“Thaum yuavluag txog tsib teev, nws rov mus rau tom kiab thiab pom ib cov neeg tseem sawv ncig nquj nquas tod. Nws txawm hais rau lawv tias, ‘Uacas nej tuaj nyob dawb ib hnub ntawm no tsis ua dabtsi li?’ Lawv teb tias, 7‘Twb tsis muaj leejtwg ntiav peb li ne.’ Nws thiaj hais rau lawv tias, ‘Yogli ces nej ciali mus tu kuv lub vaj txivhmab thiab.’

8“Thaum tsausntuj, tus tswv vaj hais rau tus uas saib cov tubzog tias, ‘Koj mus hu cov tubzog los thiab them nqizog rau lawv. Koj pib muab rau cov uas raug ntiav tuaj ua haujlwm tomqab zujzus mus txog rau cov uas xub tuaj uantej.’ #Levi 19:13; 2Kev 24:15 9Cov tubzog uas tuaj pib ua haujlwm thaum tsib teev, lawv ib leeg tau ib lub txiaj. 10Yogli ntawd, cov uas xub tuaj thiaj xav tias lawv yuav tau ntau dua cov uas tuaj tomqab; tiamsis lawv ib leeg tsuas tau ib lub txiaj denalis thiab xwb. 11Thaum lawv tau txais nyiaj tag lawm, lawv txawm yws rau tus tswv vaj hais tias, 12‘Cov tubzog uas tuaj ua haujlwm thaum yuav tsausntuj ntawd, lawv nyuamqhuav ua tau ib txoosteev xwb; peb tiv tshav ua haujlwm ib hnub tsausntuj tiamsis koj tsuas muab rau peb npaum li koj muab rau lawv thiab xwb!’

13“Tus tswv vaj teb rau lawv cov ntawd ib tug hais tias, ‘Phoojywg, tsis yog kuv ua tsis ncaj rau koj. Puas yog koj yeej zoosiab uas yuav ua haujlwm ib hnub ib lub txiaj no maj? 14Ciali nqa koj lub nyiaj thiab mus tsev. Kuv yeej txiavtxim siab hais tias kuv yuav muab rau tus uas tuaj tomqab npaum li uas kuv muab rau koj thiab. 15Kuv txawm yuav tsis muaj cai muab kuv tej nyiaj siv rawsli kuv pomzoo lov? Lossis koj pom tias kuv siabdawb, ces koj txawm khib puas yog?’ ”

16Yexus xaus lus hais tias, “Cov uas nimno nyob tom hauvntej yuav tau mus nyob tom tw, thiab cov uas nimno nyob tom tw, yuav tau mus nyob tom hauvntej.” #Math 19:30; Malak 10:31; Lukas 13:30

Zaum Thib Peb Uas Yexus Hais Txog Nws Kev Tuag

(Malakaus 10:32-34; Lukas 18:31-34)

17Thaum Yexus mus rau saum lub nroog Yeluxalees, Nws coj Nws kaum-ob tug thwjtim nrog Nws mus. Thaum lawv taug kev mus, Nws hais twjywm rau lawv tias, 18“Nej ua tibzoo mloog nawb, peb yuav mus rau saum lub nroog Yeluxalees. Yuav muaj neeg ntes Neeg Leejtub coj mus cob rau cov thawj povthawj hlob thiab cov xibhwb uas qhia Kevcai. Lawv yuav txiavtxim tuag rau Nws, 19thiab muab Nws cob rau Lwm Haivneeg, lawv yuav ua saib tsis taus Nws, muab Nws nplawm, thiab muab Nws ntsia rau saum ntoo khaublig, tiamsis hnub thib peb Nws yuav ciajsia sawv rov los.”

Ib Leejniam Tej Lus Thov

(Malakaus 10:35-45)

20Tomqab ntawd Xenpedais tus pojniam txawm coj nws ob tug tub tuaj cuag Yexus. Nws txhoscaug ntua ntawm Yexus kotaw thiab thov ib yam tshwjxeeb ntawm Nws.

21Yexus nug nws hais tias, “Koj xav tau dabtsi?”

Nws teb tias, “Thov Koj coglus rau kuv hais tias, thaum Koj los ua vajntxwv, Koj yuav pub kuv ob tug tub no ib tug zaum ntawm Koj sab xis thiab ib tug zaum ntawm Koj sab laug.”

22Yexus teb rau ob tug tub ntawd hais tias, “Neb tsis paub txog yam uas neb tabtom thov no. Neb puas haus taus lub khob iab khob daw uas Kuv yuav haus?”

Nkawd teb tias, “Wb haus taus.”

23Yexus hais rau nkawd tias, “Lub khob uas Kuv haus, neb yeej yuav haus taus, tiamsis qhov uas leejtwg yuav zaum ntawm Kuv sab xis thiab sab laug ntawd, Kuv tsis muaj cai uas yuav muab rau neb. Kuv Txiv yog tus muab cov chaw no rau cov uas Nws twb npaj tseg rau lawm.”

24Thaum kaum tug thwjtim hnov li ntawd, lawv chim heev rau nkawd. 25Yexus thiaj hu cov thwjtim txhua tus los uake thiab hais rau lawv tias, “Nej twb paub tias tej nomtswv uas saib Lwm Haivneeg muaj hwjchim kav tej pejxeem ntawd, thiab cov thawjcoj ntawd yeej siv hwjchim los quabyuam tej pejxeem. #Lukas 22:25-26 26Tiamsis ntawm nej tsis yog li ntawd. Yog nej leejtwg xav ua tus loj, nws yuavtsum ua sawvdaws tus tubtxib; #Math 23:11; Malak 9:35; Lukas 22:26 27thiab yog nej leejtwg xav ua tus thawj, nws yuavtsum ua sawvdaws qhev. 28Ib yam li Neeg Leejtub, Nws tsis tau los kom leejtwg tiam Nws, tiamsis Nws los tiam sawvdaws thiab muab Nws txojsia los txhiv ntau leej neeg.”

Yexus Kho Ob Tug Digmuag

(Malakaus 10:46-52; Lukas 18:35-43)

29Thaum Yexus thiab Nws cov thwjtim tabtom tawm hauv lub nroog Yelikaus mus, muaj neeg coob-coob lawv Nws qab. 30Muaj ob tug txivneej digmuag zaum ntawm ntug kev hnov tias Yexus taug kev tuaj, ces nkawd txawm hu nrov-nrov hais tias, “Daviv tus Tub, thov Koj tabncuab wb thiab lau!”

31Cov neeg coob-coob ntawd cem nkawd thiab hais kom nkawd nyob twjywm. Tiamsis nkawd yimhuab hu nrov hais tias, “Daviv tus Tub, thov Koj tabncuab wb thiab lau!”

32Yexus txawm nres thiab hu nkawd los, Nws nug nkawd hais tias, “Neb xav kom Kuv ua dabtsi rau neb?”

33Nkawd teb tias, “Tus Tswv, wb xav kom wb ob lub qhovmuag rov pomkev!”

34Yexus tabncuab nkawd, Nws txawm cev tes mus kov nkawd ob lub qhovmuag. Tamsim ntawd nkawd txawm pomkev, thiab nkawd ciali nrog Yexus mus.

Currently Selected:

Mathais 20: MWW2022

Highlight

Copy