Mathais 2

Cov Neeg Uas Txawj Saib Hnubqub Tuaj Hawm Tus Metub

1Yexus tau los yug hauv lub nroog Npelehees uas nyob hauv cov Yudais lub tebchaws, ncaj rau lub sijhawm uas Helauj tabtom ua vajntxwv. Tomqab ntawd tsis ntev, muaj cov neeg uas txawj saib hnubqub txawm tuaj sab hnubtuaj tuaj txog hauv lub nroog Yeluxalees. 2Lawv nug hais tias, “Tus Metub uas yuav ua cov Yudais tus vajntxwv Nws los yug rau qhovtwg? Peb pom Nws lub hnubqub tawm tim sab hnubtuaj tuaj, mas peb thiaj tuaj pehawm Nws.”

3Thaum Vajntxwv Helauj hnov li ntawd, nws thiab tej neeg uas nyob hauv lub nroog Yeluxalees nyuajsiab heev. 4Helauj thiaj hu tagnrho cov thawj povthawj hlob thiab cov xibhwb uas qhia Kevcai tuaj thiab nug lawv hais tias, “Tus Mexiyas yuav los yug rau qhovtwg?”

5Lawv teb tias, “Nws yuav los yug hauv lub nroog Npelehees uas nyob hauv cov Yudais lub tebchaws. Tus xibhwb cev Vajtswv lus tau sau li no tseg hais tias,

6“ ‘Lub nroog Npelehees uas nyob hauv xeev Yudas,

koj tsis yog lub nroog uas me dua tej nroog hauv xeev Yudas;

rauqhov yuav muaj ib tug thawjcoj tshwm hauv koj los

uas yuav coj kuv haivneeg Yixalayees.’ ” #Mikha 5:2

7Ces Helauj txawm hu cov neeg uas txawj saib hnubqub los cuag nws twjywm. Nws kom lawv qhia meej-meej rau nws seb lub sijhawm twg lawv pom lub hnubqub ntawd tawm tuaj. 8Dhau ntawd nws thiaj txib lawv mus nram lub nroog Npelehees thiab hais rau lawv tias, “Nej ciali mus thiab ua tibzoo nrhiav tus Metub ntawd; thaum nej nrhiav tau Nws lawm, nej rovqab los qhia rau kuv paub, kom kuv thiaj paub mus pehawm Nws thiab.”

9Ces lawv txawm tawm mus lawm. Thaum lawv taug kev mus, lub hnubqub uas lawv xub pom tim sab hnubtuaj ntawd txawm coj lawv kev thiab mus nres ncaj ntawm qhov chaw uas tus Metub ntawd nyob lawm saud. 10Thaum lawv pom lub hnubqub ntawd lawv zoosiab kawg li. 11Thaum lawv mus rau hauv tsev, lawv pom tus Metub thiab Nws niam uas yog Malis, lawv txawm txhoscaug ntua pehawm Nws. Lawv thau lawv tej kub, tej tshuaj tswqab, thiab tej roj tswqab maules hauv lawv cov hnab los pub rau tus Metub.

12Lawv txawm rov lwm txojkev mus tsev lawm, vim lawv tau ua npausuav pom Vajtswv los hais rau lawv kom tsis txhob rov mus qhia rau Helauj.

Khiav Mus Rau Tebchaws Iziv

13Thaum cov neeg txawj saib hnubqub rov mus lawm, Yauxej tau ua npausuav pom Vajtswv ib tug timtswv ceebtsheej los hais rau nws hais tias, “Helauj yuav nrhiav tus Metub no tua. Yogli, koj ciali sawv thiab coj tus Metub thiab Nws niam khiav mus rau nram tebchaws Iziv, thiab nyob nrad mus txog thaum uas kuv kom nej mus rau lwmqhov.”

14Yauxej txawm sawvtsees coj tus Metub thiab Malis khiav hmontuj mus rau nram tebchaws Iziv. 15Lawv nyob nrad mus txog thaum Helauj tuag. Tej no muaj tshwmsim kom tiav rawsli tus xibhwb cev Vajtswv lus tau hais tseg lawm hais tias, “Kuv yuav hu Kuv tus Tub tawm hauv tebchaws Iziv los.” #Hauxe 11:1

Tua Cov Menyuam Yaus

16Thaum Helauj paub tias cov neeg txawj saib hnubqub dag nws lawm, nws chim heev. Nws txawm txib neeg mus rau hauv lub nroog Npelehees thiab tej zejzog uas nyob ibncig ntawd kom muab cov menyuam tub uas muaj hnubnyoog ob xyoos rov hauv tua huv tibsi. Helauj ua li no vim nws paub los ntawm cov neeg txawj saib hnubqub hais tias lawv twb pom lub hnubqub ntawd tshwm tau ob xyoos los lawm.

17Tej no muaj kom tiav rawsli Yelemis uas yog tus xibhwb cev Vajtswv lus qhia tseg hais tias,

18“Neeg hnov ib lub suab hauv lub nroog Lamas,

uas yog lub suab quaj tusiab kawg li.

Laxees quajntsuag rau nws tej menyuam;

tsis muaj leejtwg yuav nplig tau nws lub siab li,

vim nws cov menyuam tuag tas lawm.” #Yelemi 31:15

Rov Nram Tebchaws Iziv Los

19Tomqab Helauj tuag lawm, tus Tswv ib tug timtswv tau tshwm rau Yauxej pom hauv npausuav nram tebchaws Iziv 20thiab nws hais tias, “Ciali sawv, coj tus Metub thiab Nws niam rovqab mus rau pem tebchaws Yixalayees, rauqhov cov uas yuav tua tus Metub no twb tuag tas lawm.” 21Yauxej txawm sawvtsees coj tus Metub thiab Malis rovqab mus rau pem tebchaws Yixalayees.

22Tiamsis thaum Yauxej hnov tias Akhilaus sawv los ua vajntxwv kav tebchaws Yudas hloov nws txiv Helauj chaw lawm, Yauxej kuj ntshai mus nyob qhov chaw ntawd. Yauxej rovqab ua npausuav pom Vajtswv los qhia rau nws ntxiv, ces nws txawm mus rau pem xeev Kalilais, 23thiab mus nyob hauv ib lub nroog hu ua Naxalev. Tej no muaj rawsli tej lus uas cov xibhwb cev Vajtswv lus tau qhia tseg txog tus Metub ntawd hais tias, “Sawvdaws yuav hu Nws ua neeg Naxalev.” #Malak 1:24; Lukas 2:39; Yauh 1:45

Currently Selected:

Mathais 2: MWW2022

Highlight

Copy