Mathais 17

Yexus Lub Cev Hloov

(Malakaus 9:2-13; Lukas 9:28-36)

1Rau hnub tomqab ntawd Yexus txawm coj Petus, Yakaunpaus thiab nws tus kwv Yauhas nrog Yexus mus rau saum ib lub roob siab. Qhov chaw ntawd tsuas muaj lawv nkaus xwb. 2Yexus lub cev txawm hloov hlo rau lawv pom: Nws lub ntsejmuag ci ib yam li lub hnub, thiab Nws cev tsoostsho ciali ci ntsa-iab dawbpaug. 3Ces peb tug thwjtim ntawd txawm pom Mauxes thiab Eliyas nrog Yexus tham. 4Petus hais rau Yexus hais tias, “Tus Tswv, qhov uas peb nyob ntawm no zoo kawg li! Yog Koj pomzoo, kuv yuav ua peb lub tsev pheebsuab rau ntawm no, ib lub rau Koj, ib lub rau Mauxes, thiab ib lub rau Eliyas.”

5Thaum Petus tseem tabtom hais li ntawd, txawm muaj ib tauv huab ci dawbpaug los roos nkaus lawv, thiab muaj ib lub suab hais hauv tauv huab ntawd tuaj hais tias, “Tus no yog Kuv tus Tub uas Kuv hlub, Kuv txaussiab rau Nws heev, nej ciali mloog Nws lus!” #Chiv 22:2; Nnkauj 2:7; Yaxaya 42:1; Math 3:17; 12:18; Malak 1:11; Lukas 3:22; 2Kev 18:15 #2Pet 1:17-18

6Thaum cov thwjtim hnov lub suab ntawd, lawv ntshai kawg li, lawv txawm qhau cev hlo thiab nyo hau ntshis rau hauv av. 7Yexus los tuav nkaus lawv thiab hais tias, “Nej ciali sawv, tsis txhob ntshai.” 8Lawv txawm tsa qhovmuag saib, uaciav tsis pom leejtwg li, tsuas pom Yexus tibleeg xwb.

9Thaum lawv nqis pem roob los, Yexus txwv lawv hais tias, “Nej tsis txhob qhia tej uas nej pom ntawd rau leejtwg mus txog thaum uas Neeg Leejtub sawv hauv qhovtuag rovqab los tso.”

10Cov thwjtim nug Yexus hais tias, “Vim licas cov xibhwb uas qhia Kevcai hais tias Eliyas yuavtsum xub los uantej?” #Mlakis 4:5

11Yexus teb tias, “Tseeb tiag, Eliyas yeej yuavtsum xub los, thiab los npaj txhua yam kom tiavlog cia. 12Kuv qhia rau nej hais tias, Eliyas twb los lawm, tiamsis neeg tsis paub nws, lawv thiaj ua rau nws rawsli lawv siab nyiam. Neeg Leejtub los yuav raug lawv tsimtxom ib yam nkaus li ntawd thiab.” #Math 11:14

13Thaum ntawd cov thwjtim thiaj totaub hais tias, qhov uas Yexus hais ntawd yog Nws hais txog Yauhas tus uas muab neeg ua kevcai rausdej.

Yexus Kho Tus Tub Uas Raug Ib Tus Dab

(Malakaus 9:14-29; Lukas 9:37-43a)

14Thaum Yexus thiab Nws peb tug thwjtim rov los txog ntawm cov neeg coob-coob, txawm muaj ib tug txivneej tuaj txhoscaug ntua ntawm Yexus kotaw, 15thiab thov hais tias, “Tus Tswv, thov Koj tabncuab kuv tus tub, nws qaug dabpeg thiab txomnyem kawg li. Nws pheej ntog rau hauv qhovcub thiab rau hauv dej. 16Kuv twb coj nws tuaj cuag Koj cov thwjtim lawm, tiamsis lawv kho tsis tau nws.”

17Yexus teb tias, “Tiam neeg uas tsis muaj kev ntseeg thiab siabphem! Kuv tseem yuav nrog nej nyob ntev licas thiab? Kuv tseem yuav ua siabntev rau nej mus txog thaum twg? Ciali coj tus metub los rau Kuv!” 18Yexus ntiab dab ces dab txawm tawm hauv tus metub mus, ces nws txawm zoo hlo tamsim ntawd.

19Dhau ntawd Yexus cov thwjtim txawm los cuag Nws twjywm thiab nug hais tias, “Vim licas peb thiaj ntiab tsis tau dab tawm?”

20 # Math 21:21; Malak 11:23; 1Klt 13:2 Yexus teb tias, “Twb yog vim nej tsis muaj kev ntseeg txaus. Kuv qhia tseeb rau nej hais tias, yog nej muaj kev ntseeg luaj lub noob maxataj, nej yeej muaj peevxwm hais rau lub roob no tias, ‘Ciali txav ntawm no mus rau tod!’ Ces lub roob ntawd yeej yuav txav mus. Yeej tsis muaj ib yam uas nej yuav ua tsis tau li!” 21#17:21: Tej phau ntawv qub uas xuas tes sau ntxiv nqe 21 no rau: Tiamsis tsuas yog kev thov Vajtswv thiab kev yoo mov nkaus xwb thiaj yuav ntiab tau yam dab no tawm; yeej tsis muaj lwmyam uas yuav ntiab tau li (saib Malak 9:29).

Yexus Rov Hais Txog Nws Kev Tuag

(Malakaus 9:30-32; Lukas 9:43b-45)

22Thaum cov thwjtim tuaj sibsau uake rau hauv lub xeev Kalilais, Yexus hais rau lawv tias, “Neeg Leejtub yuav raug muab cob rau luag tes. 23Luag yuav muab Nws tua; tiamsis peb hnub tomqab ntawd Nws yuav ciajsia sawv rov los.” Cov thwjtim nyuajsiab kawg li.

Them Se Rau Lub Tuamtsev

24Thaum Yexus thiab Nws cov thwjtim mus txog hauv lub nroog Kapena-us, cov neeg uas sau se rau lub Tuamtsev tuaj cuag Petus thiab nug hais tias, “Koj tus xibhwb puas them se rau lub Tuamtsev?” #Khiav 30:13; 38:26

25Petus teb tias, “Them hos.”

Thaum Petus mus rau hauv tsev, Yexus txawm xub nug nws hais tias, “Ximoos, koj xav licas? Leejtwg yog cov uas them se rau tej vajntxwv hauv ntiajteb no? Yog cov pejxeem hauv nws lub tebchaws ua cov them los yog lwm haivneeg ua cov them?”

26Petus teb tias, “Lwm haivneeg yog cov uas them.”

Yexus hais tias, “Yogli ntawd, cov pejxeem hauv nws lub tebchaws tsis tag yuav them li. 27Tiamsis peb tsis txhob ua rau lawv ntsawvsiab. Koj ciali mus nuv ntses tom hiavtxwv. Thawjtug ntses uas koj nuv tau, koj ciali muab lub qhovncauj rua, koj yuav pom ib npib nyiaj uas txaus them se rau wb. Koj nqa npib nyiaj ntawd mus them wb tej se.”

Currently Selected:

Mathais 17: MWW2022

Highlight

Copy